Yehova Witulamanga mwa Kupandila
Yehova Witulamanga mwa Kupandila
“Bānwe [mwi] balamininwe bukalama ku bukomo bwa Leza pa kwitabija ku lupandilo lulongolwele kala kusokolwa kuno kumfulo kwa mwaka.”—1 PET. 1:4, 5.
USA KULONDOLOLA NAMANI?
I muswelo’ka wetukokēle Yehova ku mutōtelo wa bine?
I muswelo’ka otukokeja kuleka Yehova etuludike na madingi andi?
Le Yehova witupanga bukankamane namani?
1, 2. (a) Le i bika bitukulupija amba Leza uketukwasha tulame bululame bwetu? (b) Le Yehova wituyukile biyampe batwe bonso muswelo’ka?
“INO aye ukōminina pototo, ne pamfulo pene, nabya aye ukapandako.” (Mat. 24:13) Na bino binenwa, Yesu wālombwele patōka amba, pa kusaka tukekale bōmi kitatyi kikafika butyibi bwa Leza pa ntanda ya Satana, tufwaninwe kulama bululame kufika ne ku mfulo. Inoko kino kekishintululapo amba Yehova utengele tuminine na tunangu ne bukomo bwa batwe bene. Bible witukulupija amba: “Leza i wabinebine, wampikwa kwimulekelela’mba: Batompibwe na bitabuke bukomo bwabo; ino nanshi, ponka pa kyakutompa, nandi ukasaula dishinda dya kupandilamo, amba mumone mwakutūkijija mutyima monka.” (1 Kod. 10:13) Le bino binenwa bilombola bika?
2 Pa kusaka Yehova ajingulule amba ketutompelwepo na bitutabukile bukomo bwetu, uyukanga bidi myanda yonso itutala, kubadila’mo ne bikoleja byotulwa nabyo, motupangilwe, enka ne muswelo otukokeja kūminina. Le bine Leza wituyukile biyampe uno muswelo? Bine. Bisonekwa bilombola amba Yehova wituyukile batwe bonso biyampe. Uyukile biyampe mwikadila wetu wa difuku ne difuku ne bibidiji byetu. Ukokeja’nka ne kunañuna milangwe ne mifwatakanyo ya mutyima wetu.—Tanga Mitōto 139:1-6.
3, 4. (a) Le byobya byēmwenine Davida bilombola namani amba Yehova utele bantu mutyima? (b) Le i mwingilo’ka wa kutendelwa wingila Yehova dyalelo?
3 Lelo bimweka bu i bikomo kukulupila amba Leza ukata mutyima bantu ba ludingo lwa munshi uno muswelo? Davida mulembi wa mitōto wālangulukile pa kino kipangujo, wānena Yehova amba: “Po nañanga madiulu obe, mīngilo ya minwe yobe, ne kweji ne ñenyenye, byo watūdile; lelo muntu nandi i waka, ōlañanga?” (Mit. 8:3, 4) Padi i kupityila ku byēmwenine Davida byāmutonwene epangule namino. Yehova wāmwene amba uno nkasampe mwanā Yese i ‘muntu wa mwendele mutyima wandi,’ wamufundula ‘ku kukumba mikōko, amba akekale kilongoji’ pa Isalela. (1 Sam. 13:14; 2 Sam. 7:8) Langa’po bidi mwēivwanine Davida, pa kuyuka amba Umpangi wa diulu ne ntanda utele mutyima ku milangwe yandi ya mu mutyima ne ku mifwatakanyo ya nkasampe mukumbi!
4 Ke kya kutulumukapo pa kumona Yehova witutele mutyima mu muswelo wa kutendelwa dyalelo. Ukongakenyanga pamo mu mutōtelo wa bine “bintu bisaka mityima bya mizo yonso,” kadi ukwashanga bengidi bandi balame bululame bwabo. (Hak. 2:7) Pa kwivwanija biyampe muswelo witukwashanga Yehova tulame bululame bwetu, tulangulukilei dibajinji pa muswelo wakokelanga bantu ku mutōtelo wa bine.
