‘Ino Myanda-Miyampe ya Buno Bulopwe Ikasapulwa’

“Īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.”—MATEO 24:14.

Mobishintulwila: Luka mulembi wa Evanjile wānene amba Yesu “wadi wenda upitapita monso mu bibundi bikata ne bityetye, kufundija ne kulombola myanda-miyampe ya bulopwe bwa Leza.” (Luka 8:1) Yesu aye mwine wānene amba: “I kiñendelemo nsapwile myanda-miyampe ya bulopwe bwa Leza mu bibundi bikwabo namo, ke-kintu i akyo kyonka kyo natalwilwa.” (Luka 4:43) Wātumine bandi bana babwanga kukasapula myanda miyampe mu bibundi bikata ne bityetye, kupwa webasoñanya mwenda mafuku amba: “Mukēkale basapudi bami . . . kulampe kwine kumfulo kwa ntanda.”—Bilongwa 1:8; Luka 10:1.

Muswelo Wāfikīle’po Bene Kidishitu Babajinji: Bana ba bwanga ba Yesu bālongele na kampeja-bukidi byobya byēbanene Yesu. “Monka mo bukila, mo bukila, mafuku onso, kuleka’byo kufundija mpika, ne kusapula bya [Kidishitu] mu njibo īkola ya Leza ne mu mōbo bitupu.” (Bilongwa 5:42) Ke bantupo batyetye kete bādi banenwe kusapula. Neander mulembi wa mānga wānene amba, “Celsus, mulembi mubajinji wanenene bibi bwine Kidishitu, wafutulwile basapudi bapyasakane ba evanjile pamo bwa, bidimye bya bukonge, balongi ba bikwabilo, banyuki ba biseba, bantu kebafundile mukanda ne batupwaipwai.” Mu dibuku dyandi (The Early Centuries of the Church), Jean Bernardi wāsonekele’mo amba: “[Bene Kidishitu] bādi banenwe kwenda kukesamba na muntu yense kadi mu bifuko byo-byonso. Mu mashinda makatampe, mu bibundi bikatampe, mu mikenza ne mu manza. Enka ne ku mfulo kwa ntanda. . . . Ekale bantu betabije nansha bapele.”

I Bāni Bafikīle’po Dyalelo? David Watson kitobo wa kipwilo kya Anglican wasonekele amba, “kukomenwa kukomenwe bipwilo kukwata na mutyika kusapula ne kufundija, i bubinga bumo bulombola misongo ya ku mushipiditu idi na bavule dyalelo.” Mu dibuku dyandi (Why Are the Catholics Leaving?), José Luis Pérez Guadalupe wāsonekele pa mwanda utala mingilo ya bipwilo bya Évangéliques, Adventistes, ne bikwabo ne kunena’mba “kebendangapo ku njibo ne njibo.” Wāsonekele pa mwanda utala Batumoni ba Yehova amba: “Bendanga ku njibo ne njibo.”

Jonathan Turley wanene binenwa bisangaja kadi biyampe bidi mu dibuku (Cato Supreme Court Review, 2001-2002) bya amba: “Shi muntu watela Batumoni ba Yehova, bantu bavule kebejangapo kulangila pa basapudi betupempulanga ku mobo mu mansaa mabi. Ku Batumoni ba Yehova, kusapula ku njibo ne njibo ke enkapo kulombola lwitabijo lwabo, ino po pene pemanine lwitabijo lwabo.”

[Kapango pa paje 7]

Lelo Pano Ubajingulula Kiyukeno?

Kukwatañana na myanda ya mu Bisonekwa isambilwe’po mu bino bishinte, lelo ulanga, i bāni bafikīle pa kiyukeno kya bwine Kidishitu bwa bine dyalelo? Nansha byokudi bisumpi maelefu dikumi ne bipwilo bitēla bu bya bwine Kidishitu, vuluka byobya byāsapwidile Yesu balondi bandi amba: “Ke bonsololopo bantu bakuntela’mba; Mfumwami! Mfumwami! bakatwele umbulopwe bwa mūlu, ehe, poso enka wakulonga kiswa-mutyima wa Tata udi mūlu.” (Mateo 7:21) Kujingulula boba balonga kiswa-mutyima kya Tata—boba bafikīle pa kiyukeno kya bwine Kidishitu bwa bine—ne kwilunga nabo kukakutwala ku madyese a nyeke ne nyeke mu Bulopwe bwa Leza. Shi usaka kuyukila’ko myanda mivule itala Bulopwe bwa Leza ne madyese obukaleta, tukulomba wipangule Batumoni ba Yehova bakuletēle dino dipepala.—Luka 4:43.