Lelo Umwekejanga Ntumbo ya Yehova?
Lelo Umwekejanga Ntumbo ya Yehova?
‘Bātwe bonso . . . tumwekejanga ntumbo ya Yehova bwa mu kitalo.’—2 KOD. 3:18.
USA KULONDOLOLA NAMANI?
Nansha byotudi ba bubi, i muswelo’ka otubwanya kutumbija Yehova?
Lelo milombelo ne kutanwa ku kupwila kwa bwine Kidishitu, bitukwashanga namani tumwekeje ntumbo ya Leza?
Le i bika biketukwasha twendelele kutumbija Yehova?
1, 2. Mwanda waka i kyendele’mo tukulupile amba tubwanya kwiula ngikadilo ya Yehova?
BATWE bonso twifwene bambutwile betu mu muswelo kampanda. Nanshi ke kya kutulumukapo shi twivwana bantu banena mwana mwana-mulume amba, ‘Wifwene shobe potō.’ Mwana mwana-mukaji nandi bakokeja kumunena’mba, ‘Shi nakumone, mvulukanga inobe.’ Divule bana beulanga bilonga babo bambutwile. Le batwe netu? Le tubwanya kwiula Yehova, Tata wetu wa mūlu? Nansha byoketumumonangapo, tubwanya kumona ngikadilo yandi ya kutendelwa na kwifunda Kinenwa kyandi, kubandila byapangile, kulangulukila pa Bisonekwa ne nakampata pa binenwa ne bilongwa bya Yesu Kidishitu, Mwanā Leza. (Yoa. 1:18; Loma 1:20) Tubwanya bine kumwekeja ntumbo ya Yehova.
2 Kumeso kwa ba Adama ne Eva kupangwa, Leza wādi ukulupile amba bantu bakabwanya kuvuija kiswa-mutyima kyandi, kumwekeja ngikadilo yandi ne kumutumbija ntumbo. (Tanga Ngalwilo 1:26, 27.) Byotwipēne kudi Leza, tufwaninwe kumwekeja ngikadilo ya Mwine wētupangile. Shi tulonge namino, tudi na dyese dikatampe dya kumwekeja ntumbo ya Leza pampikwa kubanga kitamina kyetu, masomo, nansha tubila twetu. Mwanda waka? Mwanda “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bil. 10:34, 35.
3. Lelo Bene Kidishitu bakokeja kwiivwana namani pobengidila Yehova?
3 Bene Kidishitu bashingwe māni bamwekejanga ntumbo ya Yehova. O mwanda Polo, mutumibwa mubutulwe ku mushipiditu wāsonekele amba: “Bātwe bonso ba mumpala mwampikwa kupūta pa kumwekeja ntumbo ya Yehova bwa mu kitalo tubālamunwa monka mu kifwa kimo kyonka mu ntumbo ne ntumbo.” (2 Kod. 3:18) Kitatyi kyādi kitūka mupolofeto Mosesa ku Lūlu lwa Shinai na bipapo bilembe’po Mbila Dikumi, mpala yandi yādi yeñenya mwanda wa Yehova wēsambile nandi. (Div. 34:29, 30) Nansha Bene Kidishitu byokebemwenine bino bintu kadi mapala abo byokeeñenyangapo, ino bamwekejanga nsangaji na kusapwila bakwabo myanda ya Yehova, ngikadilo yandi, ne mpango yandi ya kutendelwa itala muzo wa muntu. Pamo’nka na bitalo bya kilonda kisungululwe bya pa kala, bashingwe māni ne bapwani nabo ba pano panshi, nabo bamwekejanga ntumbo ya Yehova mu būmi ne mu mwingilo wabo. (2 Kod. 4:1) Lelo umwekejanga ntumbo ya Yehova kupityila ku mwiendelejo obe wa bwine-Leza ne ku mwingilo obe wa bu musapudi wa Bulopwe wa kitatyi kyonso?
