“Kusenga Bonsololo Badila”

“Yehova wanshingile māni . . . kusenga bonsololo badila.”—IS. 61:1, 2.

1. I bika byālongēle Yesu boba badila, ne mwanda waka?

 YESU KIDISHITU wānene amba: “Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.” (Yoa. 4:34) Yesu pa kuvuija mwingilo wāmupele Leza, wālombwele patōka ngikadilo ya Shandi ya kutendelwa. Mu ino ngikadilo, mubadilwa ne buswe bukatampe bwa Leza bwasenswe bantu. (1 Yoa. 4:7-10) Mutumibwa Polo wēsambile pa kilomboji kimo kya buno buswe paānene bitala padi Yehova amba i “Leza wa kanye ka kusenga konso.” (2 Kod. 1:3) Yesu wālombwele buno buswe kitatyi kyaālongele byobya byālailwe mu bupolofeto bwa Isaya. (Tanga Isaya 61:1, 2.) Yesu wātangile buno bupolofeto mu Shinakoka ya mu Nazala, kadi wānena’mba bino binenwa bibafikidila padi aye mwine. (Luka 4:16-21) Mu mwingilo wandi onso, Yesu wāsengele na buswe boba bonso badila, wēbakankamika ne kwibapa ndoe ya mutyima.

2, 3. Mwanda waka balondi ba Kidishitu bafwaninwe kumwiula mu kusenga bakwabo?

² Balondi bonso ba Yesu bafwaninwe kumwiula mwanda wa kusenga boba badila. (1 Kod. 11:1) Polo wānene amba: “Mwikankamikei bānwe bene na bene, ne kwitamija bānwe bene.” (1 Tes. 5:11) Nakampata, tufwaninwe kusenga bakwetu mwanda pano muzo wa  muntu udi mu “myaka ya malwa.” (2 Tem. 3:1) Divule dine, bantu ba mityima myoloke kujokoloka ntanda yonso, balwanga na binenwa ne bilongwa bibaletela njia, bibasanshija mutyima ne bibaletela bulanda.

³ Monka mulaidile’kyo bupolofeto bwa mu Bible, bantu bavule mu ano mafuku a mfulo ya ino ngikadilo imbi ya bintu i besanswe “abo bene, ne bupeta kumo, ne ba bikandangobo, ne bakapuni ka kwitatula, ne babutukani, ne bampikwa kukōkela bakwibabutula, ne kufwija kwine mpika, ne bampikwa bu-ujila, ne bampikwa lusa lwa bu-butule, ne bakubulwa kanye kulekela bakwabo myanda, ne babepabepa bubela, ne bakubulwa kwifula, ne ba bukalabale bwa malwa, ne bampikwa kusanswa būmuntu. Ne banzazangi, ne ba lupata lubilubi, ne bakwitatula; bakusanswa byamazua pakatampe kudi Leza mpika.” Ino ngikadilo pano i babipila’ko mwanda ‘babi, ne banzazangi, abavula ne kuvula ku kubipa.’—2 Tem. 3:2-4, 13.

4. Lelo ngikadilo ya ntanda mu ano mafuku ke idi namani?

⁴ Bino byonso kebifwaninwepo kwitutulumuna, mwanda Kinenwa kya Leza i kilombole patōka’mba: “panopantanda ponsololo pēne palēle mudi yewa umbi.” (1 Yoa. 5:19) Mu kishima “panopantanda ponsololo” mubadilwa bantu ba politike, ba bipwilo, ne bansunga, ne ba ku bisanji bya mīsambo. Ne kutatana kwine mpika, Satana Dyabola i mufwaninwe kutelwa bu “mwine panopantanda” ne bu “Leza wa panopantanda.” (Yoa. 14:30; 2 Kod. 4:4) Ngikadilo idi’mo ntanda dyalelo yendanga ibipila’ko mwanda Satana i mukalabale, pa kuyuka’mba kubamushadila’tu kakitatyi katyutyutyutyu kumeso kwa Yehova kumonakanya. (Kus. 12:12) Bine, kuyuka’mba Yehova ulekele Satana ne ngikadilo ya bintu imbi mu kitatyi’tu kityetye ne amba panopano ponka, mwanda wākolomwene Satana’wa utala pa bubikadi bwa Yehova usa kupwa, kwituseñanga bininge!—Ngal., shap. 3; Yoba, shap. 2.

