Fwenai Kudi Leza

“Ukekalanga ne Mutyima wa Kuloelelwa”

KUMONA pasusuka nansha pafwa muntu otusenswe kusansanga. Bitupanga bulanda. Inoko, kuyuka amba Umpangi wetu, Yehova Leza uyukile makambakano etu, kwituseñanga. Kutabukidila, udi na kipyupyu kya kwingidija bukomo bwandi bonso mwanda wa kwaluja ku būmi boba bafwile. Tala lukulupilo ludi mu binenwa bya Yoba, bisonekelwe mu Yoba 14:13-15.

Langa mobyādi bikadile. Yoba, muntu wa lwitabijo lukomo, watanwa na matompo makatampe—wajimija ne bituntwa byandi, wafwilwa bana bandi bonso basenswe, ne kubela misongo isansa. Mu ano malwa makomokomo, waabija Leza amba: “Ii! shi uswele kumfya mu Kalunga-nyembo [kibundu kijikwa’mo bantu]”! (Vese 13) Yoba wamone kibundu bu kifuko kya kutūja ku masusu andi. Kwine’kwa, ye kwakekala pampikwa makambakano ne misanshi, pamo bwa kya bulēme kifibwe na Leza. *

Lelo Yoba wadi wa kufyama nyeke mu kibundu? Yoba udi na lukulupilo lukwabo. Wendelela na kulomba’mba: “Poso’nka . . . kitatyi kifikile, ne kumvuluka.” Yoba ukulupile ne mutyima onso amba usa kwikala mu kibundu kitatyi kityetye ne amba Yehova kakamwilwapo. Yoba wadingakanya kitatyi kyakapityija mu Sheole na “mafuku a bulwi”—kitatyi kimulomba kwilaija. Mafuku anga? Aye amba: “Poso’nka kukutululwa kwami kufike.” (Vese 14) Kuno kukutululwa i kutambijibwa mu kubundu—mu muneneno mukwabo, i kusangulwa mu lufu!

Mwanda waka Yoba ukulupile amba kukutululwa kwandi kusa kufika? Mwanda uyukile mumwenine Umpangi wetu batōtyi bandi ba kikōkeji bafwile. Yoba unena’mba: “Shi abe ukēte, nankyo nka kwitaba; nansha ukekalanga ne mutyima wa kuloelelwa ku mīngilo ya obe makasa.” (Vese 15) Yoba wiyukile amba aye mwine i mwingilo wa makasa a Leza. Mwine Upāna Būmi ye wāpungile Yoba mu difu ne na bubine, ubwanya kumujokeja ku būmi shi wafu.—Yoba 10:8, 9; 31:15.

Binenwa bya Yoba bitufundija biyampe mwikadile Yehova: Ulamete mu muswelo wa pa bula ku bantu betūla mu makasa andi, pamo bwa Yoba, ebabumbe ne kwibanona ke bantu baswedibwe ku meso andi. (Isaya 64:8) Yehova umwene batōtyi bandi ba kikōkeji bu balēme. Udi na mutyima wa “kuloelelwa” boba ba kikōkeji bafwile. Mufundi umo unena’mba, kishima kya Kihebelu kyalamwinwe pano, “na bubine i kishima kya mu bishima bikomo bya kulombola nabyo mutyima wa kusakasaka.” Bine, Yehova uvulukanga batōtyi bandi bafwile, ino kadi wabilanga kwibaluja ku būmi.

Na bya dyese, Yehova wamwene amba mpango yandi ya kusangula bafwe, * i biyampe eisokole mu mukanda wa Yoba—mukanda ubadilwa mu mikanda imbajinji kulembwa. Usakanga wimone monka na baswe bobe bafwile. Bine kino kikokeja kutyepeja njia ya kufwilwa. Ubulwe’po kwifundila’ko bivule pa uno Leza wa buswe ne pa muswelo obwanya kwitabija kubumbwa nandi mwa kwikadila muswelo wa bu bantu bakamona pakafikidila mpango yandi?

[Kunshi kwa dyani]