TUSAKANGA KUMWEKEJA NTUMBO YA YEHOVA
4, 5. (a) Pamo bwa Polo, i makambakano’ka otudi nao? (b) Le bubi budi na lupusa’ka potudi?
4 Batwe bengidi ba Yehova, tusakanga na bubine kulēmeka ne kutumbija Mupangi wetu mu byonso byotulonga. Inoko, divule dine ketufikilangapo pa byobya byotusakanga kulonga. Polo nandi wātenwe na ano makambakano. (Tanga Loma 7:21-25.) Polo pa kushintulula kine kyotwikadile na ano makambakano, wāsonekele amba: “Bonso i bapye-mambo, bakadikile pa ntumbo ya Leza.” (Loma 3:23) Bine, kupityila ku bubi botupyene kudi Adama, muzo wa muntu ubikadilwe na mfumu mubi, ke ‘Bubi Bubikēle Bulopwe’ kadi.—Loma 5:12; 6:12.
5 Lelo bubi i bika? I kintu kyo-kyonso kishile na bumuntu bwa Yehova, mashinda andi, misoñanya, ne kiswa-mutyima kyandi. Bubi bonanga kipwano kipwene muntu na Leza. Bubi bwitulengejanga tubulwe kitungo, pamo’nka bwa kiluwe wa miketo ukokeja kusobola muketo ino watunya kwasa pa kikoto. Tubwanya kulonga bubi ku kusaka nansha pampikwa kuyuka. (Umb. 15:27-31) Bubi i bwale miji bininge mu bantu kadi i bwibatūdile kijika pa bukata bwabo ne Umpangi. (Mit. 51:5; Is. 59:2; Kol. 1:21) Shi ke pano, bantu bonso mu kikonge kebaloñangapo ne pa mfulo bintu mungya kiswa-mutyima kya Yehova kadi i babulwe mukenga wa kumwekeja ntumbo ya Leza. Ne kutatana kwine mpika, bubi i bulema butyani bususula muzo wa muntu.
6. Le i muswelo’ka otubwanya kutumbija Leza nansha byotudi mu ngikadilo ya bubi?
6 Nansha byotudi mu ngikadilo ya bubi, ino Yehova i mwilombole bu “Leza wa kukulupila.” (Loma 15:13) I mutūle’ko muswelo wa kufundula bubi—ke kitapwa kya kikūlwa kya Yesu Kidishitu kadi. Shi twitabije mu kitapwa, ketukekalapo dikwabo “umbupika bwa bubi,” ino tukabwanya kumwekeja ntumbo ya Yehova. (Loma 5:19; 6:6; Yoa. 3:16) Kulama kino kipwano kyotupwene na Leza kwitukulupijanga amba Yehova witweselanga dyalelo, kadi mu mafuku āya kumeso tukekala na būmi bubwaninine kadi bwa nyeke. Nansha byotukidi bantu ba bubi, i dyese’po kashā kumonwa na Leza bu bantu babwanya kumwekeja ntumbo yandi!
MWEKEJA NTUMBO YA LEZA
7. Shi tusaka kumwekeja ntumbo ya Leza, i bika byotufwaninwe bidi kuyuka batwe bene?
7 Pa kubwanya kumwekeja ntumbo ya Leza biyampe, tufwaninwe kuyuka pampikwa budimbidimbi bubi bwetu bwa kipangila. (2 Bil. 6:36) Tusakilwa kuyuka’mba twi ba bubi ne kulonga bukomo bwa kwijiba’ko pa kusaka’mba tufikile pa kutumbija Leza bya binebine. Kimfwa, shi tubaponena mu bubi busansa mutyima bwa kutala bifwatulo bya bantu badi mutaka, tufwaninwe kuyuka’mba tusakilwa bukwashi bwa ku mushipiditu—kupwa twalonga’po kintu pa kupebwa’bo. (Yak. 5:14, 15) Dino dyo ditabula dibajinji dyotufwaninwe kutabula pa kusaka tutumbije Leza ntumbo ne pa mfulo. Byotudi batōtyi ba Yehova, tufwaninwe kwibandaula nyeke mwanda wa kuyuka shi twiendejanga mungya misoñanya yandi myoloke. (Nk. 28:18; 1 Kod. 10:12) Nansha shi bubi bwetu bwikale namani, tufwaninwe kwibukomena mwanda wa kumwekeja ntumbo ya Leza.
