Twelei Bitapwa Kudi Yehova ne Mutyima Onso

“Umbyonso byo mulonga, mwikale kwibīngila ne mutyima onso monka, pamo bwa kudi [Yehova].”—KOL. 3:23.

1-3. (a) Lelo kufwa kwāfwidile Yesu ku mutyi wa masusu kushintulula amba Yehova kakitulombengapo monka kitapwa kyo-kyonso? Shintulula. (b) I kipangujo’ka kitala bitapwa bya dyalelo kyaipangulwa?

 MU MYAKA katwa kabajinji K.K., Yehova wāsokwedile bantu bandi amba kitapwa kya kikūlwa kya Yesu kyāfundwile Mukanda wa Bijila wa Mosesa. (Kol. 2:13, 14) Bitapwa byonso byādi byela Bayuda mu bula bwa tutwa twa myaka kebyākidipo kadi na mvubu. Mukanda wa Bijila wāfikidije mwingilo wao wa bu ‘mufundiji wa kutwala kudi Kidishitu.’—Ngat. 3:24.

² Kino kekishintululapo amba Bene Kidishitu kebakifwaninwepo kadi kwela bitapwa. Inoko, mutumibwa Petelo wēsambile pa bisakibwa bya “kwela bitapwa bya mushipiditu, bya kwitabijibwa na Leza kudi Yesu Kidishitu.” (1 Pet. 2:5) Pakwabo kadi, mutumibwa Polo wātōkeje amba būmi bwa kwipāna bwa mwine Kidishitu—mu miswelo yabo yonso—bukokeja kumonwa bu “kitapwa.”—Loma 12:1.

³ Nanshi, mwine Kidishitu welanga bitapwa kudi Yehova, ekale i na kwela bintu kampanda kwadi nansha kuleka bintu kamukaya pa mwanda wandi. Kukwatañana na byobya byotuyukile bitala bintu byādi bilombwa Bene Isalela, le tukayuka namani amba bitapwa byetu byonso byotwela dyalelo bitabijibwanga kudi Yehova?

MU BŪMI BWA DIFUKU NE DIFUKU

4. I bika byotufwaninwe kuvuluka pa mwanda utala mingilo ya mu būmi bwa difuku ne difuku?

⁴ Mu būmi bwetu bwa difuku ne difuku, bikokeja kwikala bikomo kukwatañanya mingilo yetu na bitapwa byotwela kudi Yehova. Mingilo ya njibo, mingilo ya ku masomo, kaji, mangajini, ne mikwabo pamo bwa ino ibwanya kutyepeja mwingidilo wetu wa bintu bya ku mushipiditu. Inoko, shi wi mupāne būmi bobe kudi Yehova nansha ukulupile kulonga namino  mwenda mafuku, nabya yuka amba muswelo oingila mingilo ya bukile-bukya udi na mvubu. Twi Bene Kidishitu kitatyi kyonso, dyuba ne bufuku. Misoñanya ya mu Bisonekwa ifwaninwe kulondwa mu bintu byonso bya mu būmi bwetu. O mwanda, Polo wētusoñenye amba: “Umbyonso byo mulonga, mwikale kwibīngila ne mutyima onso monka, pamo bwa kudi [Yehova], kekudi bantupo, mhm.”—Tanga Kolose 3:18-24.

5, 6. I bika byotufwaninwe kubandaula pa mwanda utala muvwadilo ne mwiendelejo wetu wa difuku ne difuku?

⁵ Mingilo ya mwine Kidishitu ya difuku ne difuku keibadilwangapo mu mwingilo ukola. Kadi Polo pa kwitusoñanya twingidile Yehova na “mutyima onso” usakanga tulangulukile pa myanda ya mu būmi bwetu bonso. Penepa, lelo kino kitufundija bika? Lelo tuloñanga bintu ne kuvwala na bulēmantu kitatyi kyonso? Nansha, kitatyi kyotwingila mingilo ya bukile bukya, lelo tukomenwanga kwiyukanya bu Batumoni ba Yehova, mwanda wa mwiendelejo wetu nansha muvwadilo wetu? Kokakolwa kulonga namino! Bantu ba Yehova kebasakengapo kulonga kintu kyo kyonso kifutulwija dijina dya Leza.—Is. 43:10; 2 Kod. 6:3, 4, 9.

