Kulupila Mudi Yehova, “Leza wa Kanye ka Kusenga Konso”
Kulupila Mudi Yehova, “Leza wa Kanye ka Kusenga Konso”
“Atotwe ne kutotwa Leza Shandya Mfumwetu Yesu Kidishitu, Shandya byalusa, Leza wa kanye ka kusenga konso.”—2 KOD. 1:3.
1. Le bakulu ne banuke basakanga bika?
TAMBA pa kubutulwa kwetu, tusakanga kusengibwa. Mwana wa lukeke udilanga mwanda wa kulombola amba usaka kusengibwa. Padi usaka bamupape nansha padi waimvwana nzala. Divule dine nansha shi tubakule, tusakanga kusengwa. Nakampata kitatyi kyotutanwa na makambakano.
2. Lelo Yehova ukulupija namani amba ukasenga boba bamukulupile?
2 Divule dine babutule ne balunda bakokeja kwitusenga mu muswelo kampanda. Inoko kyaba kikwabo, bikoleja bimo bituletelanga njia keikokejapo kupwijibwa na muntu. Enka Leza kete ye ubwanya kwitusenga nansha shi tubatanwa mu ngikadilo ya muswelo’ka. Kinenwa kya Leza kitukulupija amba: “Yehova udi pa bwipi na boba bonso bamwitanga, . . . kadi ukēvwananga lwito lwabo.” (Mit. 145:18, 19) Bine, “Meso a Yehova adi pa boloke, kadi matwi andi nao i majikuke ku lwito lwabo.” (Mit. 34:15) Tufwaninwe kukulupila mudi Leza pa kutambula bukwashi ne busengi bwandi. Davida, kaimba wa mitōto wālombwele patōka uno mwanda pa kwimba’mba: “Yehova ukēkalanga mpakala ya bakumweshibwa malwa. I mpakala ya mu myaka ya kususuka; ino boba bakuyūkile dijina dyobe bakakukulupilanga; ke-wi-muntu, abe Yehova, kwebēlelepo bakukukimba, mhm.”—Mit. 9:9, 10.
3. Lelo Yesu wāelekeje namani buswe bwa Yehova ku bantu bandi?
3 Batōtyi ba Yehova i balēme kwadi. Yesu wālombwele’kyo pa kunena’mba: “Lelo toni tutano ketupotwepo ne tumalungo tubidi? Ino nansha kamo kāto kākuvulaminibwa ku meso a Leza, mhm. Nanshi ne nywene ya ku mitwe yenu nayo ibabalwa yonso, penepo ino kemukikala kukwatwa moyo, mwanda mukidile toni tungi buleme.” (Luka 12:6, 7) Yehova wāsapwidile bantu bandi ba pa kala kupityila kudi mupolofeto Yelemia amba: “Eyo, ne kusanswa ne buswe bwa nyeke ne nyeke-ke; po pa mwanda o nakukoka ne kanye ka lusa.”—Yel. 31:3.
4. Mwanda waka tukokeja kukulupila milao ya Yehova?
4 Kukulupila mudi Yehova ne mu kufikidila kwa milao yandi kukokeja kwitusenga kitatyi kyotudi mu byamalwa. Tukokeja kukulupila mudi Leza na mwāmukulupidile Yoshua, wānene amba: “Nansha kintu kimo kine kyabulwa ku byonso bintu bilumbuluke byesambile Yehova Leza wenu pa mwanda wenu, mhm; byonsololo’tu byemufikidile, kadi nansha kimo kine kya byobya kyabudilwepo, mhm.” (Yos. 23:14) Kadi, tubwanya kukulupila amba nansha shi kyaba kimo tubatyumukwa mutyima na ngikadilo kampanda, “Leza i wabinebine,” ne kadi kakelapo bengidi bandi ba kikōkeji.—Tanga 1 Kodinda 10:13.
