Wifunde Kinenwa kya Leza

Mwanda Waka Leza Ulekele’ko Bubi ne Masusu?

Kino kishinte kipangula bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisamba nobe ano malondololo.

1. Le bubi bwāshilwile namani?

Bubi bwāshilwile pano pa ntanda kitatyi kyābepele Satana bubela bubajinji. Satana kādipo mubi kitatyi kyaāpangilwe. Wādi mwikeulu mubwaninine, ino “ne kwimanapo mu byabinebine, mpika.” (Yoano 8:44) Wātamije mutyima wa kusaka kutōtwa, kintu kifwaninwe enka Leza kete. Satana wābepele Eva, mwana-mukaji umbajinji, wāmunekenya amukōkele pa kyaba kya kukōkela Leza. Adama nandi wēkuta umbumo na Eva na kupela kukōkela Leza. Butongi bwa Adama bwāletele masusu ne lufu.—Tanga Ngalwilo 3:1-6, 17-19.

Satana pa kusoñanya Eva atombokele Leza, wāshilwile butomboki bwa kutombokela bubikadi bwa Leza. Bantu bavule bēlungile kudi Satana na kupela Leza ekale Muludiki. Mu uno muswelo, Satana wāikele ke “mwine panopantanda.”—Tanga Yoano 14:30; Kusokwelwa 12:9.

2. Lelo bupangi bwa Leza bwādi kala boneke?

Bantu ne bamwikeulu bāpangilwe na Leza bādi na bukomo bubwaninine bwa kukōkela misoñanya ya Leza. (Kupituluka 32:5) Leza wētupangile na bwanapabo bwa kutonga kulonga kiyampe nansha kibi. Buno bwanapabo bwitupanga mukenga wa kulombola amba tuswele Leza.—Tanga Yakoba 1:13-15; 1 Yoano 5:3.

3. Mwanda waka Leza ukilekele masusu?

Pano ke myaka, Yehova ulekele butomboki bobatombokela bubikadi bwandi. Mwanda waka? Mwanda wa kulombola amba i kutupu bimwenwa mu bukomo bwa kuludika pampikwa aye. (Yelemia 10:23) Myaka 6000 ya muzo wa muntu pa kupita’po, uno mwanda ubalondololwa. Baludiki ba bantu i bakomenwe kupwija mavita, butapani, bukondame, ne misongo.—Tanga Musapudi 7:29; 8:9; Loma 9:17.

Inoko, boba betabija Leza bu Muludiki bamwenanga’mo. (Isaya 48:17, 18) Panopano ponka, Yehova usa kufudija maludiki onso a bantu. Enka bantu batonga kuludikwa na Leza bo bakekala pano pa ntanda.—Isaya 2:3, 4; 11:9; tanga Danyele 2:44.

  4. Le kitūkijetyima kya Leza kibaleta mukenga’ka?

Satana wānene amba i kutupu muntu nansha umo ukamukōkela Yehova. Kitūkijetyima kya Leza kitupanga mukenga wa kulombola shi tusaka kuludikwa na Leza nansha na bantu. Butongi bwetu bumwekelanga ku muswelo otwiendeja mu būmi.—Tanda Yoba 1:8-11; Nkindi 27:11.

5. I muswelo’ka otutoñanga Leza bu Muludiki wetu?

Tutoñanga Leza bu Muludiki kitatyi kyotukimba ne kulonda butōtyi bwa bine bwimanine pa Kinenwa kyandi, Bible. (Yoano 4:23) Kadi twepukanga kwikuja mu politike ne mavita, pamo bwa Yesu.—Tanga Yoano 17:14.

Satana wingidijanga bukomo bwandi mwanda wa kukankamika bilongwa bya busekese ne bileta musala. Kitatyi kyotupela bino bilongwa, balunda ne babutule bamo bakokeja kwitupunika nansha kwitulwa. (1 Petelo 4:3, 4) Batwe bene bo ba kutonga. Le tukelunga pamo na bantu basenswe Leza? Le tukakōkela bijila byandi bya tunangu ne buswe? Nankyo, tukalombola amba Satana wābepele pa kunena’mba i kutupu muntu ukalonga byobya binena Leza.—Tanga 1 Kodinda 6:9, 10; 15:33.

Shi usaka kuyukila’ko bintu bivule, tala shapita 11 wa dino dibuku, Lelo i Bika Bine Bifundija Bible? dilupwilwe na Batumoni ba Yehova.

[Kifwatulo pa paje 12]

Adama wātongele butongi bufwe

[Kifwatulo pa paje 13]

Byotutonga bilombola shi tusaka Leza ekale Muludiki wetu