Myanda Miyampe Isapulwanga Ntanda Yonso

5. Lelo bupolofeto butala pa mwingilo wa kusapula bufikidilanga namani mu ano mafuku a mfulo?

⁵ Kudi binenwa byānene Yesu bifikidila mu kino kitatyi kya makambakano mu mānga ya muntu. Wānene amba: “Kadi īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.” (Mat. 24:14) Uno mwingilo wa kupāna bukamoni bwa Bulopwe bwa Leza ntanda yonso wingilwanga mu kipindi kikatampe kya ntanda. Dyalelo, Batumoni ba Yehova 7500000 ne kupita badi mu bipwilo 107000 ne kupita kujokoloka ntanda yonso, basapulanga Bulopwe bwa Leza pamo na mwāsapwidile’bo Yesu bu mutwe wa mwanda wa busapudi ne bufundiji  bwandi. (Mat. 4:17) Bantu bavule badila i basengwe bininge kupityila ku mwingilo wa busapudi wingilwa dyalelo. Abe mwine tala, mu myaka’tu ibidi ishele’i, bantu 570601 babatyijibwe ke Batumoni ba Yehova!

6. Le ulanga namani pa bukatampe bwa mwingilo wa busapudi?

⁶ Ukamona’mba bukatampe bwa mwingilo wa busapudi i bumweke mu kulupulwa ne kwabanibwa kwa mabuku esambila pa Bible mu ndimi kupita pa 500 na Batumoni ba Yehova. Kino kashā, kekyamwekele mu mānga yonso ya muntu! Kwikala’ko kwa kipindi kya pano panshi kya bulongolodi bwa Yehova ne muswelo okingila ne kutandabuka i kintu kitulumukwa. Kino kekyadipo kya kubwanika mu ino ntanda yendejibwa na Satana, shi kekwadipo bwendeji ne bukwashi bwa bukomo bwa mushipiditu sandu wa Leza. Myanda miyampe byoisapulwa pano pa ntanda ponso, o mwanda busengi bwa mu Bisonekwa bumwenwanga’mo na banabetu mu lwitabijo ne na boba bonso badila ino betabija uno musapu wa Bulopwe.

Kukankamika Banabetu

7. (a) Mwanda waka ketukasakepo amba Yehova atalule dyalelo ngikadilo yonso ileta njia? (b) Le tubayuka namani amba tubwanya kūminina kupangwapangwa ne byamalwa?

⁷ Mu ino ntanda miyule bunonga-bibi ne masusu, tukekala tutanwa na ngikadilo imoimo ileta njia. Ketukasakepo amba Leza apwe dyalelo bintu byonso bileta makambakano ne njia, mwanda abyo bikapwa enka pakonakanya Leza ino ngikadilo ya bintu. Pano’ko bidi, byotutanwa na kupangwapangwa kwālailwe, bululame bwetu batwe bakwatakenye bubikadi bwa Yehova bwa diulu ne ntanda, bulwibwanga. (2 Tem. 3:12) Inoko, na bukwashi ne busengi bwa Tata wetu wa mūlu, tukokeja kwikala pamo bwa Bene Kidishitu bashingwe māni ba mu Tesalonika wa kala bātenwe na kupangwapangwa ne byamalwa, ino bāūminina ne kulama lwitabijo.—Tanga 2 Tesalonika 1:3-5.

8. Lelo i bukamoni’ka bwa mu Bisonekwa bulombola amba Yehova useñanga bengidi bandi?

⁸ Nanshi ke kya kutulumukapo shi Yehova upanga bengidi bandi busengi bobasakilwa. Kimfwa, būmi bwa mupolofeto Ediya pobwālondelwelondelwe na Yezebele, Mulopwe-mukaji wādi mubi, uno mupolofeto wājimije bukankamane, wānyema kakimbe ne lufu. Ino Yehova pa kyaba kya kutopeka Ediya, wāmusengele ne kumukankamika endelele na mwingilo wandi wa bu mupolofeto. (1 Bal. 19:1-21) Kadi busengi buseñanga Yehova bantu bandi bwāmwekele ne mu kipwilo kya Bene Kidishitu ba mu myaka katwa kabajinji. Kimfwa, tutanga amba kitatyi kimo “bipwilo ke yonka ndoe, ne monso mu Yudea, ne mu Ngadilea, ne mu Samadia mwine, ke benda bakankamana ku mutyima.” Kadi, ke benda “bananga monka mu kutyina Yehova, ne monka mu bunsenga-mukwashi bwa Mushipiditu Sandu, ne kuvula nako ke benda bavula.” (Bil. 9:31) Netu tudi na nsangaji pa “bunsenga-mukwashi bwa Mushipiditu Sandu” botutambula!

9. Mwanda waka kuboila manwa kudi Yesu kwituseñanga?

⁹ Batwe Bene Kidishitu, tuseñwanga pa kuboila manwa kudi Yesu Kidishitu ne kunangila mu matabula andi. Yesu wānene amba: “Iyai kwami bānwe bonso bakuputuma na mīngilo, ne bakulemenwa, nabya nami nkemutukija’byo biyampe. Twela mu lupungu lwami lwa bu-umpika, muboīle manwa kudi ami, ke-ne-muntu amiwa ne wakukōkela, kadi ngidi ne bumvu pa mutyima, ebiya nabya mukamonanga mityima mitūke biyampe. Mwanda lupungu lwami lwa bu-umpika ludipo biyampe ne kiselwa kyami nakyo kyonka kipela.” (Mat. 11:28-30) Kuboila manwa kudi Yesu a muswelo ukankamika waādi ushikete na bantu ne kulonda kimfwa kyandi kiyampe bine kwituseñanga bininge potulwa na njia.