5. Le i muswelo’ka netu otubwanya kusenga bakwabo?
5 Mutumibwa Polo i mutele Yehova bu “Leza wa kanye ka kusenga konso.” “Kusenga” kushintulula kutalaja muntu udi na njia nansha udila. Muntu ukokeja kutalaja mukwabo na kupēleja’ko masusu nansha njia yandi ne kumusenga. Yemulongelanga ne Yehova. (Tanga 2 Kodinda 1:3, 4.) I kutupu kintu nansha muntu ubwanya kukankaja Tata wetu wa mūlu, kadi usakanga kulonga byonso byasaka mwanda wa kusenga boba bamusenswe. Batwe netu, tubwanya kusenga banabetu betabije “mu byamalwa byonso” bibatana. Tukokeja kwibasenga “ponka pa kanye ka kwitusenga ko twasengibwa bātwe bene kudi Leza.” Bine kuno shako ko kutendela bukomo kebudingakanibwa budi na Yehova bwa kusenga boba batyumukwe mityima!
Kulwa na Bine Bilengeja Njia
6. Tela’ko bintu bimo bilengejanga njia.
6 Tusakanga kusengibwa mu miswelo yonso ya būmi. Mwanda umo mukatampe uletanga njia i kujimija muntu otusenswe, nakampata mwinē petu nansha mwana. Kadi muntu obasañuna ne obafwatakenya ukokeja nandi kusakilwa busengi. Misongo, bununu, bulanda, bikoleja bya mu busongi, nansha ngikadilo imbi ya ntanda bibwanya kulengeja muntu akimbe kusengibwa.
7. (a) Lelo i busengi’ka botusakilwa potudi mu ngikadilo mikomo? (b) Lelo Yehova undapanga namani mutyima “mutyumuke ne munekenibwe”?
7 Mu bitatyi bya byamalwa, tusakanga busengi bwa kwitutalaja mutyima, ñeni, milangwe, ne misanshi ya ku ngitu ne ku mushipiditu. Kimfwa, tala mutyima. Kinenwa kya Leza kinena’mba mutyima wetu ukokeja kwikala “mutyumuke ne munekenibwe.” (Mit. 51:17) Na bubine Yehova ubwanya kwitukwasha mu ino ngikadilo, mwanda “undapanga ba mityima mifwe, ne kwibakuta pa byaso byabo.” (Mit. 147:3) Nansha ke mu ngikadilo mikomo namani, Leza ukokeja kwitupa busengi bwa kutalaja mutyima shi tumulombe na lwitabijo ne kulama bijila byandi.—Tanga 1 Yoano 3:19-22; 5:14, 15.
8. Yehova witukwashanga namani kitatyi kyotudi na njia ya mu ñeni?
8 Divule ñeni yetu isakilwa busengi mwanda matompo meshileshile akokeja kwiipa njia. Ketubwanyapo kunekenya matompo a lwitabijo na bukomo bwa batwe bene. Inoko, kaimba wa mitōto wāimbile amba: “Mu bungi bwa mifwatakanyo munda mwami kusengibwa kobe kubantōkeja ku mutyima wami, tō!” (Mit. 94:19) Kadi, Polo wālembele amba: “Kemukizumbazumba, nansha pamo pene; ino mu byonso byo musaka muyūkije’byo kudi Leza monka mu kulombela, ne mu kumwisashilapo, ne kumufwija ponka. Ino ndoe ya Leza, ya kutabuka ñeni yonso, īkalama mityima yenu, ne kufwatakanya kwenu kwine kumo mudi Kidishitu Yesu.” (Fid. 4:6, 7) Kutanga ne kulangulukila pa Bisonekwa kuketukwasha mpata kitatyi kyotwikonda na njia ya mu ñeni.—2 Tem. 3:15-17.
