Wifunde Kinenwa Kya Leza

Mwanda Waka Ufundijibwe na Leza?

Kino kishinte kipangula bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisamba nobe ano malondololo.

1. Mwanda Waka Ufundijibwe na Leza?

Leza udi na myanda miyampe ya kintu kilumbuluke ku muzo wa muntu. Witulombola’kyo mu mani a mu Bible. Bible udi pamo bwa mukanda utamba kudi Tata wetu wa buswe wa mūlu.—Tanga Yelemia 29:11.

2. Lelo myanda miyampe mine i myanda’ka?

Muzo wa muntu usakilwa buludiki buyampe. I kutupu mulopwe ke mukūle muzo wa muntu ku bukalabale, mboloji, misongo nansha lufu. Ino kudi myanda miyampe. Leza ukaletela muzo wa muntu buludiki buyampe bukeunyongolola ku byonso bileta masusu.—Tanga Danyele 2:44.

3. Mwanda waka i kya kamweno kufundijibwa na Leza?

Panopano ponka, Leza usa kusubula ntanda na kutalula’po bantu baleta masusu. Mu kino kitatyi, ufundijanga midiyo ne midiyo ya bantu betyepeje bekale na mwiendelejo mulumbuluke wa mu būmi, wimanine pa buswe. Kupityila ku Kinenwa kya Leza, bantu befundanga mwa kulwila na makambakano a mu būmi, mwa kutanina nsangaji ya binebine, ne muswelo wa kusangaja Leza.—Tanga Zefenia 2:3.

  4. Lelo Mulembi wa Bible i ani?

Bible udi na mikanda mityemitye 66. Wāsonekelwe na bantu kubwipi kwa 40. Mikanda itano imbajinji yāsonekelwe na Mosesa pano kepadi kintu kya myaka 3500. Mukanda wa mfulo wāsonekelwe na mutumibwa Yoano ke papite myaka 1900 ne musubu. Inoko balembi ba Bible bāsonekele milangwe ya Leza, ke ya abo benepo, mhm. Nanshi Leza ye Mulembi wa Bible.—Tanga 2 Temote 3:16; 2 Petelo 1:21.

Tuyukile amba Bible i mutambe kudi Leza mwanda ulaya myanda palapala ya bintu bikaya kumeso pampikwa kwitupa. I kutupu muntu mukwabo ukokeja kulonga kino. (Isaya 46:9, 10) Kadi, Bible witusokwelanga ngikadilo ya Leza. Udi na bukomo bwa kwalamuna būmi bwa bantu ke bulumbuluke. Buno bukamoni i bulengeje bantu bavule betabije amba Bible i Kinenwa kya Leza.—Tanga Yoshua 23:14; 1 Tesalonika 2:13.

5. I muswelo’ka okokeja kwivwanija Bible?

Yesu wādi mufundiji mutumbe wa Kinenwa kya Leza. Nansha bantu bavule baādi wisamba nabo byobādi kala bayukile Bible, ino bādi basakilwa bukwashi pa kumwivwanija. Pa kwibakwasha, Yesu wādi utela kisonekwa kimokimo ne kwibashintulwila mwa “kwivwanija bisonekwa.” Kino kishinte “Wifunde Kinenwa kya Leza,” kikengidija manwa amo onka pa kukukwasha.—Tanga Luka 24:27, 45.

Kekudipo bintu bivule bisangaja na kufundijibwa na Leza pa bitala kitungo kya būmi. Inoko, bantu bamo kebakaloelelwapo pa kukumona utanga Bible. Kokaleka kino kikukankaje. Lukulupilo lobe lwa kukamona būmi bwa nyeke lwimanine pa kuyuka Leza.—Tanga Mateo 5:10-12; Yoano 17:3.

Shi usaka kuyukila’ko bintu bivule, tala shapita 2 wa dino dibuku Lelo I Bika Bine Bifundija Bible?, dilupwilwe na Batumoni ba Yehova.