⁶ Tubandaulei kusaka kwingidila Yehova ne “mutyima onso” mo kwikadile na lupusa pa būmi bwa bantu beshileshile. Kitatyi kyotulonga namino, tuvulukei amba bitapwa byonso byādi byela Bene Isalela kudi Yehova byādi bifwaninwe kwikala’nka bitabuke buyampe.—Div. 23:19.

MUSWELO UTALWA BŪMI BOBE

7. Le kwipāna kwa mwine Kidishitu kulomba bika ne bika?

⁷ Kitatyi kyowepēne kudi Yehova, wakwete buno butyibi kwampikwa kwikaka, mwene i amo? Na bubine, wanene amba mu myanda yonso ya mu būmi bobe, ukatūla Yehova pa kifuko kibajinji. (Tanga Bahebelu 10:7.) Buno bwadi butyibi bulumbuluke. Pampikwa ne kutatana kwine wamwene amba, kitatyi kyokimba kiswa-mutyima kya Yehova mu mwanda kampanda ne kulonga bukomo bwa kwingila mungya kino kiswa-mutyima, watene bipa bilumbuluke. (Is. 48:17, 18) Bantu ba Leza i bajila kadi badi na nsangaji mwanda bamwekejanga ngikadilo ya Mwine wibafundijanga.—Levi 11:44; 1 Tem. 1:11.

8. Lelo kumona kwādi kumona Yehova bitapwa bya pa kala bu bijila, kushintulula bika kotudi?

⁸ Bitapwa byādi byela Bene Isalela kudi Yehova byādi bimonwa bu bijila. (Levi 6:25; 7:1) Kishima kya Kihebelu kyalamwinwe bu “ujila” kiselele mulangwe wa kusansanibwa, kutalulwa’mo, nansha kupandulwa’mo kudi Leza. Pa kusaka bitapwa byetu bitabijibwe kudi Yehova, bifwaninwe kwikala bisansanibwe ne kubulwa kusambukilwa na lupusa lwa ntanda. Ketufwaninwepo kusanswa kintu kyo-kyonso kishikilwe Yehova. (Tanga 1 Yoano 2:15-17.) Na bubine, kino kishintulula’mba  tufwaninwe kwepuka kipwano nansha kisense kyo-kyonso kitusubija ku meso a Leza. (Is. 2:4; Kus. 18:4) Kadi kishintulula’mba ketufwaninwepo kuleka meso etu kutala bintu bya disubi ne bya munyanji nansha kuleka mutyima wetu wabila bino bintu.—Kol. 3:5, 6.

9. I muswelo’ka muyampe ufwaninwe kwiendeja mwine Kidishitu na bakwabo, ne mwanda waka?

⁹ Polo wāsoñenye banababo betabije amba: “Kulonga biyampe ne kupana byakupana kemukivulaminwapo, mwanda aye Leza uloelelwe bitapwa bidi namino.” (Bah. 13:16) Nanshi, kwikala biyampe ne kulongela bakwetu biyampe mu būmi i kintu kimona Yehova bu kitapwa kyaitabija. Kuta bakwetu mutyima na buswe kyo kiyukeno kya Bene Kidishitu ba bine.—Yoa. 13:34, 35; Kol. 1:10.

BITAPWA BYELWA MU BUTŌTYI

10, 11. Lelo Yehova umwene namani mwingilo wetu wa bwine Kidishitu ne butōtyi bwetu, ne kino kifwaninwe kwikala na lupusa’ka potudi?