9. I muswelo’ka otubwanya kunekenya njia ya mu milangwe?
9 Kyaba kimokimo, tukokeja kutyumukwa mutyima byotubwanya ne kuponena mu kyaka kya kwikala nyeke na milangwe mifwe. Padi twimonanga bu ketubwanyapo kwingila mingilo kampanda nansha madyese kabidye a mu Bisonekwa. Pano napo, Yehova ubwanya kwitusenga ne kwitukwasha. Tulete kimfwa: Kitatyi kyātongelwe Yoshua mwanda wa kutangidila Bene Isalela mu bulwi bwa na mizo mikomo ya balwana, Mosesa wālombwele muzo wa Isalela’mba: “Wikomeje mutyima wikale mwimanije biyampe, kokityinapo nansha kutuyuka kwine ko badi, mhm; mwanda Yehova Leza obe, i aye enka wenda nobe kakakushiepo, nansha kukulekelela kwine mpika.” (Kup. 31:6) Na bukwashi bwa Yehova, Yoshua wābwenye kwendeja bantu ba Leza mu Ntanda ya Mulao ne kunekenya balwana nabo bonso. Mafuku kunyuma, Mosesa wēmwenine bukwashi bwa Leza pa Kalunga Katyila.—Div. 14:13, 14, 29-31.
10. Shi tubabela pa mwanda wa njia, i bukwashi’ka botubwanya kutambula?
10 Myanda ileta njia ikokeja kwitubeleka ku ngitu. Shako, kudya biyampe, kutūja ne kwitamuna bidyoma ne bukundwe bikokeja kwitukwasha. Bukomo bwa ku mushipiditu butamba ku kumona bintu mungya Bible kukokeja kwitulama ku ngitu. Nanshi, shi tubatanwa na bikoleja kabidye, tuvulukei myanda yēmwenine Polo ne binenwa byandi bikankamika bya amba: “Tubakalakanyibwa ku mitamba yonso, ino kujikilwa mpika; kadi, tubakolelwa, ino kufudilwa mpika; tubapangwapangwa, kadi ino kulekelelwa mpika; tubakupilwa panshi, ino koneka mpika.”—2 Kod. 4:8, 9.
11. I muswelo’ka otukondapa misongo ya ku mushipiditu?
11 Matompo amo akokeja kona būmi bwetu bwa ku mushipiditu. Pano napo, Yehova ubwanya kwitunyongolola. Kinenwa kyandi kitukulupija amba: “Yehova ukwatyijanga bonso bapona, kadi ubandulanga bonso babandamine panshi.” (Mit. 145:14) Pa kumona muswelo wa kundapa misongo ya ku mushipiditu, i biyampe kukimba bukwashi bwa bakulumpe Bene Kidishitu. (Yak. 5:14, 15) Kadi kulama nyeke mu ñeni lukulupilo lwa mu Bisonekwa lwa būmi bwa nyeke kuketukwasha kitatyi kitompwa lwitabijo lwetu.—Yoa. 17:3.
Bimfwa bya Bantu Bāsengelwe na Leza
12. Nshintulula Yehova mwaāsengele Abalahama.
12 Mulembi umo wa mitōto wānene ku bukomo bwa mushipiditu sandu amba: “Vuluka mwanda obe kudi umpika obe, mwanda abe [Yehova] ubankulapija’o. Kīne kino’ki kyo kinsenga ami mu malwa ami, ke-kintu kinenwa kyobe kibampumputumuna.” (Mit. 119:49, 50) Dyalelo, tudi na Kinenwa kya Yehova kisonekelwe, kidi na bimfwa bya bantu bāsengelwe na Leza. Kimfwa, Abalahama ye uno wādi na njia kitatyi kyāivwene amba Yehova usa konakanya Sodoma ne Ngomola. Uno mukulutuba wa kikōkeji wāipangula Leza amba: “Lelo uloteja boloke ne babi pamo’ni?” Yehova wāsengele Abalahama na kumukulupija’mba kakalotejapo Sodoma shi atane’mo boloke nansha’tu 50. Abalahama wāipangula Yehova misunsa mikwabo itano mituntulu amba: Le shi mwikale enka boloke 45? 40? 30? 20? 10? Yehova wākulupije Abalahama na kitūkijetyima ne kanye ku kipangujo ne kipangujo amba kakakubijapo Sodoma. Nansha byokemwādipo boloke bafika pa dikumi mu bino bibundi, Yehova wālamine Lota ne bana bandi bana-bakaji.—Ngal. 18:22-32; 19:15, 16, 26.