10, 11. Lelo i bāni babwanya kukankamika bakwabo mu kipwilo?

¹⁰ Tukokeja kadi kusengibwa na banabetu Bene Kidishitu. Kimfwa, tala bakulumpe mobakwashishanga boba badi mu bikoleja pa  kipwilo. Mwanā bwanga Yakoba wāsonekele amba: “Lelo kudi umo ubela umbukata mwenu’ni [ku mushipiditu]? Nabya bēte bakulumpe ba kipwilo; nabo bamulombelele.” Ebiya ke namani? “Lulombelo lwa kwitabija lukamupandija ubela, ne Mfumwetu ukamulangula; nansha wapīle mambo akamulekelwa.” (Yak. 5:14, 15) Bakwabo mu kipwilo bakokeja nabo kwitusenga.

¹¹ Bana-bakaji bapēlelwanga divule kusapwila bana-bakaji bakwabo twanda twishileshile. Nakampata bakaka banunu ne ba bwino bapanga bakaka bankasampe madingi mavule kadi mayampe. Bano balolo, Bene Kidishitu batame mu ñeni bakokeja padi ke bapwe kala kupita mu ino ngikadilo. Lusa lwabo ne kinyenye kya bulolo bikwashanga mpata. (Tanga Tetusa 2:3-5.) Shako bakulumpe ne bakwabo bakokeja ne bafwaninwe “[kukankamika boba] bampungiji ya ku mutyima” badi umbukata mwetu. (1 Tes. 5:14, 15) Kadi i biyampe kulama mu ñeni amba Leza ye “wakwitusenga mu byamalwa byetu byonso, mwanda wa kunena’mba, tumone mwakwibasengela netu boba badi mu byamalwa, shi bika, shi bika.”—2 Kod. 1:4.

12. Mwanda waka i biyampe kutanwa ku kupwila?

¹² Muswelo muyampe wa kusengwa i kutanwa ku kupwila, kwine kupitanga mīsambo ikankamika ya mu Bible. Tutanga amba ba Yudasa ne Shilasa bādi “bebafundija bāna babo myanda mivule mīne, bebakankamikila monka.” (Bil. 15:32) Kumeso kwa kupwila ne pa kutamba, bana na bana mu kipwilo bekalanga bekankamika mu mīsambo. O mwanda nansha shi tubatanwa na ngikadilo ya masusu, ketwakitolwelai, mwanda nabya kekudipo bikendeka. (Nk. 18:1) Ino, bikekala biyampe kulonda madingi a mutumibwa Polo a ku bukomo bwa mushipiditu sandu a amba: “Kadi twitei mityima bātwe bene na bene ya pa kwisombela ku lusa ne mīngilo miyampe; ne kuleka’byo kubungakana mpika, pamo na muswelo wa bamobamo, poso kwikwasha bātwe bene; ne byo mwamona difuku dibafwena po pene pa kuningija.”—Bah. 10:24, 25.

Tana Busengi mu Kinenwa kya Leza

13, 14. Lombola mukokeja kwitusengela Bisonekwa.

¹³ Twikale Bene Kidishitu babatyijibwe nansha bakishilula kwifunda myanda ya Leza ne mpango yandi, tubwanya kutana busengi mu Kinenwa kya Leza kisonekelwe. Polo wālembele amba: “Ke-bintu byonsololo byasonekelwe kala byasonekelwe mwanda wa kwitufundija’mba, pa kutūkija mutyima, ne pa kusengibwa na bisonekwa, twikale ne kukulupila.” (Loma 15:4) Bisonekwa Bijila bibwanya kwitusenga ne kwitulengeja twikale babwanye “byonso, ne kulongololwa biyampe senene, shē, mu mīngilo yonso milumbuluke.” (2 Tem. 3:16, 17) Kuyuka bubinebine butala pa mpango ya Leza ne kwikala na lukulupilo lwa bine pa mafuku a kumeso kuketusenga binebine. Nanshi twingidijei ne pa mfulo Kinenwa kya Leza ne mabuku esambila pa Bible etusenga ne otumwena’mo mu miswelo mingi.