8. Nansha byotudi bakubulwa kubwaninina, i bika byotufwaninwe kulonga?
8 Yesu ye muntu umo kete wāikele’ko ne wāfwile pampikwa kufityija Leza mutyima kadi wāmwekeje ntumbo Yandi. Nansha byoketudipo bwa Yesu wādi mubwaninine, tubwanya kadi tufwaninwe kulonga bukomo bwa kulonda kimfwa kyandi. (1 Pet. 2:21) Yehova umwene na mvubu bukomo botulonga ne kwendelela kwetu, kadi witweselanga pa bukomo botulonga bwa kumuletela ntumbo.
9. Lelo Bible udi na lupusa’ka pa būmi bwa Bene Kidishitu basaka kwiendeja mungya musakila Leza?
9 Kinenwa kya Yehova kisonekwe kitumunikilanga mu dishinda mwanda wa twilumbulule. Kwifunda Bisonekwa na mushike ne kulangulukila pa byotutanga mu Bible kudi na mvubu. (Mit. 1:1-3) Kutanga Bisonekwa difuku ne difuku kuketukwasha twilumbulule. (Tanga Yakoba 1:22-25.) Buyuki bwa mu Bible po pemanine lwitabijo lwetu, kadi bukomejanga kusumininwa kotusuminwe kunyema bubi bukatampe ne kwitulengeja tusangaje Leza.—Mit. 119:11, 47, 48.
10. Le milombelo iketukwasha namani twingidile Yehova ne pa mfulo?
10 Pa kumwekeja ntumbo ya Leza, tufwaninwe kadi ‘kushikilwa monka mu kulombela.’ (Loma 12:12) Tubwanya kadi tufwaninwe kulomba Yehova etukwashe tumwingidile mu muswelo waitabija. Pa kino, i biyampe tumulombe mushipiditu sandu, etuvudijije’ko lwitabijo, bukomo bwa kūminina matompo, ne bwino bwa mwa kolokela “monka mu mwanda wa binebine.” (2 Tem. 2:15; Mat. 6:13; Luka 11:13; 17:5) Pamo’nka na mwana ukulupile shandi, netu tufwaninwe kukulupila Yehova, Tata wetu wa mūlu. Kitatyi kyotumulomba etukwashe tumwingidile ne pa mfulo, tubwanya kukulupila’mba uketukwasha. Bine ketwakalanga nansha dimo amba tumupuñanyanga! Ino, tumutendele mu milombelo, kumufwija’ko, kukimba bwendeji bwandi potudi mu matompo, ne kumulomba etukwashe tumwingidile mu muswelo utumbija dijina dyandi dikola.—Mit. 86:12; Yak. 1:5-7.
11. Lelo kupwila kwitukwashanga tumwekeje ntumbo ya Leza namani?
11 Leza i mupe “umpika wa binebine, udi na manwa,” kulela mikōko yandi milēme. (Mat. 24:45-47; Mit. 100:3) Kabumbo ka umpika katele mutyima bininge ku muswelo umwekeja banababo betabije ntumbo ya Yehova. Mumwekelo wetu wa bu bengidi Bene Kidishitu usendululwanga ku kupwila kwetu, pamo’nka bwa tayele ujadika kisandi mwanda wa tumweke biyampe. (Bah. 10:24, 25) Nanshi tufikei pa kitatyi, mwanda shi tudi na kibidiji kya kutyelewa, tukabulwa dibajinji ‘bujadiki’ bumo bwa ku mushipiditu busakibwa pa kulumbulula mumwekelo wetu wa bu bengidi ba Yehova.
