1. Kutenkana kwa Nshi

“Kutenkana kukatampe kwa nshi.”—LUKA 21:11.

● Winnie, wa myeji 16, bamupandije mu bityakuku bya mobo aponene mu Haiti. Bantu bengila ku televijo imo bakatadile kino kimpengele baivwene kandi kadiwi kadila bityebitye. Wapande ku kimpengele, ino bambutwile bandi kupanda mpika.

I BIKA BINE BILONGEKA? Paponene kintenshi mu Haiti kya bukatampe bwa 7.0 mu Kweji 1, 2010, kubwipi kwa bantu 300000 ne kupita bafwile. Kadi mu kitulumukila bantu mudiyo 1 ne musubu babudilwe mwa kwikala. Kintenshi kya mu Haiti nansha byokyadi kikatampe, ino ke kibajinjipo. Kudi bintenshi bikatampe 18 bilongekele kujokoloka ntanda yonso tamba mu Kweji 4, 2009 kutūla ku Kweji 4, 2010.

BAVULE BANENA’PO NAMANI? Ketutanwangapo na bintenshi bivule mwanda wa bwifundi bwa dyalelo, pano twi bebipotolole biyampe kupita bantu ba pa kala.

LE BINO BYOBANENA I BYA BINE? Tala uno mwanda: Bible katyityijapo bungi bwa bintenshi bilongeka umbula bwa mafuku a mfulo. Inoko, unena amba kukekalanga “kutenkana kukatampe kwa nshi” “kungi kungi konso,” kukalengeja kwikale kubadilwa mu bintu bikatampe bya mu kino kitatyi kibi mu mānga.—Mako 13:8; Luka 21:11.

LE ULANGA’PO NAMANI? Le twimwenanga kutenkana kukatampe kwa nshi mungya mwēkulaile Bible?

Kutenkana konkakonka kwa nshi padi kekumonwepo kala bu bukamoni bulombola amba tudi mu mafuku a ku mfulo. Inoko, buno i bupolofeto bumo bidi bufikidila. Tutalei ne bwa bubidi.

[Bushintuludi pa paje 4]

“Batwe [befundi ba umbuo] twikwitanga bu kutenkana kukatampe kwa nshi. Bakwabo bonso bekwita bu kwa malwa.”—KEN HUDNUT, U.S. GEOLOGICAL SURVEY.

[Kutambile Kifwatulo pa paje 4]

© William Daniels/Panos Pictures