Abalahama Muntu wa Buswe

Abalahama waivwana bulanda bukatampe. Sala wandi mukaji wasenswe wafu. Uno mununu wavuluka bintu bivule pashadika wandi mukaji dya mfulo. Pa kwivwana njia ku mutyima wandi, impolo keitūta. (Ngalwilo 23:1, 2) Ke bumvupo nansha moyo byāmulengeje adile, ino impolo yandi ilombola ngikadilo imo miyampe ya Abalahama—ke buswe bwandi kadi.

BUSWE I BIKA? Buswe i mutyima wa kyanga, wa kulamata ku muntu mukwabo nansha kisanso kya mushike. Buswe bwa muntu bumwekelanga ku bilongwa byandi ne ku muswelo waeivwana pangala pa boba basenswe, nansha shi kulonga namino kulomba kwipāna.

LELO ABALAHAMA WĀLOMBWELE BUSWE NAMANI? Abalahama wālombwele amba usenswe kyandi kisaka. Ne kutatana kwine mpika, Abalahama wādi muntu muvudilwe bya kulonga. Nansha nankyo, kāsūdilepo nansha dimo bisakibwa bya mu malango ne bya ku mushipiditu bya kyandi kisaka. Na bubine, Yehova wāyukile amba Abalama byadi mutwe wa kisaka wādi utangidile butōtyi mu kisaka. (Ngalwilo 18:19) Kutabukidila, Yehova wātelele patōkelela buswe bwa Abalahama. Paādi wisamba na Abalahama wātelele Isake bu ‘mwana wandi wasenswe.’—Ngalwilo 22:2.

Tubwanya kadi kumona buswe bwa Abalahama pa byaālongele kitatyi kyāfwile Sala wandi mukaji muswe. Abalahama wāmudidile. Nansha byaādi mukomo kadi mwana-mulume, kādipo na bumvu bwa kudila. Nansha Abalahama byaālombwele bukomo ino wādi kadi ne na lusa.

Abalahama wālombwele amba wādi usenswe Leza wandi. Wālombwele buno buswe  mu būmi bwandi bonso. Namani? Tubwanya kuvuluka byobya binena Bible mu 1 Yoano 5:3 amba: “Luno namino lo lusa lwa Leza, lwa’mba tulame bijila byandi.” Na ino nshintulwilo, tubwanya kunena amba Abalahama wādi kimfwa kya kutendelwa kya buswe bwa kuswa Leza.

Kyaba kivule, Yehova paāpele Abalahama musoñanya, Abalahama wākōkele kiponka na ponka. (Ngalwilo 12:4; 17:22, 23; 21:12-14; 22:1-3) Nansha shi musoñanya wādi upēla nansha mukomo kukōkela; kadi nansha shi Abalahama wādi kayukilepo mwanda waka Yehova wamunena kulonda kintu kampanda, aye wādi ukōkela’tu. Kudi Abalahama, kuyuka bino byonso kekwādipo na mvubu. Shi Leza wandi wamunena kulonga kintu kampanda, wādi ulonga’kyo na mutyima tō. Abalahama wādi umona musoñanya onso bu mukenga wa kulombola buswe bwaswele Yehova.

LE I ÑENI’KA YOTUBOILA’KO? Tukokeja kwiula Abalahama na kulombola na kyanga buswe botusenswe bakwetu, kutabukidila ba mu kyetu kisaka. Ketukalekapo nansha dimo mitabakano ya mu būmi itudīle kitatyi kyotufwaninwe kupityija na bantu botusenswe.

Kadi i biyampe kutamija buswe butamba ku mutyima bwa kuswa Yehova. Buswe bwa uno muswelo bubwanya kwitukwasha bininge mu būmi bwetu. Kimfwa, bukokeja kwitutonona tushinte ngikadila, muneneno, ne mwiendelejo wetu mwanda wa kusangaja Leza.—1 Petelo 1:14-16.

Shako, kukōkela misoñanya ya Yehova kekupēlangapo nyeke. Inoko tubwanya kukulupila amba Yewa wākweshe Abalahama—Yewa wāmwityile bu “mulunda nami”—uketukwatakanya netu. (Isaya 41:8) Bible Kinenwa kyandi, kilaya’mba: ‘Ukemukankamika, ne kwimukomeja.’ (1 Petelo 5:10) Bine uno i mulao ukunka mutyima utamba kudi uno mulunda wa Abalahama ukulupilwa!

[Kapango pa paje 10]

Lelo I Bibi Mwana-Mulume Kudila?

Bangi bakalondolola amba i amo. Padi bakatulumuka pa kuyuka amba Abalahama wādi muntu umo nkanka, mwana-mulume wa lwitabijo ulombwelwe mu Bible amba wādidile mu bitatyi bya byamalwa. Mu bantu bakwabo bādidile mubadilwa ne Yosefa, Davida, mutumibwa Petelo, bakulumpe ba mu kipwilo kya Efisesa, enka ne Yesu mwine. (Ngalwilo 50:1; 2 Samwele 18:33; Luka 22:61, 62; Yoano 11:35; Bilongwa 20:36-38) Na bubine, Bible kafundijangapo amba i bibi mwana-mulume kudila.