 ¹⁴ Yesu wētushidile kimfwa kilumbuluke kya kwingidija Bisonekwa mwanda wa kufundija ne kusenga bakwabo. Kimfwa, kitatyi kyaāmwekēle bandi bana bwanga babidi pa kupwa kusanguka, ‘wēbalumbulwidile Bisonekwa.’ Paādi wisamba nabo, mityima yabo yātengelwe bininge. (Luka 24:32) Pa kulonda kimfwa kilumbuluke kya Yesu, mutumibwa Polo wādi ‘ulanguluka mu Bisonekwa.’ Mu Belea, bemvwaniki bandi “batambula mwanda wa Leza na bukankamane. Difuku ne difuku, bādi bajingulula [Bisonekwa].” (Bil. 17:2, 10, 11, DD) Bine i kyendele’mo kutanga Bible difuku ne difuku ne mabuku a Bwine Kidishitu amba tumwene’mo; i bitulupwilwe mwanda wa kwitusenga ne kwitupa kikulupiji mu bino bitatyi bya kusunkanibwa!

Miswelo Mikwabo ya Kusenga Bakwabo

15, 16. Le i bintu’ka bimo byotukokeja kwingidija mwanda wa kukwasha ne kusenga banabetu Bene Kidishitu?

¹⁵ Tukokeja kukwasha ne kusenga banabetu Bene Kidishitu mu miswelo palapala miyampe. Kimfwa, tukokeja kupotela banabetu banunu nansha babela bintu mu nsoko. Tubwanya kukwasha bakwabo mu mingilo yabo, mwa kwibalombwela amba twibatele mutyima. (Fid. 2:4) Padi tubwanya kufwija’ko banabetu pangala pa ngikadilo yabo miyampe, kimfwa buswe, bwino bwa kuleta milangwe, bukankamane, ne lwitabijo lwabo.

¹⁶ Mu bukomo botulonga bwa kusenga banunu, tukokeja kwibapempula, kwibemvwana na katentekeji kitatyi kyobetusekunwina myanda yobemwenine mu būmi ne madyese obemwenine mu mwingilo wa Yehova. Leka, leka, kino kitukankamika ne kwitusenga’po kashā! Tubwanya kutanga Bible nansha mabuku esambila pa Bible kitatyi kyotupempula bantu. Padi i myanda yotwafundile panopano mu Kifundwa kya Kiteba kya Mulami kya ku yenga ne yenga nansha myanda ikefundwa ku Kifundwa kya Bible kya Kipwilo mu bula bwa yenga. Tukokeja ne kutala dishike dya DVD disambila pa mwanda kampanda wa mu Bible. Kadi tukokeja kutanga nansha kusekununa myanda ikankamika yotwatene mu bitabo byetu.

17, 18. Byotudi bengidi ba Yehova ba dikōkeji, mwanda waka tukokeja kukulupila amba uketukwatakanya ne kwitusenga?

¹⁷ Shi tubamone amba mwanetu mutōtyi wa Yehova usakilwa kusengwa, tubwanya kumutela mu milombelo yetu ya pa kasuku. (Loma 15:30; Kol. 4:12) Kitatyi kyotutanwa batwe bene na makambakano mu būmi, ino koku tukimba na kininga kusenga bakwetu, tubwanya kwitabija ne kukulupila pamo bwa kaimba wa mitōto wāimbile amba: “Ela kiselwa kyobe padi Yehova, nandi ukakulelanga; kakalekapo moloke kujina, nansha patyetye pene.” (Mit. 55:22) Na bubine, Yehova uketusenga ne kwitukwatakanya batwe bengidi bandi ba kikōkeji.

¹⁸ Leza wālombwele batōtyi bandi ba pa kala amba: “Ami, enka ami, ne yewa wemusenga.” (Is. 51:12) Yehova uketusenga netu ne kwitwesela mu bilongwa ne binenwa byetu bilumbuluke, monka motusengela boba badila. Twikale na lukulupilo lwa kwenda mūlu nansha lwa pano panshi, batwe bonso tubwanya kusengwa na binenwa bya Polo ku bakwabo Bene Kidishitu bashingwe māni amba: “Mfumwetu Yesu Kidishitu aye mwine, ne Leza Tata wetu, wetusanshilwe, ne kwitupa bukankamane bwa nyeke na nyeke, ne kukulupila kulumbuluke ponka pa buntu, emusenge biyampe pa mityima, ne kwiīkankamika mu bilumbuluke byonso, shi bya umīngilo shi bya mu kyakanwa.”—2 Tes. 2:16, 17.

Lelo Ukivulukile?

• Lelo mwingilo wetu wa kusenga boba badila i musambakane namani?

• Lelo i bintu’ka bimobimo byotukalonga pa kusenga bakwabo?

• I bukamoni’ka bwa mu Bisonekwa bulombola’mba Yehova useñanga bantu bandi?

[Bipangujo bya Kifundwa]

[Kifwatulo pa paje 26]

Lelo nobe useñanga boba badila?

[Kifwatulo pa paje 28]

Bankasampe ne batame bakokeja kukankamika bakwabo