Wifunde mu Kinenwa kya Leza

I Muswelo’ka Otukamwena mu Kulonda Bijila bya Leza?

Kino kishinte kipangula bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisamba nobe ano malondololo.

1. Mwanda waka tufwaninwe kukōkela Leza?

Tufwaninwe’nka kukōkela Leza—mwene ye wētupangile kadi. Ne Yesu mwine ukōkele nyeke Leza. (Yoano 6:38; Kusokwelwa 4:11) Bijila bya Leza bitupanga muswelo wa kulombola amba tumusenswe.—Tanga 1 Yoano 5:3.

Bijila byonso bya Yehova Leza i bya kamweno kotudi. Bitufundijanga mwa kwikadila biyampe dyalelo ne mwa kukamwena mpalo ya būmi bwa nyeke mu mafuku āya kumeso.—Tanga Mitōto 19:7, 11; Isaya 48:17, 18.

2. I muswelo’ka otukamwena ku ngitu mu kulonda bijila bya Leza?

Kijila kya Leza kipeleja bunkolwankolwa kitukiñanga ku misongo ne ku byaka bileta lufu. Mutomeno-mpata umunanga muntu bupika ne kumutwala ku kulonga bintu bya bulembakane. (Nkindi 23:20, 29, 30) Yehova ketupelejepo kutoma malwa, ino usaka tutome’o pa ntomeno.—Tanga Mitōto 104:15; 1 Kodinda 6:10.

Yehova witudyumunanga ku mukao, bulobo bupitepite, ne ku mwikadilo wa kyonakanya. Shi tulonde ano madingi andi, tukekala bakomo ku ngitu.—Tanga Nkindi 14:30; 22:24, 25.

3. I muswelo’ka witukinga bijila bya Leza?

Kijila kya Leza kipelejanga bulādi bwa bantu kebesongele. (Bahebelu 13:4) Balume ne bakaji balonda kino kijila bekalanga na mutyima-ntenke kadi babundanga kifuko kiyampe kutamina’mo babo bana. Ku mutamba mukwabo, bulādi bwa bantu kebesongele divule bukolomonanga misongo, dilubu, bukalabale, kuvutakanibwa ñeni, ne kushiya kisaka na mbutwile umo.—Tanga Nkindi 5:1-9.

Shi twepuke ngikadilo itutwala ku kulāla na muntu oketwisongele nandi, nabya tukalama kipwano kyetu na Leza. Kadi tukepuka kusanshija bakwetu.—Tanga 1 Tesalonika 4:3-6.

  4. I muswelo’ka otukamwena mu kulēmeka būmi?

Bantu balēmekele kyabuntu kya Leza kya būmi bamwenanga’mo ku ngitu kitatyi kyobaleka bibidiji kimfwa kutoma mfwanka ne bikwabo bimuna bupika ne kona būmi. (2 Kodinda 7:1) Leza umwene na bulēme ne būmi bwa mwana ukivunguluka mu difu. (Divilu 21:22, 23) Ketufwaninwepo kwipaya mwana udi mu dimi. Kadi boba balonda mumwena Leza būmi bepukanga bintu bileta kyaka ku kaji, ku njibo, ne pobenda na motoka. (Kupituluka 22:8) Kadi, kebakayangapo makayo atūla būmi bwabo mu kyaka, mwanda būmi i kyabuntu kya Leza.—Tanga Mitōto 36:9.

5. I muswelo’ka otukamwena mu kumona mashi bu ajila?

Mashi i ajila mwanda Leza unena’mba mashi elekeja būmi bwa kipangwa, nansha mūya. (Ngalwilo 9:3, 4) Kijila kya Leza kikwatañanya bulēme bwa mashi na bwa būmi, i kya kamweno kotudi. Namani? Mwanda mashi alengejanga tulekelwe bubi bwetu.—Tanga Levi 17:11-13; Bahebelu 9:22.

Mashi a Yesu ādi na bulēme bwa pa bula mwanda Yesu wādi muntu mubwaninine. Yesu wāpele Leza kintu kyelekeja būmi bwandi—ke mashi andi kadi. (Bahebelu 9:12) Mashi andi āmwangile i malengeje tumone muswelo wa kwikala na būmi bwa nyeke.—Tanga Mateo 26:28; Yoano 3:16.

Shi usaka kuyukila’ko bintu bivule, tala shapita 12 ne 13 wa dino dibuku Lelo I Bika Bine Bifundija Bible?, dilupwilwe na Batumoni ba Yehova.