Le “Bene Kidishitu” Bonso I Bene Kidishitu Bine?

LELO kudi Bene Kidishitu banga? Kukwatañana na dibuku dimo (Atlas of Global Christianity), mu 2010 kwadi Bene Kidishitu kubwipi kwa midiyala 2,3 kujokoloka ntanda yonso. Kadi dino dibuku dimo dyonka dilombola’mba bano Bene Kidishitu badi mu bipwilo 41000 ne kupita—kipwilo ne kipwilo na mfundijo ne misoñanya yakyo ya mu mwiendelejo. Pa kumona kuno kuvutakanibwa kuvule kwa bipwilo bya “bwine Kidishitu,” ke kya kutulumuka’po shi bantu bamo i bavutakanibwe ñeni nansha ke kutyumukwa mutyima. Bakokeja kwiipangula amba: ‘Lelo bonso betela bu Bene Kidishitu i Bene Kidishitu binebine?’

Tubandaulei pano uno mwanda mu muswelo mukwabo. Divule, ñenda wipangulwanga ntanda yabo na wa lupusa ulama ku mukalo wa ntanda na ntanda mikwabo. Kadi ufwaninwe kubingija binenwa byandi na kulombola mikanda imo ya kumuyukanya, padi i mukanda wa kwenda nao mu ntanda mikwabo (passeport). Mo monka ne Mwine Kidishitu wa bine nandi, ufwaninwe kulonga bivule kupita’ko’tu kwitela bu witabije mudi Kidishitu. Usakilwa kwikala ne na bintu bikwabo bya kumuyukanya. Le abyo bine i bintu’ka?

Kyaba kimo, kishima “bwine Kidishitu” kyāingidijibwe dibajinji kupwa kwa mwaka wa 44 K.K. Luka mulembi wa mānga ya mu Bible wālombwele amba: “I monka mu Antioka muno mo baalwile kwita bana ba bwanga bu bene Kidishitu.” (Bilongwa 11:26, Myanda Miyampe ku Bonso) Bano bāityilwe bu Bene Kidishitu bādi bana ba bwanga ba Kidishitu. I bika bilengejanga muntu ekale ke mwanā bwanga wa Yesu Kidishitu? Dibuku Dipya Dishintulula Bishima bya Teoloji bya mu Kipwanino Kipya, (Angele) dishintulula’mba: “Kulonda Yesu bu mwanā bwanga kulomba [muntu] apāne būmi bwandi bonso bu kitapwa . . . kwadi.” Nanshi, Mwine Kidishitu wa bine i yewa ulonda ne pa mfulo kadi mu byonso bufundiji ne bulombodi bwa Yesu, Mushimiki wa bwine Kidishitu.

Le bibwanika kutana bantu ba uno muswelo mu bukata mwa bavule betela bu Bene Kidishitu dyalelo? Lelo i bika byānene Yesu byādi byakuyukilwa’po balondi bandi ba bine? Tubakwite ubandaule muswelo ulondolola Bible bino bipangujo. Mu bishinte bilonda’ko, tukabandaula myanda itano yānene Yesu itukwasha tuyuke balondi bandi ba bine. Tukabandaula muswelo wāfikīle’po Bene Kidishitu ba mu myaka katwa kabajinji. Kadi tukekankila’ko kuyuka i bāni bafikīle’po dyalelo mubukata mwa bantu bavule betela bu Bene Kidishitu.