4 Leza I Mukondame Lelo I bya

Byokodi padi mwivwane: “Leza ye mwinē ino ntanda, ne byonso bilongeka i kiswa-mutyima kyandi. Ntanda byoiyudile mboloji, bukondame, ne kasusu, nanshi Leza ye ulengeja’byo.”

Bifundija Bible: Leza ke ayepo ulengeja bukondame budi mu ino ntanda. Bible pa kwisambila padi Yehova, unena’mba: “Mingilo yandi i mibwaninine’tu; mwanda mashinda andi onso i moloke swā!”—Kupituluka 32:4.

Leza i wa buntu ku bonso, enka ne ku boba kebebufwaninwepo. Kimfwa, “utēmejanga dyuba dyandi ku babi ne ku bayampe bene kumo, kadi unokeja ne mvula ku bakoloka ne ku bampikwa koloka bene.” (Mateo 5:45) Umwene bantu ba misaka ne bibidiji byonso muswelo umo, monka munenena Bilongwa 10:34, 35 amba: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”

Shi ke pano, i ani ulengeja bukondame? Bantu bavule batoñanga kulonga bukondame, bapela kulonda kimfwa kya Leza kya boloke. (Kupituluka 32:5) Kadi Bible ulombola’mba Leza ulekele’ko Dyabola, walwana nandi aludike ntanda. * (1 Yoano 5:19) Inoko, kuleka kuleke’ko Leza buno buludiki bukondame kusa kufula panopano ponka. Ke mutūle’ko kala kingidilwa kya kona “mīngilo ya dyabola.”—1 Yoano 3:8.

Kuyuka bubinebine mokubwaninya kukukwasha: Ukokeja kuvutakanibwa ñeni na misapu imweka bu keidi mpwilo ya disubi, kasusu, ne bukondame. Kuyuka kine kilengeja tuvutakanya kukakukwasha wimvwanije mwanda waka ngikadilo i mibi, ne mwanda waka bukomo bonso bulonga bantu bwa kulumbulula ntanda bukomenwanga nyeke. (Mitōto 146:3) Pa kyaba kya kwela kyaba ne bukomo mwanda wa kushinta bintu mu kakitatyi’tu katyetye, i biyampe wikale na lukulupilo lwa bine lwa mafuku a kumeso lwimanine pa kwitabija milao ya Leza.—Kusokwelwa 21:3, 4.

Kwimvwanija nsulo mine ya bukondame kwitukwashanga nakampata kitatyi kyotususulwa kwetu. Shi tubalongelwa bukondame, tukokeja kunena mwānenene Habakuka, mwingidi wa Leza amba: “Dibuku dya bijila dine kedilēmekelwepo, mambo nao keakityibwepo mo olokele.” (Habakuka 1:4, Dibuku Dijila) Leza kāfuninepo Habakuka pa kunena namino. Ino, Leza wākulupije mwingidi wandi amba kudi kitatyi kyasa kupwija myanda, kadi wāmukweshe amone nsangaji mu bitatyi bya tuvutakanya. (Habakuka 2:2-4; 3:17, 18) Mo monka netu, kukulupila bilaile Leza amba usa kupwija bukondame kukokeja kwitutalaja ne kwitupa ndoe ya mutyima mu ino ntanda mikondame.

[Kunshi kwa dyani]

[Bushintuludi pa paje 7]

Le Leza ye mwine ulengeja masusu ne bukondame?

[Kutambile Kifwatulo pa paje 7]

© Sven Torfinn/Panos Pictures