I Ani Ufwaninwe Kufundija Bana Myanda ya Leza?

“Mwana-wabwanga nanshi kakilepo shandi dya bwanga, ino wakuyūkijapo ukēkalanga pamo ne shandi dya bwanga.”—LUKA 6:40.

BAMBUTWILE bamo bemonanga’mba kebabwanyapo kufundija bana myanda ya Leza. Bakokeja kulanga amba kebafundilepo bivule nansha kuyuka mpata myanda ya Leza mwa kwikadila badimu bayampe. Mfulo mfulō, bafika ne ku kushila mubutule nansha mukulu wa kipwilo kino kiselwa kikatampe.

Le penepo i ani mufwaninwe kufundija bana bubinebine butala padi Leza ne misoñanya ya mu mwikadilo? Tala binena Bible pa uno mwanda, kupwa dingakanya’byo na byobya bisokwele bakimbi.

Le I Mwingilo’ka Udi na Shabana?

Bifundija Bible: “Kadi, bānwe bashabo nenu, kemukibasomba bāna benu ku bukalabale; mwibatamijei biyampe monka mu madingi, ne mu lufundijo lwa Mfumwetu.”—Efisesa 6:4.

Bisokwele bakimbi: I bika bikamwena’mo bashabana shi abashimatyija nkulupilo yabo? Kishinte Fathers’ Religious Involvement and Early Childhood Behavior (Mwingilo wa Mbutwile Padi Mwana Mutyetye mu Myanda Itala Kipwilo), kyalupwilwe mu 2009, kinena’mba: “Kwielela mu myanda ya kipwilo kukokeja kukwasha bantu bekale bashabana balumbuluke. Kipwilo kipanga bantu  bintu bya kwibakwatakanya ne kuludika pamo ne bya kufundija kadi ne misoñanya ya mwa kwikadila mu būmi.”

Bible ukomeneja mpata mvubu ya mwingilo wa mbutwile wa kutamija ne kufundija bana. (Nkindi 4:1; Kolose 3:21; Bahebelu 12:9) Ino le ano madingi adi na mvubu dyalelo? Inivelesite ya Florida yalupwile mu 2009 kishinte kilombola lupusa ludi na bambutwile pa babo bana. Bakimbi balombwele amba bana balelelwe na bambutwile bepāne mu mwingilo wabo padi bana, badi batama ke bantu ba lusa kadi belēmeke. Ke bavulepo badi balongakana, kadi bana bana-bakaji nabo badi batama divule na ñeni biyampe. Bine, madingi a Bible akidi na mvubu.

Le Mwingilo wa Inabana Udi na Mvubu’ka?

Bifundija Bible: “Kokazobololapo lufundijo lwa inobe.”—Nkindi 1:8.

Bisokwele bakimbi: Dibuku Handbook of Child Psychology disambila pa ñeni ya bana, dyanene mu 2006 amba: “Bainabana bashikatanga na babo bana kitatyi kilampe kupita’ko bashabana, besamba mpala na mpala na babo bana, kadi kuno kwishila kwendanga kuvudila’ko mu matanda palapala.” Binenwa, bilongwa ne ngikadila ya bainabana ishalanga mpata mu būmi bwa bana, pa mwanda wa kitatyi kikatampe kyobapityija nabo.

Shi batata ne lolo bengidile pamo mwanda wa kufundija babo bana bubinebine butala padi Leza, nabya bakashila bana byabuntu bibidi bilēme mpata. Kibajinji, bana bakamona mukenga wa kupwana na Shabo wa mūlu, kipwano kyobakamwena’mo mu būmi bwabo bonso. Kya bubidi, bana bakefunda muswelo ufwaninwe kwingidila pamo ba mulume ne mukaji mwanda wa kufikila pa bitungo bya mvubu mpata. (Kolose 3:18-20) Nansha shi bakwabo babwanya kukwasha’ko ba tata ne lolo, inoko bambutwile bo badi na kiselwa kya kufundija babo bana myanda ya Leza ne būmi bwa kisaka busaka Leza.

Le kadi i muswelo’ka ukafundija bambutwile babo bana? Le i mufundijijo’ka wendekanga senene?