¹⁰ Muswelo umo bidi wa mvubu otulongelanga bakwetu bintu biyampe batwe Bene Kidishitu, i kupityila “ku kwitabija kwa kukulupila kwetu.” Lelo ukwatakanyanga mukenga o-onso wa kusapula bukamoni? Polo wātelele uno mwingilo wa kamweno wa bwine Kidishitu bu “kitapwa kya kutōtelapo Leza nyeke na nyeke, kushintulula ko kunena’mba, i bipa bya milomo ya kwitabija ku dijina dya [Leza].” (Bah. 10:23; 13:15; Hos. 14:2) Tubwanya kunena bivule pa bungi ne mvubu ya kitatyi kyotupityija mu kusapula myanda miyampe ya Bulopwe, kadi bipindi bivule bya ku Kupwila kwa Mingilo bitudilwe’ko mwanda wa kushinsakanya milangwe yetu mu uno mwanda. Ino tubwanya kunena mu kīpi amba, bidi mwingilo wetu wa budimi ne mingilo ya busapudi bwa kiponka na ponka i “kitapwa kya kutōtelapo Leza,” kibadilwa mu butōtyi bwetu, kino kitapwa kifwaninwe kwikala kintu kitabukile buyampe kyotufwaninwe kwela. Nansha ngikadilo byoishintanga, buvule bwa kitatyi kyotupityija mu kusapula myanda miyampe bulombolanga nyeke kufwija’ko kwetu pa bintu bya ku mushipiditu.

¹¹ Bene Kidishitu bapityijanga nyeke kitatyi mu kutōta pa kasuku nansha mu kisumpi. Yehova witusakilanga tulonge namino. Na bubine ketukilamangapo kukokolokwa kwa dya Sabado nansha kwenda kitatyi ne kitatyi ku masobo a mu Yelusalema. Ino, kudi bintu bidingakene na bino bibidiji mu būmi bwa bwine Kidishitu. Leza ukitusakila tuleke mingilo mifwe amba twifunde Kinenwa kyandi, kulombela, ne kutanwa ku kubungakana kwa bwine Kidishitu. Mitwe ya bisaka bya  bwine Kidishitu nayo yalwilanga’ko kwendeja butōtyi bwa kisaka na bantu ba mu yabo njibo. (1 Tes. 5:17; Bah. 10:24, 25) Kukwatañana na mingilo yetu ya ku mushipiditu, i biyampe twiipangule amba, ‘mbulwe’po kulumbulula muswelo wami wa kutōta?’

12. (a) Lelo ensense yādi yelwa mu butōtyi bwa pa kala ibwanya kudingakanibwa na bika dyalelo? (b) Lelo kuno kudingakana kufwaninwe kwikala na lupusa’ka pa byotulomba mu milombelo yetu?

¹² Mulopwe Davida wāimbīle Yehova amba: “Lulombelo lwami lubīkwe mu kifuko kyobe bwa binunkabiyampe.” (Mit. 141:2) Langulukila’po bidi pa mwikadile milombelo yobe —kitatyi ne bine byolomba. Mukanda wa Kusokwelwa udingakanya “milombelo ya bapandulwemo” na ensense, mwanda milombelo itabijibwe ikandanga kudi Yehova pamo bwa binunka biya nansha luvumba luyampe. (Kus. 5:8) Mu Isalela wa kala, ensense yādi yelwa kitatyi ne kitatyi pa madabahu a Yehova yādi ifwaninwe kulongololwa biyampe na katentekeji. Yādi itabijibwa kudi Yehova enka shi i myelwe kukwatañana na bulombodi bwādi butudilwe’ko. (Div. 30:34-37; Levi 10:1, 2) Muswelo umo onka, shi tulombela milombelo itamba ku mutyima, tubwanya kukulupila amba iketabijibwa kudi Yehova.

KUPĀNA NE KUTAMBULA

13, 14. (a) Lelo Epafolodetusa ne kipwilo kya bene Fidipai bālongēle Polo bika, ne mutumibwa nandi wēivwene namani pa kino kilongwa? (b) I muswelo’ka otukalonda kimfwa kya Epafolodetusa ne bene Fidipai?

