Abalahama Muntu wa Lwitabijo

Abalahama wimene panja mu bukata bwa bufuku. Pa tala kweñenya kwa diulu ditoyole ñenyenye, kabudilwepo kulangulukila pa mulao wa Leza wa amba, lukunwa lwandi lukekala pamo bwa ñenyenye keibadika. (Ngalwilo 15:5) Kudi Abalahama, ñenyenye i kivulujo kimweka na meso kya mulao wa Yehova. Ñenyenye ibamupe kadi kikulupiji. Ne kadi, shi Yehova udi na bukomo bwa kupanga diulu ne ntanda ne byonso bidi’mo, lelo abulwe’po kukwasha ba Abalahama ne Sala babutule mwana? Mo monka mwādi mwitabijije ne Abalahama.

LWITABIJO I BIKA? Enka na munena’kyo Bible, “lwitabijo” i kukulupila bya binebine mu bintu byakubulwa kumweka. Luno lwitabijo lwimanine pa kusumininwa kwa binebine. Muntu udi na lwitabijo mudi Leza, ukulupile mu kufikidila kwa milao ya Yehova, ne kwiimona bu ifikidilanga kala.

LELO ABALAHAMA WĀLOMBWELE LWITABIJO NAMANI? Abalahama wālombwele amba ukulupile mu milao ya Leza. Pa mwanda wa lwitabijo, Abalahama wāshile ntanda yaābutwidilwe’mo, ukulupile amba Yehova ukafikidija mulao Wandi wa kumulombola ntanda ingi. Pa mwanda wa lwitabijo, Abalahama wāendele ku Kenani ukulupile amba lukunwa lwandi lukapyana ino ntanda. Kadi i pa mwanda wa lwitabijo, pākimbile Abalahama kwela na kikōkeji Isake bu kitapwa, koku ukulupile amba shi Yehova uswile ukasangula Isake.—Bahebelu 11:8, 9, 17-19.

Abalahama wādi ukulupile mu bintu bya kumeso kupita’ko mu byobya ke bipite. Nansha ba Abalahama ne Sala byobādi babwanya kwikala na būmi bulumbuluke mu Ulu kupita’ko bwa mu Kenani, kebādipo “balanga kokwa ko bafundukile.” (Bahebelu 11:15) Ino, bādi batele mutyima pa muswelo wādi wa kwibesela Leza abo ne lukunwa lwabo mu mafuku āya kumeso.—Bahebelu 11:16.

Le lwitabijo lwa Abalahama lwādi na kyalwilo kiyampe? Ne kwalakana kwine mpika. Yehova wāfikidije milao yandi yonso. Lutundu lwa Abalahama lwēvudije ke muzo mukatampe uyukene bu Isalela. Mwenda mafuku, Bene Isalela bākekele mu Kenani, ntanda mine yālaile Yehova kudi Abalahama.—Yoshua 11:23.

LE I ÑENI’KA YOTUBOILA’KO? Tukokeja kukulupila amba Yehova ukafikidija milao yandi. Nansha shi milao imo imweka bu keibwanikapo ku meso a bantu, ino tukulupile amba “kudi Leza i kilongelongetu kekudi kya kumukomena.”—Mateo 19:26.

Kadi kimfwa kya Abalahama kitufundija tuleke kuta mutyima ku mwādi mwikadile bintu ke bipite, ino ku byotukamona mu mafuku a kumeso.  Ino yo ñeni yaboile’ko muntu umo witwa bu Jason. Jason wasusukile na misongo isansa mutyima yamushile na bulebe. Unena’mba: “Ngitabije amba kudi kyaba kimo kyonadi nangulukila pa bintu ke bipite.” Kupwa ubweja’ko amba: “Kudi bintu bityetye bya mvubu byombudilwe, pamo bwa kupamba wami mukaji Amanda bīpa.”

Inoko, Jason wadi na lwitabijo lukomo lwa amba Yehova ukafikidija milao yandi, kubadila’mo ne mulao wa amba, panopano ponka ntanda yetu ikalamuka ke paladisa ne amba bantu ba kikōkeji bakekala na būmi bwa nyeke ne bukomo bwa ngitu bubwaninine. * (Mitōto 37:10, 11, 29; Isaya 35:5, 6; Kusokwelwa 21:3, 4) Jason unena amba: “Mvulukile amba bitatyi bilumbuluke bikidi kumeso;” ushintulula amba: “Panopano ponka, bino byonso bikapwa—kunyoñama pa mutyima, kuzumbijazumbija mutyima, bulanda ne bubi—kadi kebikekala’kopo nyeke.” Bine Abalahama i kimfwa kilumbuluke kya lwitabijo!

[Kunshi kwa dyani]