4. Kubulwa Buswe bwa Bubutule

“Bantu . . . bakabulwa kisanso kya kibutwila kya kusanswa bisaka byabo.”—2 TEMOTE 3:1-3, God’s Word Bible.

● Chris wingilanga mu kitango kya kungala kwa Pays de Galles kitala kususulwa kwa ku mobo. Chris unena’mba: “Navuluka mwana-mukaji umo waile mukupilwe bibi, nakomenwa ne kumuyuka amba i enka yewa onamwene dibajinji. Bana-bakaji bakwabo balopolwanga ke bemvwana ne bumvu bwa kutala muntu mu meso.”

I BIKA BINE BILONGEKA? Mu ntanda imo ya mu Afrika, kubwipi kwa mwana-mukaji umo pa basatu ujilulwanga pa bwanuke. Bwipangudi bwalongelwe’mo bulombola’mba bana-balume 60, ko kunena’mba mwana-mulume umo pa basatu, betabije amba kukupila mukaji ke kubipo. Inoko, ke’nkapo bana-bakaji basusulwanga ku mobo. Kimfwa, mu Kanada bana-balume basatu pa dikumi bakupilwanga nansha kususulwa mu muswelo kampanda na babo bakaji.

BAVULE BANENA’PO NAMANI? Masusu a ku mobo ekalanga’ko nyeke. Bantu’ko’ko bo batabuka kuta’ko mutyima mpata dyalelo kutabuka mafuku kunyuma.

LE BINO BYOBANENA I BYA BINE? Mu ino myaka, bantu abefunde bivule pa mwanda utala masusu a ku mobo. Ino le kuyuka uno mwanda i kutyepeje kibalwa kya bantu basusulwa ku mobo? Mhm, ke amopo. Kubulwa buswe bwa bubutule kubaandabila mpata.

LE ULANGA’PO NAMANI? Le 2 Temote 3:1-3 ufikidilanga? Lelo bantu bavule i babulwe kisanso kya kusanswa bisaka byabo kifwaninwe kwiila ayo kine?

Bupolofeto bwa butano bomona bufikidila butalanga kīkalo kyetu, ke ntanda kadi. Tala binena Bible pa uno mwanda.

[Bushintuludi pa paje 7]

“Kususulwa ku mobo i mambo ayukene amba keasapulwangapo divule mu bantu. Mwana-mukaji ukokeja kususulwa na mulume misunsa 35, ebiya kakete bampulushi.”—MWANA-MUKAJI UNENENA BANTU KU TELEFONE MU MYANDA YA KUSUSULWA KU MOBO MU PAYS DE GALLES.