Le Malondololo adi na Kamweno?

“Mukayūkidijanga bya bu-binebine, nabyo bikemukūlanga ke mudi bāna-pabo.”—YOANO 8:32.

MU BIBLE mudi bubinebine bubwanya kwitunyongolola ku kuvutakanibwa nansha ku nkulupilo ya kyongo itala padi Yesu. Lelo byobya byotukulupile padi Yesu bidi bine na kamweno? Bine bidi nako. Bidi na kamweno kudi Yehova. Bidi na kamweno kudi Yesu. Kadi bifwaninwe kwikala na kamweno ne kotudi.

● Mwanda waka bidi na kamweno kudi Yehova? Mu kīpi, mwanda “Leza i [buswe].” (1 Yoano 4:8) Yehova usakanga twikale nyeke na būmi bwa nsangaji. Yesu wānene amba: “Leza byāsenswe bapanopantanda [muzo wa muntu] nenki, wapana Mwana wandi wa bunka’mba, bonso bakumwitabija nankyo . . . batambule būmi bwa kulādila monka nyeke ne nyeke.” (Yoano 3:16) Leza wātumine wandi Mwana ekale Kikūlwa kyetu ne kwitushitwila dishinda dya kwikala nyeke mu Paladisa pano pa ntanda, kukwatañana na mpango Yandi imbajinjibajinji. (Ngalwilo 1:28) Leza udi na mēlu a kupa boba befunda bubinebine butala padi wandi Mwana kadi balonga bintu mungya bubinebine, kyabuntu kya būmi bwa nyeke.—Loma 6:23.

● Mwanda waka bidi na kamweno kudi Yesu? Yesu nandi usenswe muzo wa muntu. Wālombwele buswe bwa kwipāna na kwitabija ne mutyima tō kwitupānina būmi bwandi. (Yoano 15:13) Wāyukile amba wādi useba dishinda dimo kete dya kupandila’mo. (Yoano 14:6) Lelo kusaka kusaka Yesu kumona bantu bavule bamwena mu kitapwa kya kikūlwa kyandi kufwaninwe kwitutulumuna? Uno o mwanda mwine waāpelēle balondi bandi ba bine mwingilo wa kufundija bantu kujokoloka ntanda yonso kiswa-mutyima ne mpango ya Leza.—Mateo 24:14; 28:19, 20.

● Mwanda waka bifwaninwe kwikala na kamweno ne kotudi? Langa’po bidi bintu byomwene bu byo bya mvubu kodi—bukomo bobe bwa ngitu ne kisaka kyobe. Lelo kwabilangapo kwikala na bukomo bwa ngitu ne būmi bulumbuluke, abe ne baswe bobe? Yehova kupityila kudi Yesu, i mukupe abe ne baswe bobe kyepelo kya kwikala na bukomo bwa ngitu bubwaninine ne būmi bwa nyeke mu ntanda impya, mwampikwa masusu ne kupepwa mutyima. (Mitōto 37:11, 29; Kusokwelwa 21:3, 4) Lelo usangedile kwikala na kino kyepelo? Shi i amo, kudi kintu kyofwaninwe kulonga.

Tala monka kisonekwa kitelelwe munshi mwa mutwe wa mwanda kinena amba: “Mukayūkidijanga bya bu-binebine, nabyo bikemukūlanga ke mudi bāna-pabo.” Bubinebine butala padi Yesu ne pa mwingilo wandi mu kufikidija mpango ya Leza, bubwanya kwitunyongolola mu bupika bubibubi—ke bupika bwa bubi ne lufu kadi. Pa kwimwena kuno kunyongololwa ufwaninwe ‘kuyukidija bubinebine.’ Ubulwe’po kwifunda bivule bitala pa buno bubinebine ne pa muswelo obwanya kumwena’mo abe ne baswe bobe? Batumoni ba Yehova bakasangela kukukwasha.