“Kebakidipo Bapanopantanda, Mhm”

“Bonka bapanopantanda bo bebashikilwe mwanda abo kebakidipo bapanopantanda, mhm.”—YOANO 17:14.

Mobishintulwila: Yesu pa kubulwa kwikala wa pano pa ntanda, kādipo wikuja mu tuvutakanya twa bantu ne twa politike twa mu andi mafuku. Wāshintulwile amba: “Shi kadi buno bulopwe bwami bwadi bwa panopantanda, longa nankyo bamudyavita bami abandwila, mwanda wa kunena’mba wakafikijibwa kudi baYudea. Ino pano kubapu, buno bulopwe bwami kebudipo bwa pano kadi, mhm.” (Yoano 18:36) Kadi wāsoñenye balondi bandi bepuke mikadila, muneneno ne mwiendelejo upelejibwe na Kinenwa kya Leza.—Mateo 20:25-27.

Muswelo Wāfikīle’po Bene Kidishitu Babajinji: Kukwatañana na Jonathan Dymond mulembi umo wa myanda ya mitōtelo, Bene Kidishitu babajinji “bāpelele kwikuja mu [divita]; nansha byokwādi kwa kuleta bikoleja, kunenenwa bibi, kukutwa, nansha lufu.” Batoñanga kususuka kupita’ko kutuna mwimanino wabo wa kubulwa kwikuja mu bya ntanda. Misoñanya yabo ya mu mwikadilo nayo ibashiyañanyanga na ntanda. Bene Kidishitu bāsapwidilwe amba: “Ino nabo abatendela ne kutendela padi bānwe byo kemukīela nabo mu dilobe dimo dyonka dya lupotopoto dya bubi, ne bemunena bibibibi.” (1 Petelo 4:4) Will Durant mulembi wa mānga, wāsonekele amba, Bene Kidishitu “bādi bavutakanya mityima ya bene ntanda bajentaila bādi betobelwe mazua, na bwine Leza bwabo ne mwikadilo wabo muyampe.”

I Bāni Bafikīle’po Dyalelo? Dibuku dimo, (New Catholic Encyclopedia) dinene pangala pa kubulwa kwikuja mu bya ntanda kwa Mwine Kidishitu amba: “Kupela kukwata buta i kibi mpata.” Kishinte kimo kidi mu Julunale umo (Reformierte Presse) kinena amba lapolo imo ya Mbila ya Afrika, ko kunena amba kitango kya bakala mbila, ilombola amba mu 1994, bipwilo byonso byekujije mu kwitapa kwa bana na bana kwalongekele mu Rwanda, “kutalula’mo enka Batumoni ba Yehova.”

Pa kwisambila pa Mukubo wa Nazi, polofesele umo wa inivelesite wādidile amba, “kekudipo kipwilo nansha bulongolodi nansha bumo bwa bana ba kibundi bwasokwedile patōka bubela, butapani, ne bibi byalongekele.” Pa kupwa kwipangula Kitango kya mu États-Unis Kilamanga Nkoba ya Bantu Bepaibwanga (Angele), wasonekele amba: “Pano natana malondololo.” Uno muntu wayukile amba Batumoni ba Yehova badi bemanije mu nkulupilo yabo nansha byobadi basusulwa.

Lelo misoñanya yabo ya mu mwikadilo nayo le? Julunale umo (Catholic) wa mu États-Unis unena’mba: “Bene Katolika bavule babitumbafumu ba dyalelo, kebetabijangapo mfundijo ya kipwilo pamo bwa busongi bwa ntekele nkuvwike [ne] kusambakena pamo kumeso kwa kwisonga.” Uno Julunale utela dyakele umo wa kipwilo wānenene amba: “Mu bantu bavule pa katwa bomwene—mfwatakanya’mba i bantu 50 ne kupita pa katwa—bashikatyile kala pamo kumeso kwa kwisonga.” Dibuku dimo (The New Encyclopædia Britannica) dinena amba Batumoni ba Yehova “bakomenejanga misoñanya ya peulu ya mu mwikadilo mu mwiendelejo wa umo ne umo.”