BAKOKWE NA LEZA
5. Le Yehova ukokelanga bantu kudi wandi Mwana namani? Leta kimfwa.
5 Yesu wānene amba: “Nansha umo wakwila kwami aye mwine, poso’nka Tata wakuntuma amukokele ko ndi.” (Yoa. 6:44) Bino binenwa bilombola amba pa kusaka kwikala mwanā bwanga wa Kidishitu tufwaninwe kukwashibwa na Leza. Lelo Yehova ukokelanga bantu badi pamo bwa mikōko kudi wandi Mwana namani? I kupityila ku busapudi bwa myanda miyampe ne ku mwingilo wingila mushipiditu sandu. Kimfwa, kitatyi kyādi Polo ne bapwani nandi bamishonele mu Fidipai, bātene mwana-mukaji witwa dya bu Didya bamusapwila myanda miyampe. Nsekununi ya ku bukomo bwa mushipiditu inena’mba: “Mfumwetu wamushitwile mutyima wandi’mba, até konka ku binenwa bīsambwa kudi Polo.” Bine, Leza wāpele uno mwana-mukaji mushipiditu wandi mwanda wa kumukwasha evwanije buluji bwa musapu, mfulo mfulō, aye ne ba mu njibo yandi bābatyijibwe.—Bil. 16:13-15.
6. Lelo batwe bonso twakokēlwe namani ku mutōtelo wa bine na Leza?
6 Lelo Didya ye umo kete wēmwenine kino? Mhm. Shi wi mwine Kidishitu mwipāne, nobe wakokēlwe ku mutōtelo wa bine na Leza. Monka mwāmwenine Tata wetu wa mūlu kintu kya mvubu mu mutyima wa Didya, wāmwene kintu kiyampe ne modi. Kitatyi kyowashilwile kwivwana myanda miyampe, Yehova wakukweshe wiimvwanije na kukupa mushipiditu sandu. (1 Kod. 2:11, 12) Kitatyi kyowalongele bukomo bwa kwingidija byobya byowafundile, wakwesele pa bukomo bobe bwa kulonga kiswa-mutyima kyandi. Kitatyi kyowapēne būmi bobe kwadi, mutyima wandi wasangele. Na bubine, kitatyi’tu kyowashilwile kulonda kashinda ka būmi kufika ne pano, Yehova udi nobe mu matabula obe onso.
7. Le tubayuka namani amba Leza uketukwasha twikale nyeke na kikōkeji?
7 Tamba Yehova witukwasha tushilule kunanga nandi, ne pano pene ketulekelepo tushale nyeke bakōkele na bukomo bwa batwe bene. Uyukile amba byoketweidilepo mu bubinebine batwe bene, ketukashala’mopo na bukomo bwa batwe bene. Mutumibwa Petelo pa kusonekela Bene Kidishitu bashingwe māni, wānene amba: “Bānwe balamininwe bukalama ku bukomo bwa Leza pa kwitabija ku lupandilo lulongolwele kala kusokolwa kuno kumfulo kwa mwaka.” (1 Pet. 1:4, 5) Bino binenwa bifunkila nakampata pa Bene Kidishitu bonso ne kadi umo ne umo ufwaninwe kuta’ko mutyima dyalelo. Mwanda waka? Mwanda batwe bonso tusakilwa bukwashi bwa Leza pa kwikala nyeke na kikōkeji kwadi.
BAKANKAJIBWE KU KUTABULA DITABULA DIBI
8. Mwanda waka tufwaninwe kudyumuka kutabula ditabula dibi?
8 Mitabakano ya mu būmi ne kubulwa kubwaninina kwetu bikokeja kwitulengeja tujimije mumweno wetu wa ku mushipiditu ne kwitutūla mu kyaka kya kutabula ditabula dibi kwampikwa kuyuka. (Tanga Ngalatea 6:1.) Kino i kimweke patōka mu byobya byāfikīle Davida mu būmi.
9, 10. Le Yehova wākankeje Davida namani ku kutabula ditabula dibi, ne witulongelanga bika dyalelo?
