Yesu—Būmi Bwandi

“Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.”—YOANO 4:34.

KITATYI kyēsambile Yesu binenwa bidi kūlu’bi, kilombola bintu byaādi utele’ko mutyima mu būmi bwandi. Yesu ne bandi bana ba bwanga abaenda lwendo tamba lubanga batyibulula ntanda ya ngulu ya Samadia. (Yoano 4:6) Bana ba bwanga pa kulanga amba pano Yesu ye uno waivwana nzala, ke bamupe byakudya. (Yoano 4:31-33) Ino Yesu pa kwibalondolola, watela mu kīpi kitungo kyandi mu būmi. Kwadi, kwingila mwingilo wa Leza kyo kintu kya mvubu mpata kupita ne byakudya bine. Mu binenwa ne mu bilongwa, būmi bwa Yesu bwādi bwa kulonga kiswa-mutyima kya Leza. Le kino kyādi kimulomba bika ne bika?

▪ Kusapula ne kufundija Bulopwe bwa Leza Bible ushintulula mwingilo wāingile Yesu mu būmi amba: “Wadi wenda ujokoloka monso mu Ngadilea kufundija . . . ne kusapula myanda-miyampe ya bobwa bulopwe.” (Mateo 4:23) Yesu kādipo usapula bitupu, Bulopwe bwa Leza ku bantu. Ino wādi kadi wibafundija—ko kunena’mba, wibalombola, wibashintulwila, ne kwibakulupija na mulangilo muluji. Bulopwe o mutwe wa mwanda wa musapu wa Yesu.

Kupityila ku mwingilo wandi, Yesu wāfundije bemvwaniki bandi mwikadile Bulopwe bwa Leza ne byobukalonga. Tala bubinebine bulonda’ko butala Bulopwe pamo ne mavese a mu Bisonekwa etulombola byānene Yesu pa uno mwanda.

▪ Bulopwe bwa Leza i umbikalo wa momwa mūlu, kadi Yesu ye mwine utongelwe na Yehova bu Mulopwe.—MATEO 4:17; YOANO 18:36.

▪ Bulopwe bukalombola buujila bwa dijina dya Leza ne kulengeja kiswa-mutyima kyandi kilongeke pano pa ntanda na mokilongelwa mūlu.—MATEO 6:9, 10.

▪ Mu buludiki bwa Bulopwe bwa Leza, ntanda yonso ikalamunwa ke paladisa.—LUKA 23:42, 43.

▪ Panopano ponka Bulopwe bwa Leza busa kwiya ne kufikidija kiswa-mutyima kya Leza kitala ino ntanda. *—MATEO 24:3, 7-12.

▪ Bilongwa bikatakata Yesu wādi uyukene dibajinji bu “Mufundiji.” (Yoano 13:13) Ino mu bula bwa mwingilo wandi wa myaka isatu ne kipindi, wālongele’mo mingilo mivule mikata. Ino mingilo yādi na bitungo bibidi bikatampe. Kibajinji, yākweshe ku kulombola amba binebine Yesu i mutumwe na Leza. (Mateo 11:2-6) Kya bubidi, byālombwele byobya byakalonga bu Mulopwe wa Bulopwe bwa Leza mu mafuku a kumeso pa ntanda yonso. Tala bingelengele bimobimo byaālongele.

▪ Wātaleje kimpumpu pa mema ne luvula lukatampe.—MAKO 4:39-41.

▪ Wāundapile ba mbá, kubadila’mo ne bampofu, babitwi ne bisheta.—LUKA 7:21, 22.

▪ Wāvudije bidibwa ne kudisha bibumbo byādi na nzala.—MATEO 14:17-21; 15:34-38.

▪ Kintu kya misunsa isatu, wājokeje bafwe ku būmi.—LUKA 7:11-15; 8:41-55; YOANO 11:38-44.

Langa’po mukekadila būmi pano pa ntanda  mu buludiki bwa uno Mulopwe nkomokomo namino!

▪ Kusokola ngikadila ya Yehova Pa mwanda utala kufundija bantu bitala padi Yehova, i kutupu mubwanye’byo kupita Mwanā Leza, wāyukene mwenda mafuku bu Yesu Kidishitu. Byadi “umbedi wa byonso byakupangibwa,” Yesu wāikele pamo na Yehova momwa mūlu kitatyi kilampe kupita bipangwa bikwabo bya ku mushipiditu. (Kolose 1:15) Langa’po bidi mikenga yāikele nayo ya kwimvwanija mulangilo wa Shandi ne kuyuka kiswa-mutyima kyandi, misoñanya, ne mashinda andi.

Yesu wādi na bubinga bwa kunena’mba: “Nansha umo ayūke Mwana poso aye Tata; kadi Tata aye, nansha umo kumuyūka, poso Mwana, kadi ne yewa, shi ani, wa Mwana ukaswa umusokwela’ye.” (Luka 10:22) Yesu paādi pano panshi, wādi usangela—ne kininga ponka—kusokwela bakwabo mwikadile Shandi. Yesu wādi wisamba ne kufundija bintu bitamba ku nsulo ya pa bula: wādi uvuluka byaēfundile paādi mu kīkalo kya mishipiditu ne mu kifuko kya Leza Mwine Mukatakata mwine.—Yoano 8:28.

Yesu paādi pano pa ntanda, wāselele myanda itala padi Shandi yaēfundile mūlu ne kufundija’yo mu muswelo upēla kwimvwanwa na bantu ba ludingo lwa panshi ne kwiingidija.

Tubandaulei miswelo ibidi mikatampe yāsokwele’mo Yesu Shandi.

▪ Mu bufundiji bwandi, Yesu wāyukenye bubinebine butala padi Yehova—dijina dyandi, mpango yandi, ne mashinda andi.—YOANO 3:16; 17:6, 26.

▪ Kupityila ku bilongwa byandi, Yesu wāsokwele bipindi bivule bilumbuluke bya ngikadila ya Yehova. Yesu wāmwekeje ngikadila ya Shandi mu muswelo mubwaninine, wādi ubwanya ne kunena na bubine amba: ‘Shi musaka kuyuka mwikadile Tata, ntalei’tu ami.’—YOANO 5:19; 14:9.

Tubatendela mwādi mwikadile būmi bwa Yesu. Tukokeja kumwena’mo bininge shi tubandaule mwanda waka wāfwile ne shi twikale na būmi bukwatañene na byobya byotwifunda.

[Kunshi kwa dyani]