13. Lelo Hana wālombwele namani amba wādi ukulupile mudi Yehova?
13 Hana mukaja Elekana wādi wabila mpata kubutula mwana. Ino wādi ñumba, ne uno mwanda wāmuletele njia. Wālombele Yehova pa ano makambakano, kadi Edi Kitobo Mukatampe wāmunena’mba: “Leza wa Isalela akupe kilombwa kyobe.” Kino kyāsengele Hana bininge, “ne kilungi kyandi kufitwa monka mpikila.” (1 Sam. 1:8, 17, 18) Hana wākulupile mudi Yehova, wāmutūdila myanda mu makasa andi. Nansha Hana byakādipo uyukile mobikekadila, ino wēmwenine ndoe ya mu mutyima. Mwenda mafuku, Yehova wālondolola milombelo yandi. Wāimita ne kubutula mwana mwana-mulume ne kumwinika dya bu Samwele.—1 Sam. 1:20.
14. Mwanda waka Davida wādi usakilwa kusengwa, ne wālombele ani?
14 Mulopwe Davida wa mu Isalela wa kala i kimfwa kikwabo kya muntu wāsengelwe na Leza. Yehova “ubandilanga pa mutyima,” o mwanda kitatyi kyaātongele Davida akekale bu mulopwe wa Isalela, wāmwene amba Davida i wa binebine ne mwipāne ku butōtyi bwa bine. (1 Sam. 16:7; 2 Sam. 5:10) Inoko mwenda mafuku, Davida wālongele makoji na Bafesheba ne kutompa kufya bubi bwandi na kwipaija mulumyandi. Davida pa kuyuka bukatampe bwa bubi bwandi, wālomba Yehova amba: “Bamfwileko lusa, abe Leza, monka mwikadile kanye ka lusa lobe; monka mwikadile mulwi wa bya lusalusa lobe lwa kikōkeji jimañanye kujilula kwami. Ngoije senene, shē, ku bubi bwami, kadi untōkeje ku bupya-mambo bwami. Ke-ne-muntu ami naitabija kujilula kwami, kadi bupya-mambo bwami budi nyeke mu kifuko kyami.” (Mit. 51:1-3) Davida wēsāshile bya binebine, ne Yehova wāmulekela. Inoko, Davida wādi wa kwimwena bipa bilula byālupukile ku bilongwa byandi bibi. (2 Sam. 12:9-12) Nansha nabya, lusa lwa Yehova lwāikele bu nsulo ya busengi kudi uno mwingidi wandi mwityepeje.
15. Lelo Yehova wākweshe namani Yesu paādi’tu kubwipi na kufwa?
15 Yesu paādi pano pa ntanda, wātenwe na matompo mavule. Leza wālekele ano matompo a lwitabijo amufikile, kadi Yesu nandi wālamine bululame bwandi pamo bwa muntu mubwaninine ukulupile nyeke mudi Yehova ne kukwatakanya bubikadi Bwandi. Yesu paādi kubwipi na kwabwa ne kwipaibwa, wālombele Yehova amba: “Kemuswidile mutyima wami mhm poso muswidile mutyima obe muyūkanike.” Penepo Mwikeulu wāmumwekela Yesu ne kumukankamika. (Luka 22:42, 43) Leza wāsengele Yesu, wāmukomeja, ne kumukwatakanya mu kino kitatyi.
16. Lelo i bika bibwanya kulonga Leza shi tubatanwa na njia ya kulwa na lufu pa mwanda wa bululame bwetu?
16 Nansha shi bitusakila kufwa pa mwanda wa mwimanino wetu wa Bwine Kidishitu, Yehova ubwanya ne uketukwasha tulame bululame bwetu kwadi. Kadi, tusengibwanga na lukulupilo lwa lusangukilo. Bine, tukungile na melu difuku dikafundulwa’ko lufu, mwine wanshikani wafulako “kukavutakanibwa.” (1 Kod. 15:26) Bengidi ba Leza bafwile ne bakwabo badi mu luté lukomo lwa Yehova bakasangulwa. (Yoa. 5:28, 29; Bil. 24:15) Kukulupila mu mulao wa Yehova wa lusangukilo kwituseñanga ne kwitukomeja mu bitatyi bya kupangwapangwa.