9 Kitatyi kyaādi ulondwalondwa na Mulopwe Solo, Davida wālombwele ngikadilo ya kutendelwa yāmukankeje aleke kwalwija uno mulopwe wa mukao kinongo. (1 Sam. 24:2-7) Ino ne kwija’po mpika, mutyima wa kubulwa kubwaninina wa Davida wamutadila. Wādi usakilwa bidibwa bya kudisha bantu bandi, penepa wākalomba na bulēme bukwashi kudi mwanabo mwine Isalela witwa bu Nabalu. Nabalu pa kupela na kibengo, Davida wakalabala ne kukuta nkuku ya kukalwija bantu ba njibo yonso ya Nabalu kinongo, wākomenwa kunañuna amba kwipaya bantu bampikwa mambo kwādi kwa kumulambikija mashi kumeso a Leza. Ino Abikele mukaja Nabalu walonga’po kintu pa kitatyi kifwaninwe, wapandija Davida ku kulonga kilubo kibi mpata. Davida pa kuyuka amba i Yehova watenga’po kuboko, wanena mwana-mukaji amba: “Yehova, Leza wa Isalela atōtwe, ye wakutuma dyalelo dino’di kunsambakana; kadi yeselwe dyese ñeni yobe, weselwe dyese ne abe mwine wakunkankaja dyalelo dino’di ku kupya mambo a mashi, ne kwilubwila kinongo ne kuboko kwa ami mwine.”—1 Sam. 25:9-13, 21, 22, 32, 33.
10 Lelo i ñeni’ka yotuboila ku ino nsekununi? Yehova wāingidije Abikele kukankaja Davida ku kutabula ditabula dibi. Ne dyalelo nadyo mo monka, witulongelanga bivule. Na bubine, ketukatengelapo amba Leza ukatuma muntu wa kwitukankaja kitatyi kyo-kyonso kyotusaka kulonga kilubo; nansha kulanga’mba tuyukile biyampe muswelo ukalonga’po Leza mu ngikadilo yo-yonso yotudi’mo nansha byasa kukaleka bilongeka pa kufikidija kiswa-mutyima kyandi. (Mus. 11:5) Nansha nankyo, tukokeja kukulupila’mba Yehova uyukanga nyeke ngikadilo yotudi’mo kadi uketukwasha tushale nyeke bakōkele kwadi. Witukulupija amba: “Nkakulombolanga ñeni, ne kukufundija mu dishinda dyōkendanga: Nkakupanga ñeni ne dīso dyami ponka padi abe.” (Mit. 32:8) I muswelo’ka witudingilanga Yehova? I muswelo’ka otubwanya kumwena’mo? Ne mwanda waka tukokeja kukulupila amba Yehova uludikanga bantu bandi dyalelo? Tala mulondolwedilwe bino bipangujo mu mukanda wa Kusokwelwa.
BALAMINWE KUPITYILA KU MADINGI
11. Le Yehova uyukile byobya bilongeka mu bipwilo bya bantu bandi kufika ne pa ludingo’ka?
11 Mu kimonwa kisonekelwe mu Kusokwelwa shapita 2 ne 3, Yesu Kidishitu mutumbijibwe ntumbo wāpempwile bipwilo bisamba-bibidi bya mu Azia Minele. Kino kimonwa kilombola amba Kidishitu kāmwenepo enka ngikadilo yonso mu kikonge, ino wāmwene kanda ne kanda. Mu byaba bimo, wātelele’nka ne bantu, kadi mu mwanda ne mwanda, wēbatendele mobifwaninwe ne kwibadingila. Lelo bino bilombola bika? Mu kufikidila kwa kimonwa, bipwilo bisamba-bibidi byelekeja Bene Kidishitu bashingwe māni baikele’ko kupwa kwa mwaka wa 1914, ne madingi āpelwe bipwilo bisamba-bibidi afunkila nakampata pa bipwilo byonso bya bantu ba Leza bidi’ko dyalelo kujokoloka ntanda yonso. Nanshi i kyendele’mo tunene amba Yehova uludikanga na kininga bantu bandi kupityila kudi wandi Mwana. Le i muswelo’ka otukamwena mu buno buludiki?