TWIULEI LEZA
12. Le tukeula Leza namani?
12 Shi tusaka kumwekeja ntumbo ya Yehova, tufwaninwe kwikala “bakulonda Leza.” (Ef. 5:1) Muswelo umo wa kwiula Yehova i wa kulonda muswelo wamona bintu. Kwiendeja mu muswelo mukwabo o-onso, kubwanya kumufityija mutyima ne kwitōna. Ntanda itujokolokele byoidi mu lupusa lwa yewa umbi, Satana Dyabola, tufwaninwe kulonga bukomo bwa kushikwa byobya bishikilwe Yehova ne kusanswa bininge byobya byasenswe. (Mit. 97:10; 1 Yoa. 5:19) Tufwaninwe kukulupila ne mutyima umo amba, muswelo muyampe umo kete wa kwingidila Leza i wa kulonga bintu byonso mu ntumbo yandi.—Tanga 1 Kodinda 10:31.
13. Mwanda waka tufwaninwe kushikwa bubi, ne kino kiketutonona tulonge bika?
13 Yehova ushikilwe bubi, netu tufwaninwe kwibushikwa. Na bubine, tufwaninwe kusonsolokela kulampe na bilongwa bibi ne kuleka kukimba muswelo wa kwibifwena kutyina byaketunekenya. Kimfwa, tufwaninwe kwilama ku kuponena mu bupondo, bubi buketulengeja tukomenwe kutumbija Leza. (Kup. 13:6-9) Nanshi, tulekei kupwana na batupondo nansha na yewa witela bu mwanetu inoko ufutulula Leza. Uno i mwanda ufwaninwe kuta’ko mutyima nansha shi muntu i wa mu kyetu kisaka. (1 Kod. 5:11) Ketukamwenapo mu kutompa kutuluja binenwa bya batupondo nansha bya boba bafutulula bulongolodi bwa Yehova. Na bubine, i kyaka ku mushipiditu kadi kekyendele’mopo kutanga yabo myanda, ekale misonekwe nansha idi pa Entelenete.—Tanga Isaya 5:20; Mateo 7:6.
14. Potulonga bukomo bwa kumwekeja ntumbo ya Leza, le i ngikadilo’ka yotufwaninwe kutamija, ne mwanda waka?
14 Kulombola buswe i muswelo umo wa kutendelwa otudi nao wa kwiula Tata wetu wa mūlu. Bine, tufwaninwe kwikala na buswe pamo bwa aye. (1 Yoa. 4:16-19) Na bubine, buswe botwisenswe batwe bene na bene bwituyukanyanga bu balondi ba Yesu ne bu bengidi ba Yehova. (Yoa. 13:34, 35) Nansha bubi botupyene byobukokeja kwitulubija kyaba kimo, tufwaninwe kwibufundwila kulampe ne kulombola kitatyi kyonso amba tudi na buswe. Kutamija buswe ne ngikadilo mikwabo ya bwine Leza kuketukankaja tuleke kulonga bubi ne bintu byampikwa kufwaninwa.—2 Pet. 1:5-7.
15. Lelo buswe budi na lupusa’ka pa kipwano kyotupwene na bakwetu?
15 Buswe bwitulengejanga tulongele bantu bintu biyampe. (Loma 13:8-10) Kimfwa, buswe botusenswe mwinē petu bukalama butanda bwa busongi bwikale butōka tō. Buswe botusenswe bakulumpe pamo ne bulēme botulēmekele mingilo yabo, biketukwasha tukōkele ne kukōkelela bwendeji bwabo. Bana basenswe bambutwile babo bebakōkelanga, kwibalēmeka ne kuleka kwibanenena bibi. Shi tusenswe bantu-netu, ketukebamonepo bu badi munshi mwetu nansha kwisamba nabo pampikwa bulēme. (Yak. 3:9) Kadi bakulumpe basenswe mikōko ya Leza bakeilela na kinyenye.—Bil. 20:28, 29.