¹³ Byabuntu bya lupeto bitulwanga mwanda wa kukwatakanya mwingilo wa ntanda yonso, bikale bingi nansha bityetye, bikokeja kudingakanibwa na kitapwa. (Mako 12:41-44) Mu myaka katwa kabajinji K.K., kipwilo kya mu Fidipai kyātumine Epafolodetusa ku Loma mwanda wa kuvuija bisakibwa bya Polo bya ku ngitu. I kimweke patōka amba uno mutumwa wa bene Fidipai wāmuselele kyabuntu kya lupeto kyātambile ku kipwilo. Uno kewādipo musunsa mubajinji wa bene Fidipai kulombola buntu kudi Polo. Na kanye kabo basakile Polo aleke kuzumbija mutyima pa mwanda wa lupeto, ino apityije kitatyi kivule mu mwingilo. Lelo Polo wāmwene namani kino kyabuntu? Wēkitelele bu “bya luvumba lwa kununka biyampe, kitapwa kītabijibwe, kyakutōkeja Leza pa mutyima.” (Tanga Fidipai 4:15-19.) Na bubine Polo, enka ne Yehova mwine bāsangedile kilongwa kya kanye kya bene Fidipai.

¹⁴ Mo monka ne dyalelo, Yehova usangelanga bininge byabuntu byetu bya mwingilo wa ntanda yonso. Pakwabo kadi, i mulaye amba shi twendelele kutūla tumweno twa Bulopwe pa kifuko kibajinji mu būmi bwetu, nabya ukavuija bisakibwa byetu bya ku mushipiditu ne ku ngitu.—Mat. 6:33; Luka 6:38.

LOMBOLA KUFWIJA’KO

15. Le i bintu’ka bimo byofwaninwe kufwijija’ko Yehova?

¹⁵ Bilomba kitatyi kilampe pa kubala bubinga buvule bwine botufwaninwe kufwijija’ko Yehova. Mwene bine tufwaninwe kumufwija’ko difuku ne difuku pa mwanda wa kyabuntu kya būmi? Witupanga byonso byotusakilwa mwanda wa kwitukwatakanya—bidibwa, bivwalwa, mwa kwikala, kubadila’mo ne luvula lotwesa. Pakwabo kadi, lwitabijo lwetu lwimanine pa buyuki bwa binebine, lwitupanga lukulupilo. I biyampe tutōte Yehova ne kwela bitapwa bya lutendelo kwadi, mwanda i aye wetupangile ne pa mwanda wa byonso byaetulongēle.—Tanga Kusokwelwa 4:11.

16. Le tukalombola namani kufwija’ko kwetu pangala pa kitapwa kya kikūlwa kya Kidishitu?

¹⁶ Enka na motwekimwenine mu kishinte kishele kunyuma, kyabuntu kilēme kya pa bula kya Leza kyapele muzo wa muntu i kitapwa kya kikūlwa kya Kidishitu. Kino i kilomboji kikatampe kya buswe bwituswele Leza. (1 Yoa. 4:10) Tukalombola  namani kufwija’ko pa kino? Polo wānene amba: “Ke-luntu lusa lwa Kidishitu lwituningilanga, mwanda tufwatakanya’mba, umo wafwidile bonso, . . . kadi wafwidile bonso’mba, boba badi ne būmi kebakeikadilangapo na būmi abo bene, mhm, i padi aye webafwidile pa mwanda wabo, ne kusanguka kadi wasanguka dikwabo.” (2 Kod. 5:14, 15) Na bubine, Polo wādi ukimba kunena amba shi tudi na mutyima wa kufwija’ko pa buntu bwa Leza, tukengidija būmi bwetu mwanda wa kumulēmeka Aye ne Wandi Mwana. Buswe bwetu ne kufwija kotufwija’ko Leza ne Kidishitu bimwekelanga ku kikōkeji ne mutyima wetu wa kusaka kusapula ne kulonga bana ba bwanga.—1 Tem. 2:3, 4; 1 Yoa. 5:3.

