Kudi Badi mu Kīkalo kya Mishipiditu—Ino I Bāni?

Mu Bulaya, lolo umo mununu watwela mu kipwilo, ukwete shapele, wafukatyila nkishi wa Madia na bulēme. Mu Afrika, kisaka kimo kitūta malwa kufula kufula kwa kibundu kya mubutule mulēmekibwe. Mu Amerika, nsongwalume umo ushikilwa na nzala ne kulanguluka, utengele kwisamba na yewa wakulupile bu wandi mwikeulu mulami. Mu Azia, kitobo umo usōka mapapye a misombelo aela bu mulambu ku mishipiditu ya bankambo.

LELO bano bantu i beifwane mu bika? Bonso bakulupile amba kudi bipangwa bya ñeni bidi mu kīkalo kya mishipiditu bikokeja kwisambwa nabyo ne bidi na lupusa bininge mu būmi bwa bantu. Na bubine, luno lukulupilo ke lupyapo kadi kelutulumujapo. Ino kintu kitulumuja i kino amba, kudi milangwe mivule ipatanya pa mwanda utala boba badi mu kīkalo kya mishipiditu.

Bamizilma batōtanga Leza—Allah. * Bantu ba mu bipwilo bya Kine Kidishitu banenanga amba Leza i busatu, ubundilwe na Leza Tata, Leza Mwana ne Leza Muya Ujila. Bene Hindu bakulupile amba kudi baleza balume ne baleza bakaji kanunu kamo ne kupita. Bantu bakwabo banenanga amba mushipiditu udi mu banyema, mityi, mabwe, ne minonga. Ino bangi nabo batononwanga mabuku, mafilime, ne mpangiko ya Televijo bilombola bamwikeulu, bademona, bibanda, batōkele, baleza balume ne baleza bakaji.

Monka mokwikadile milangwe mivule ipatanya pangala pa baleza balume ne baleza bakaji, mo monka mo kwikadile milangwe mivule kadi ipatanya pa mwa kwisambila nabo. Mungya buluji ke muswelopo onso wa kwisamba nabo muyampe. Langa’byopo bidi mu uno muswelo: Kumeso kwa kwita muntu ku telefone, tufwaninwe kuyuka mwine otusaka kwita ne kukulupila na bubine amba i muntu udi’ko binebine ne amba usa kwitaba. Kutompa kwita muntu wa kufwatakanya bitupu kukekala kwampikwa kamweno. Kadi kibi kutabuka i kino, kwita ndimbañani kukokeja kwikala bu kyaka.

Penepo nanshi, i bāni bine badi mu kīkalo kya mishipiditu? Bible uleta malondololo ku kino kipangujo, kadi ulombola mwine otufwaninwe kwisamba nandi ne byotufwaninwe kutengela kwadi. Abe endelela kutanga. Usa kutulumuka bisokola Bible pa uno mwanda.

[Kunshi kwa dyani]