Lelo Kodi Mubepelwe Bubela?

KEKUDIPO myanda isansanga mutyima na ya kuyuka’mba muntu okulupile wakubepele bubela. Uketyepelwa, ukevwana bulobo, nansha kutapibwa ku mutyima. Bubela butyumunanga bulunda ne masongi; bulengeja bantu bebwe midiyo ne midiyo ya madolala.

Langa’po bidi mokeivwanina pa kuyuka amba myanda itala Leza yofundile i ya bubela! Shi wadi utakamenine’mo, uno mwanda ukakutapa bininge ku mutyima, na mwatapilwe bano bantu bendanga ku bipwilo, kimfwa:

● DEANNE wanenene amba: “Namwene bu kipwilo i kintyumune mutyima.”

● LUIS nandi amba: “Naivwene bulobo. Namwene bu naongolwa—nkulupilo ne bitungo byami byaikele ke bya bitupu.”

Ubwanya kutatana mulangwe wa kubepelwa mu myanda ya Leza. Padi muntu ukufundije i yewa owadi ukulupile ne o kulangilapo amba ukokeja nansha dimo kukusanshija—bambutwile bobe, mumpele, pashitele, nansha balunda ba pa mutyima. Padi wadi ukulupile mfundijo kampanda mu būmi bobe bonso. Ino le kukokejapo kwitabija’mba nansha shi mulangwe ke muzambalale konso konso ukokeja kwikala wa bubela? Franklin D. Roosevelt Mulopwe wa kala wa mu États-Unis, wajingulwile buno bubine paanene amba: “Kupitulukapituluka mu bubela kekukokejapo kwibwalamuna ke bubine.”

Shi ke pano, ukayuka namani amba i bakubepele? Kitatyi kimo Yesu wālombele Leza amba: “Mwanda obe kyo kyabinebine.” (Yoano 17:17) Bine, mu Kinenwa kya Leza, Bible, mudi byobya byotusakilwa pa kushiyañanya bubinebine na bubela.

Le wabulwa’po kuleka Bible akulombole patōka bubela butano bubepelwa Leza bukulupilwe na bavule? Ukamona muswelo bubinebine mobwalamwina būmi bobe bwikale ke buyampe.