Wifunde mu Kinenwa kya Leza

Lelo I Muswelo’ka Obwanya Kufwena Kudi Leza?

Kino kishinte kipangula bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisamba nobe ano malondololo.

1. Le Leza wivwananga milombelo yonso?

Yehova witanga bantu ba mizo yonso bafwene kwadi mu milombelo. (Mitōto 65:2) Inoko kevwanangapo milombelo yo-yonso. Kimfwa, Bene Isalela pobāendelele kulonga bibi, Leza wāpelele kwimvwana milombelo yabo. (Isaya 1:15) Kadi, milombelo ya muntu ususula mukaji ikokeja kulāla. (1 Petelo 3:7) Ino, Leza ukemvwana milombelo ya banonga-bibi bakatampe shi abesāsa.—Tanga 2 Bilongwa 33:9-13.

2. Le tukalombela muswelo’ka?

Milombelo i dyese kadi i kipindi kya mu butōtyi bwetu, o mwanda tufwaninwe kulombela’nka kudi Yehova. (Mateo 4:10; 6:9) Byotudi bakubulwa kubwaninina, tufwaninwe kulombela kupityila mu dijina dya Yesu, mwanda ye “dishinda” dyotupelwe. (Yoano 14:6) Yehova kasakengapo tulombele milombelo mikwatwe ku mutwe nansha misoneke, ino usaka yoya itamba ku mutyima.—Tanga Mateo 6:7; Fidipai 4:6, 7.

Umpangi wetu ubwanya ne kwimvwana milombelo ya mundamunda. (1 Samwele 1:12, 13) Witusoñanyanga tulombele kitatyi kyonso, kimfwa lubanga, kyolwa, pa kudya, ne kitatyi kyotutanwa na makambakano.—Tanga Mitōto 55:22; Mateo 15:36.

3. Mwanda waka Bene Kidishitu bapwilanga?

Kufwena kudi Leza kekupēlangapo mwanda tudi mu bantu bakubulwa kwitabija Leza ne bafutulula mulao wandi wa kuleta ndoe pa ntanda. (2 Temote 3:1, 4; 2 Petelo 3:3, 13) O mwanda tusakilwa kukankamikwa na banabetu mu lwitabijo.—Tanga Bahebelu 10:24, 25.

Ukokeja kufwena kudi Leza shi upwane na bantu bamusenswe. Kupwila kwa Batumoni ba Yehova kwitupanga mukenga wa kumwena mu lwitabijo lwa bakwabo.—Tanga Loma 1:11, 12.

  4. Lelo i muswelo’ka obwanya kufwena kudi Leza?

Ukokeja kufwena kudi Yehova na kulangulukila pa byobya byowifundile mu Kinenwa kyandi. Na kubandaula mingilo yandi, bwendeji ne milao yandi. Kulanguluka ne milombelo ponka kutamijanga mutyima wa kufwija’ko pa buswe ne tunangu twa Leza.—Tanga Yoshua 1:8; Mitōto 1:1-3.

Ubwanya kufwena Leza enka shi umukulupile ne kumwitabija. Inoko lwitabijo ludi pamo bwa kintu kyūmi kifwaninwe kukwatakanibwa. Ubwanya kutamija lwitabijo lobe na kubandaula kyaba ne kyaba nkulupilo yobe ya kyalwilo.—Tanga 1 Tesalonika 5:21; Bahebelu 11:1, 6.

5. I madyese’ka otukamona shi tufwene kudi Leza?

Yehova ulamanga boba bonso bamusenswe. Wibakiñanga ku kintu kyo-kyonso kibwanya kona lwitabijo lwabo ne lukulupilo lwa mu mulao wa būmi bwa nyeke. (Mitōto 91:1, 2, 7-10) Witudyumunanga ku mashinda a mu būmi ona bukomo ne nsangaji yetu. Yehova witufundijanga mashinda malumbuluke a mu būmi.—Tanga Mitōto 73:27, 28; Yakoba 4:4, 8.

Shi usaka kuyukila’ko bintu bivule, tala shapita 17 wa dino dibuku, Lelo I Bika Bine Bifundija Bible?, dilupwilwe na Batumoni ba Yehova.