17. Lelo Yehova wituseñanga namani kitatyi kifwa muntu otusenswe?
17 Bine, tuseñwanga pa kuyuka amba bakena betu balēle mu lufu badi na lukulupilo lwa kwikala monka na būmi mu ntanda impya ya kutendelwa mwampikwa bintu byonso bituletela njia dyalelo! Kadi “kibumbo kikatampe” kya bengidi ba Yehova bakampanda ku mfulo ya ino ngikadilo imbi ya bintu kikekala na dyese dikatampe dya kutundaila ne kufundija boba bakasangukila ku būmi pano pa ntanda.—Kus. 7:9, 10.
Munshi’mwa Mudi Maboko a Leza a Nyeke
18, 19. Lelo bengidi ba Leza badi basengwa namani mu kupangwapangwa kwabo?
18 Mosesa wākulupije bantu ba Isalela na binenwa bya bukomo mu lwimbo lukunka mutyima amba: “Leza wa nyeke ne nyeke-ke aye i kikalo kyobe, ino munshi’mwa mudi maboko a nyeke ne nyeke-ke.” (Kup. 33:27) Mupolofeto Samwele wānene Bene Isalela mwenda mafuku amba: “Kemukisasukapo kulonda Yehova, ino mwingidilei Yehova ne mutyima wenu onsololo. . . . Ke-muntu Yehova kakazobololapo bandi bantu mwanda wa dijina dyandi dikatakata.” (1 Sam. 12:20-22) Shi tulamatyidile pototo ku butōtyi bwa bine bwa Yehova, nandi kaketwelapo nansha dimo. Uketupa nyeke bukwashi botusakilwa.
19 Leza kakakomenwapo kupa bantu bandi bukwashi bobasakilwa ne busengi mu ano mafuku mabi a mfulo. Pano ke myaka mivule, banabetu bangi bapangwapañwanga ne kukutwa mu ino ntanda mwanda wa kwingidila kobengidila Yehova. Myanda mimweke ilombola’mba, binebine Yehova useñanga bengidi bandi mu bino bitatyi bya matompo. Kimfwa, tutu umo wa mu Inio Sovietike wa kala wakutyilwe mu bula bwa myaka 23 pa mwanda wa lwitabijo. Nansha nankyo, wamwene muswelo wa kutambula bidibwa bya ku mushipiditu amba bimukankamike ne kumusenga. Wanene amba: “Umbula bwa ino myaka yonso, nefundile kukulupila mudi Yehova kadi nandi wankomeje.”—Tanga 1 Petelo 5:6, 7.
20. Mwanda waka tukokeja kukulupila amba Yehova kaketwelapo?
20 Nansha shi tukatanwe na bika, i biyampe tukavuluke nyeke binenwa bya busengi bya mulembi wa mitōto bya amba: “Ke-muntu Yehova kakēlapo bantu bandi.” (Mit. 94:14) Nansha shi tukimbanga kusengibwa, tuyukei amba netu tudi na dyese dikatampe dya kusenga bakwabo. Enka na motusa kwikimwena mu kishinte kilonda’ko, netu tubwanya kusenga boba badila mu ino ntanda ya tuvutakanya.
Usa Kulondolola Namani?
• Tela bintu bibwanya kwituletela njia?
• Yehova useñanga bengidi bandi muswelo’ka?
• Kitatyi kyotulwa na myanda ya lufu, i bika bibwanya kwitusenga?
[Bipangujo bya Kifundwa]
[Kapango/Bifwatulo pa paje 23]
Mwa Kulwila Na Myanda Ikokeja Kutenga . . .
▪ mutyima wetu Mit. 147:3; 1 Yoa. 3:19-22; 5:14, 15
▪ ñeni yetu Mit. 94:19; Fid. 4:6, 7
▪ milangwe yetu Div. 14:13, 14; Kup. 31:6
▪ ngitu yetu 2 Kod. 4:8, 9
▪ būmi bwetu bwa ku mushipiditu Mit. 145:14; Yak. 5:14, 15
