Fwenai Kudi Leza

“Abe Yehova, . . . Ubangyūkidija”

“KUYUKA amba i kutupu muntu ukutele mutyima ne kukwivwana i kiselwa kilēma kipityile byonso.” * Le nobe ubwanya kwitabija bino binenwa? Le kodi mwimone bu i kutupu muntu ukutele mutyima nansha kwimvwana ngikadilo yodi’mo, wemona bu udi bunka? Shi i amo, nabya ukokeja kusengwa pa kuyuka’mba: Yehova utele batōtyi bandi mutyima, uyukile byonso bibatana mu būmi bwabo difuku ne difuku. Binenwa bya Davida bidi mu Mitōto 139 bibingija uno mwanda.

Davida pa kukulupila’mba Leza umutele mutyima, wanena’mba: “Abe Yehova, ubamandaula ubangyūkidija.” (Vese 1) Davida waingidija pano muneneno mulumbuluke. Kyubwa kya Kihebelu kyalamwinwe bu “ubamandaula” kifunkila pa kukola kyabulēme (Yoba 28:3), kubela ntanda (Batyibi 18:2), nansha kukimbidila bubinebine ne kujija (Kupituluka 13:14). Bine, Yehova wituyukile biyampe enka na aye ubandawile mwanda ne mwanda wa mu būmi bwetu. Davida pa kwitela aye mwine amba “ubamandaula,” wetufundija amba Leza utanga mutyima mwingidi wandi umo ne umo. Wibabandaula ne kuyukidija umo ne umo.

Davida walombola mubaile buyuki bwituyukile Leza amba: “Uyūkile mushikatyilo wami ne kutaluka kwami, uyūkile kufwatakanya kwami abe kulampe.” (Vese 2) Mungya buluji, Yehova udi “kulampe,” momwa mūlu. Eyo, uyukile kitatyi kyotushikata, padi kyolwa, kitatyi kyotulanguka lubanga ne kitatyi kyotwenda ku mingilo ya bukile bukya. Kadi uyukile milangwe yetu, byotwabila ne byotusaka. Lelo Davida wāimvwene moyo pa kubandaulwa na Leza namino? Mhm, ino wāsangedile’ko. (Vese 23, 24) Mwanda waka namino?

Davida uyukile amba Yehova ubandaulanga biyampe bidi mu batōtyi bandi. Davida watelelela uno mubandawilo pa kusoneka amba: “Usokolanga dishinda dyami ne kulāla kwami, kadi uyūkidije mashinda ami onso.” (Vese 3) Difuku ne difuku Yehova utalanga ‘mashinda etu onso’—bilubo byetu ne biyampe bine byotulonga. Lelo wimaninanga pa bilubo’ni nansha pa biyampe? Kishima kya Kihebelu kyalamwinwe bu “usokolanga” kikokeja kushintulula “kunyunga” nansha “kupepa,” pamo bwa kidimye upepa mfumba yampikwa mvubu na lubenji mwanda wa kushiya nze miyampe. Kishima “uyūkidije” kitambile ku kishima kya Kihebelu kishintulula “kusanswa.” Yehova pabandaula byobya binena bengidi bandi ne byobalonga, usenswe byobya biyampe. Mwanda waka? Usenswe bukomo bobalonga mwanda wa kumusangaja.

Mitōto 139 witufundija amba Yehova utele mpata mutyima batōtyi bandi. Ukimbanga bidi mobadi kadi utala monso mobendela difuku ne difuku. Mu uno muswelo, uyukile makambakano obekonda nao, wimvwana misanshi ya mu ñeni ne mu mutyima ikokeja kulupuka ku ano makambakano. Lelo mutyima wenu wimutonona kutōta Leza udi namino utele bantu mutyima? Shi i amo, nabya kulupilai amba: Yehova ke Lezapo “wakuvulaminwa mīngilo yenu ne lusa lwenu lo mwalombwele pa dijina dyandi.”—Bahebelu 6:10.

[Kunshi kwa dyani]