12. I muswelo’ka otubwanya kuleka Yehova aludike matabula etu?
12 Muswelo umo bidi otubwanya kumwena mu buludiki bwa buswe bwa Yehova i kupityila ku kifundwa kya pa kasuku. Yehova uletanga madingi malumbuluke a mu Bisonekwa kupityila ku mabuku a kabumbo ka umpika wa binebine udi na manwa. (Mat. 24:45) Inoko pa kumwena’mo, tufwaninwe kwitudila’ko kitatyi kya kwifunda’o ne kwingidija byobya byotwifunda. Kifundwa kya pa kasuku i muswelo umo wingidija Yehova mwanda wa ‘kwitulama kutyina’mba twakapona.’ (Yude 24) Lelo kwatangile kashā myanda kampanda mu mabuku etu wamona’mba badi bakulembele’yo’tu’nka abe? Itabija bulemununi butamba kudi Yehova. Pamo’nka na mukokejeja mulunda nobe kukukupila kalupi pa kipuji mwanda wa ute mutyima ku kintu kampanda, Yehova nandi ubwanya kwingidija mushipiditu wandi mwanda wa ute mutyima ku mwiendelejo nansha ngikadilo kampanda ya mu būmi bobe—ne bwa bakwabo bavule pamo bwa abe—ifwaninwe kulumbulula. Tulekanga Yehova aludike matabula etu na kuta mutyima bininge ku buludiki bwa mushipiditu. (Tanga Mitōto 139:23, 24.) Pa uno mwanda, i biyampe tubandaule bibidiji byetu bya kwifunda.
13. Mwanda waka i biyampe tubandaule bibidiji byetu bya kwifunda?
13 Kupityija kitatyi kivule mu kwipwija mukose kubwanya kwitudīla kitatyi kifwaninwe kwifunda kifundwa kya pa kasuku. Tutu umo unena amba: “I kipēla kulādika kifundwa kya pa kasuku. Pano po pene pavudila’ko kwipwija mukose, kadi kekukilombengapo lupeto luvule. Bantu ke bepwijanga mukose ku televijo, kompyuta, ne ku telefone. Twibajokolokwe na kwipwija mukose.” Shi ketutadijepo, kitatyi kifwaninwe kya kwifunda kifundwa kya pa kasuku kya mushike kikokeja kutyepa bityebitye kufika’nka ne byokijimina kyonso fututu. (Ef. 5:15-17) I biyampe twiipangule batwe bonso amba: ‘Le divule dine i kitatyi’ka kyonetudilanga’ko mwanda wa kwifunda na mushike Kinenwa kya Leza? Le i enka kitatyi kyondi na dishikulu nansha kipindi kya ku kupwila kya kuteakanya?’ Shi i amo, padi tukokeja kwingidija biyampe kyolwa kitudīlwe butōtyi bwa kisaka nansha kifundwa kya pa kasuku mwanda wa kukimba tunangu twa ku mushipiditu twitupa Yehova pa kwitulama mwa kupandila.—Nk. 2:1-5.
BAKOMEJIBWE KUPITYILA KU KUKANKAMIKWA
14. Le Bisonekwa bilombola namani amba Yehova utele mutyima ku milangwe yetu?
14 Davida wātenwe na byamalwa bivule mu būmi bwandi. (1 Sam. 30:3-6) Binenwa byandi bya ku bukomo bwa mushipiditu bilombola amba Yehova wādi uyukile milangwe yandi. (Tanga Mitōto 34:18; 56:8.) Leza uyukile biyampe milangwe yetu. Kitatyi ‘kyotutyumukilwe mutyima’ nansha kyotudi na “mushipiditu wa kwisasapo,” witufwenanga pabwipi. Kino kibwanya kwitusenga’nka na mokyāsengele Davida wāimbile amba: “Nkasangalanga ne kusepelela mu lusa lobe; ke-wi-muntu abe ubamone malwa ami, ubayūka muya wami mu tusua.” (Mit. 31:7) Ino Yehova uloñanga bivule kupitako’tu kuyuka’nka makambakano etu. Witukomejanga na kwitusenga ne kwitukankamika. Muswelo umo waloñanga namino i kupityila ku kupwila kwa bwine Kidishitu.
