Le Kilondololwa Kyakyo Kidi na Mvubu?

“Nadi na myaka dikumi ponashilwile kunanga na bana-balume. Dibajinji, twadi twikwata ku maboko ne kwififya. Kwadi nankyo kala ke kwikaila nabo ku bipindi bya bumvu bya ngitu ne kutompa miswelo palapala ya bulādi. Ami pa kubwanya myaka 15, nashilwile kwingila ne kufwenwa na bana-balume ku kaji badi basenswe bya bulādi. Nadi nsenswe kukimbwa na bengidi nami ne kulonga nabo byonso byobalonga. Nadi nsaka kusangaja balunda nami, ino byafudile kulampe, nalonga miswelo mivule ya bulādi.”—SARAH, * MU OSTRALI.

LELO ubatulumuka pa kuyuka’mba Sarah watamīne mu kisaka kya bantu batōta Leza? Bambutwile bandi batompele kumolola alonde misoñanya ya Bible mu būmi bwandi. Ino Sarah watongele kulonda būmi bwa muswelo mukwabo.

Bavule padi bakasangela byatongele Sarah. Balanga’mba binena Bible pa bulādi kebikidipo na mvubu. Bangi nabo bamonanga’mba kepadipo mwanda nansha shi wi mutōtyi mwipāne, ino koku ulonga bulādi mu muswelo onso osaka.

Le kuyuka binena Bible pa bulādi ne kwibilonda kudi na mvubu? Bisonekwa bītela’mba i “bisonekeja Leza [kadi] bimwenwamo pa kufundija.” (2 Temote 3:16) Shi ukulupile amba Leza ye wāpangile bantu, ne amba Bible i Kinenwa kyandi kisonekwe ku bukomo bwa mushipiditu, nabya byanena mu uno mwanda i biyampe kuyuka.

I kya bulanda, mwanda bantu bavule kebayukilepo binena Bible pa bulādi. Bendeji ba bipwilo betela bu balēmekele Bible bafundijanga bintu bīpatanya. Na bubine, uno mwanda i mukalañanye bipwilo bivule bikatampe.

Pa kyaba kya kukulupila binena bantu, wabulwa’po kwilamina’ko kitatyi kityetye kya kubandaula uno mwanda abe mwine? Kishinte kilonda’ko kisambila pa bipangujo dikumi bipangulwanga divule pa mumwena Bible bulādi. Mu kine kishinte’kya, ukamona bilondololwa byampikwa kafinda bilombola bine bifundija Bible. Kishinte kya mfulo mu bino bishinte bilondakane, kikalombola mwanda waka butongi botutonga budi na mvubu mikatampe.

[Kunshi kwa dyani]