17, 18. Le bantu bamo balumbulwile kitapwa kyabo kya lutendelo kudi Yehova muswelo’ka? Leta kimfwa.

¹⁷ Lelo ubwanya kulumbulula kitapwa kyobe kya lutendelo kyoela kudi Leza? Bantu bavule pa kupwa kulangulukila pa bintu byonso biyampe bibalongēle Yehova, bajadikile bitatyi ne mingilo yabo mwanda wa kutambila ne pa mfulo mu mwingilo wa kusapula Bulopwe nansha kwingila mingilo mikwabo ya kiteokratike. Bamo babwenye kwingila bupania mukwashi kweji umo nansha myeji mivule mwaka ne mwaka, bakwabo nabo babwenye kutwela mu mulongo wa bapania balonso. Bangi nabo batwelele mu mwingilo wa lūbako lwa Mobo a Bulopwe. Mwene ino i miswelo milumbuluke ya muntu kulombola kufwija’ko? Shi twibilonga na kukanina kwa mutyima kuyampe—kulombola kufwija’ko ne kutendela—nabya bino bilongwa bya mingilo ikola i bitabijibwe kudi Leza.

¹⁸ Bene Kidishitu bavule bemwene bu badi na mapu a kufwija’ko Yehova ne kino kibatononanga bamufwije’ko. Umo bidi i Morena. Mwana-mukaji umo wādi ukimba malondololo ku bipangujo byandi bya ku mushipiditu mu Katolika, kipwilo kine kyāatamine’mo, ne mu Filozofi ya mu Azia. Ino kātenepo nansha dimo malondololo atondwa. Enka kitatyi kyāshilwile kwifunda Bible na Batumoni ba Yehova, ebiya kyumwa kyandi kya ku mushipiditu kyapwa. Morena wāfwijije’ko bininge pa malondololo a mu Bisonekwa amulondolwelwe ku bipangujo byandi byonso, ne pa muswelo wajadikile ano malondololo būmi bwandi, ebiya wasaka kufwija’ko Yehova na kwingidija bukomo bwandi bonso mu mwingilo Leza. Pa kupwa’tu kubatyijibwa wāshilula bupania mukwashi kwampikwa kwimika, ne ngikadilo yaadi’mo pa kushinta, wāikala bu pania wa lonso. Myaka 30 pa kupita’po, Morena wadi ukidi’nka mu mwingilo wa kitatyi kyonso.

19. I muswelo’ka obwanya kulumbulula bitapwa byobe byoela kudi Yehova?

¹⁹ Na bubine, kudi bengidi ba Yehova bavule ba kikōkeji badi mu ngikadilo keibalengejapo bengile bu bapania. Ekale shi tubwanya kulonga bika mu mwingilo wa Yehova, batwe bonso tubwanya kwela bitapwa bya ku mushipiditu byaitabije. Mu mwiendelejo wetu, tusakilwa kulama na katentekeji misoñanya myoloke, ne kuvuluka’mba twi bantunguluji ba Yehova kitatyi kyonso. Mu lwitabijo, tukulupilanga na mutyima onso mu mpango ya Leza ya kutendelwa. Mu mingilo milumbuluke tukwashanga mu kutandabula myanda miyampe. Shi ke pano twendelelei kwela bitapwa bya na mutyima onso kudi Yehova pa mwanda wa kumufwija’ko ne mutyima muyule nsangaji pa byonso byāetulongele.

[Bipangujo bya Kifundwa]

[Bushintuludi pa paje  27]

Lelo buyampe bwa Yehova bukutononanga ulumbulule kitapwa kyobe kya lutendelo?

[Kifwatulo pa paje 25]

Lelo ukwatakanyanga mikenga yonso ya kusapula?