16. Lelo kulombola buswe kuketukwasha namani mu mwingilo?
16 Tufwaninwe kadi kumwekeja ngikadilo ya buswe mu mwingilo wetu. Pa mwanda wa buswe bukatampe botusenswe Yehova, ketukatyumukwapo mutyima pangala pa bujundu nansha kupela musapu kwa bene njibo bamo. Ino, tukendelela kusapula myanda miyampe. Buswe buketutonona twilongolole biyampe kadi tulonge bukomo bwa kupa bipa mu mwingilo. Shi bine tusenswe Leza ne bakwetu, ketukamonepo mwingilo wa kusapula Bulopwe bu kitundu nansha bu kiselwa kilēma. Ino, tukeumona bu dyese dikatampe kadi tukeuvuija na nsangaji.—Mat. 10:7.
ENDELELA KUTUMBIJA YEHOVA
17. Mwanda waka tumwenanga mu kuyuka kotuyukile amba twibakadikile pa ntumbo ya Leza?
17 Ntanda mu kikonge keiyukilepo kyaka kikatampe kidi na bubi, inoko batwe twikiyukile. Kino kitulengejanga tujingulule kine kyotusakilwa kulwa na mutyima wa kusaka kulonga bubi. Kwiyuka’mba twi ba bubi, kwitukwashanga tufundije mutyima wetu wa mundamunda pa kusaka’mba witutonone tulonge bilumbuluke kitatyi kishilula kutama bubi mu ñeni ne mu mutyima wetu. (Loma 7:22, 23) Eyo, tubwanya kuzoza, ino Leza ubwanya kwitukomeja tulonge byoloke mu ngikadilo yo-yonso.—2 Kod. 12:10.
18, 19. (a) Le i bika biketukwasha tunekenye bulwi botulwa na mishipiditu mibi? (b) Le tubasumininwa kulonga bika?
18 Shi tukimba kutumbija Yehova, tufwaninwe kulwa ne na mishipiditu mibi. Panopele ya ku mushipiditu itupele Leza itukwashanga tubwanye kulwa nayo. (Ef. 6:11-13) Satana kalekele’byopo kulonga bukomo bwandi bonso mwanda wa kwiba Yehova ntumbo imufwaninwe’nka Aye kasuku kandi. Kadi Dyabola uloñanga nyeke bukomo bwandi bonso mwanda wa kōna kipwano kyotupwene na Yehova. Inoko Satana usanswanga mutyima pa kwitumona batwe ne midiyo ne midiyo ya bantu bampikwa kubwaninina bana-balume, bana-bakaji ne bana, balamine bululame bwabo ne kutumbija Leza! Shi ke pano, twendelelei kutendela Yehova, pamo bwa bipangwa bya mūlu byānenene amba: “Yō! abe ufwaninwe, Yehova wetu, Leza wetu, kupebwa ntumbo, ne buleme ne bukomo; mwanda wapangile bintu byonsololo, kadi i pa mwanda wa kiswa-mutyima kyobe o byadipo, ne kupangibwa’byo.”—Kus. 4:11.
19 Nansha bikale namani, tusumininwei nyeke kutumbija Yehova. Na bubine Usangalanga pa kumona bantu bavule ba dikōkeji balonga bukomo bwabo bonso bwa kumwiula ne kumwekeja ntumbo yandi. (Nk. 27:11) Twiivwanei na mwēivwanine Davida wāimbile amba: “Nkakutendelanga, abe Mfumwami Leza wami, ne mutyima wami onso; nkatumbijanga dijina dyobe nyeke na nyeke.” (Mit. 86:12) Bine, twilaije na kipyupyu difuku dyotukamwekeja ntumbo ya Yehova ne pa mfulo ne kumutumbija nyeke! Ino yo nsangaji isa kwimwena bantu ba kikōkeji. Lelo pano umwekejanga ntumbo ya Yehova Leza, koku ukulupile kukeimwekeja nyeke ne nyekeke?
[Bipangujo bya Kifundwa]
[Bifwatulo pa paje 30]
Lelo umwekejanga ntumbo ya Yehova mu ino miswelo?