Bakimba Malondololo

“Muntu yense udi na mulangwe wandi pa mwanda utala kuyuka [Yesu] mwine i ani. Nansha shi twikale na lwitabijo nansha kwalakana kwa muswelo’ka, batwe bonso twiipangulanga’mba, ‘Le uno muntu i ani?’”—MULEMBI STAN GUTHRIE.

BANTU basakanga bininge kuyuka myanda ya Yesu. Mabuku esambila padi apotwanga bininge. Mafilime esambila padi Yesu i mazambalale mu bantu. Inoko, bantu bakipangulanga bipangujo bitala padi Yesu. Badi na milangwe mishileshile pa mwa kuyukila Yesu mwine wādi ani.

Pano kepapite myaka mityetye’tu, balembi babidi ba majulunale bāityile bantu balondolole ku kipangujo kya amba, “Yesu wādi ani?” Balondolwele namino:

● “Bimweka bu wādi labi (mufundiji) wāshile kimfwa kya lusa mu būmi bwandi.”

● “Wādi’tu muntu bitupu wādi na būmi bwa pa bula.”

● “Kekudipo bukamoni bulombola amba Yesu wādi’ko.”

● “Yesu i Mwana Leza wābutwilwe, wafwa, ne kusanguka mu lufu mwanda wa kwitukūla ku bubi bwetu. Dyalelo i mūmi, kadi Ukaya monka pano pa ntanda.”

● “Ngitabije’mba Yesu Kidishitu i mwana umo kete wa Leza, aye umo muntu mupwididile, kadi Leza mwinemwine.”

● “Mānga ya Yesu i lwano lwa bana batyetye bakitama.”

Na bubine, ino mimweno mishileshile izambalele ke yabinepo yonso. Lelo kudi nsulo ya myanda imo miyampe ibwanya kwitupa malondololo akulupilwa ku bipangujo byetu bitala padi Yesu? Balembi ba dino dipepala bakulupile’mba Bible i Kinenwa kya Leza ne amba ye aye umo kete wibasapwila bubinebine bonso butala padi Yesu. *—2 Temote 3:16.

Mu kishinte kilonda’ko, tukabandaula malondololo aleta Bible ku bipangujo bimo biipangulwanga divule padi Yesu. Aye mwine wānene’mba dishinda dya lupandilo didi pululu ku “bonso bakumwitabija.” (Yoano 3:16) Tubakwite ubandaule malondololo ne kukwata butyibi abe mwine shi usaka kuyukila’ko bivule bitala padi Yesu ne pa muswelo wa mwa kwitabijija mwadi.

[Kunshi kwa dyani]