15. I ñeni’ka yotubwanya kuboila ku byēmwenine Asafa?
15 Kamweno kamo kotumwena mu kutanwa ku kupwila i kalombolwe mu myanda yēmwenine Asafa mulembi wa mitōto. Kumona kwāmwene Asafa bukondame kwāmulengeje atatāne mvubu idi mu kwingidila Leza. Asafa wātyumukilwe mutyima mpata. Ulombola milangwe yandi uno muswelo amba: “Mutyima wami wafītyile. Kadi nasonkotwa twakusonkotwa mu matyima ne mayumba ami.” Mfulo mfulō, wālekele kwingidila Yehova. Le i bika byākweshe Asafa aluje mumweno wandi muyampe? Wānene amba: “Nakatwela mu njibo mipandulwemo ya Leza.” Kwine’kwa, mu bukata mwa banababo batōtyi ba Yehova, waālwije mumweno wandi muyampe. Wāmwene amba kumona biyampe kwa babi kwādi’tu kwa kakitatyi katyutyu, ne amba Yehova kakakankalwapo kolola bintu mu boloke. (Mit. 73:2, 13-22) I muswelo umo onka ne kotudi. Njia ya kumona bukondame bwa ntanda ya Satana kukokeja kwituzozeja. Kupwila pamo na banabetu kutalajanga mutyima ne kwitukwasha twaluje nsangaji yetu ya kwingidila Yehova.
16. I muswelo’ka otukokeja kumwena mu kimfwa kya Hana?
16 Penepa, bikekala namani shi ngikadilo ya mu kipwilo ikulengeja ukomenwe kutanwa ku kupwila? Padi wadi usaka kutūla madyese a mingilo, kadi wavutakanibwe ñeni, nansha padi i kubulwa kwiivwanika na tutu nansha kaka. Shi bidi uno muswelo, kimfwa kya Hana kibwanya kukukwasha. (Tanga 1 Samwele 1:4-8.) Vuluka’mba Hana wāfityilwe bininge pangala pa ngikadilo ya kisaka itala mukao nandi Penina. Ino ngikadilo yādi ibipila’ko nakampata kitatyi kyādi kyenda kisaka mwaka ne mwaka ku Shilo kukela bitapwa kudi Yehova. Bino byāletēle Hana njia “wadila, ne kudya mpikila.” Inoko, kālekelepo ino njia imujimijije mikenga yandi ya kutōta Yehova. Yehova wāmwene kikōkeji kyandi ne kumwesela wamwesela.—1 Sam. 1:11, 20.
17, 18. (a) I mu miswelo’ka imo motukankamikwanga ku kupwila? (b) Le wiivwananga namani pa kanye ka Yehova ka kwitukwasha tufikile pa lupandilo?
17 Bene Kidishitu dyalelo badi na bubinga bwinebwine bwa kwiwila kimfwa kya Hana. Tufwaninwe kutanwa nyeke ku kupwila. Enka na motwimwenine’kyo kala batwe bonso, kupwila kwitupanga bukankamane bwa binebine. (Bah. 10:24, 25) Kizaji kya banabetu Bene Kidishitu kituseñanga. Binenwa’tu bityetye binenwa mu dishikulu nansha mu malondololo bikokeja kutenga mutyima wetu. Mu mīsambo yotwisambanga kumeso nansha pa kupwa kwa kupwila, mwanetu umo ukokeja kwituteja nansha kunena binenwa bisenga. (Nk. 15:23; 17:17) Potwimbila Yehova na mawi matunduke, ñeni yetu ikalumbuluka. Nakampata kitatyi kyotutadīlwe na “mifwatakanyo” ya kuzumbazumba, kyo-kyotusakilwa bukankamane botupebwa ku kupwila, kwine kwitukomejanga Yehova na “kusengibwa” kwandi ne kwitukwatakanya mu kusumininwa kotusumininwe kwikala nyeke na kikōkeji.—Mit. 94:18, 19.
18 Byotulaminwe mu buledi bwa Leza wetu wa kanye, twiivwananga na mwēivwanine Asafa kaimba wa mitōto wāimbīle Yehova amba: “Ubankwata kuboko kwami kwa lundyo. Ukanombolanga ku ñeni yobe.” (Mit. 73:23, 24) Bine tufwijanga’ko Yehova pangala pa kwitulama kwaetulamine mwa kupandila!
[Bipangujo bya Kifundwa]
[Kifwatulo pa paje 29]
Nobe wākokelwe na Yehova
[Kifwatulo pa paje 30]
Twibalamwe kupityila ku kwingidija madingi a Leza
[Kifwatulo pa paje 31]
Twibakomejibwe kupityila ku kukankamikwa kobetukankamika
