Mwanda Waka Byoneka?

“Bafadiseo nabo bafwena kwādi [Yesu] kumutompa ke bamunena’mba: Lelo i kijila’ni muntu kupanga mukaji wandi, shi pa mwanda ka? shi pa mwanda ka?”—Mateo 19:3.

BANTU bamo bāikele’ko mu mafuku a Yesu bāmwipangwile shi masongi akokeja ne afwaninwe kwija. Yesu wēbanene amba: “Lelo kemwatangile pa mwine, webapangile ku ngalwilo, webapangile ba mulume ne mukaji? Kadi amba, po pa mwanda wa kulonga mwana-mulume ukashia shandi, ne inandi mwine, walamatyididila mukajandi, kabidi bubidi bwabo bakēkalanga ke mubidi umo. Nanshi pano ke bakidi ne bubidi bwine ke mubidi’tu umo. I binebine kadi, kyokya kyasambakanya Leza pamo kokakolwa kwikikalañanya, nansha wi muntu ka, nansha wi muntu ka.” * (Mateo 19:4-6) I bimweke’mba, Leza wādi usaka masongi alādile.

Mu matanda mangi dyalelo, kintu kya masongi 40 ne musubu pa katwa ‘akalañananga,’ afula ku dilubu. Lelo madingi a Bible atala pa busongi keakidipo na kamweno dyalelo? Lelo kyonekela masongi i mwanda’tu wa bubi bwa ino mpangiko?

Tala kino kimfwa: Bisaka bibidi bibapote myotoka ya muswelo umo. Mu kisaka kimo balongololanga wabo motoka ne kwiwendeja na budyumuku. Motoka wabo keonekelepo. Kisaka kikwabo kekitūdile’kopo kyaba kadi kekilongapo bukomo bwa kulongolola motoka wabo, kadi bewendejanga na kimpuma. Uno motoka ubaoneka abaleka’o. Le kilubo i kya ani—i kya motoka’ni i kya bene’o? I bimweke amba bene’o bo baona’o.

Mo monka, shi masongi mavule onekanga ke kunenapo amba mpangiko ya busongi yo idi na kilubo. Ino kudi masongi midiyo na midiyo adi biyampe. Ano masongi aletelanga bantu nsangaji ne kushimatyija bisaka ne bibundi. Ino enka mwikadilanga motoka, busongi busakilwanga kuta mutyima ne kwibulongolola pa kusaka’mba bwije.

Mwikale besonge panopano nansha shi ke palāle myaka makumi, madingi a mu Bible a mwa kulumbulwila busongi ne kwibuningisha bine akwashanga. Mu mani alonda’ko, talai bimfwa bimo bimo.

[Kunshi kwa dyani]