Bible I Wa Bine Mu Myanda Ya Sianse

“Lelo nkyakusonekelepo bintu bitabukile kunengela, bya kukala ñeni ne bya kuyukidija; kukuyukija binebine’tu bya binenwa bya binebine, amba ulondolole binenwa bya bu-binebine?”—NKINDI 22:20, 21.

LE BIBLE I MWISHILE NA MABUKU MAKWABO NAMANI? Divule mabuku a kala adi na milangwe yampikwa mvubu ne ileta kyaka yashintyilwe na sianse ya dyalelo. Nansha ke dyalelo, balembi bajadikanga mabuku kukwatañana na bintu bipya bisokolwa mu ano etu mafuku. Ino, Bible unena aye mwine amba wālembelwe na Umpangi ne amba Kinenwa kya Leza “i kyaendaenda’tu nyeke na nyeke.”—1 Petelo 1:25.

KIMFWA: Mukanda wa Bijila wa Mosesa wāsoñenye Bene Isalela kujika tuvwi mu kina “panja pa kitūlo.” (Kupituluka 23:12, 13) Bene Isalela bādi banenwe koya shi abatenga ngitu ya nyema nansha ya muntu mufwe. (Levi 11:27, 28; Umbadilo 19:14-16) Bamakopo bādi batūlwa kulampe na bantu kufika’nka ne byobamona amba misongo keikibwanyapo kusambuka.—Levi 13:1-8.

BISOKOLA KIÑANGA KYA DYALELO: Kwikala na misalani miyampe, koya ku makasa, ne kutūla babela kulampe na bantu ikidi miswelo miyampe ne dyalelo ya kulwa na misongo. Shi kudipo na musalani kubwipi ne bintu bikwabo bya kulama bukundwe, Kitango kya mu États-Unis Kitala Myanda ya Misongo ne Kwilama’ko (CDC) kinena amba: “Nsenduka ku mametele 30 nansha [mikono 100] kulampe na nsulo ya mema kupwa jīka kyakutambile.” Bulongolodi bwa Ntanda Butala Myanda ya Bukomo bwa Ngitu bunena amba, shi bantu badi na misalani miyampe, misongo ya kupitwa munda yadi ya kutyepa, ko kunena’mba kintu kya bantu 36 pa katwa. Kubwipi kwa myaka 200 pa kupita’po, bamuñanga bamwene amba basambwidile bantu babela bavule misongo, mwanda wa kuleka koya ku makasa kupwa kwa kutenga ngitu mifwe. Kitango kya CDC kinena’mba, koya ku makasa i “muswelo umo’tu upēla bininge wa kwikinga ku misongo isambuka.” Le pa mwanda utala kutūla kulampe bamakopo nansha boba babela misongo mikwabo nabo le? Panopano ponka, Julunale umo (the Saudi Medical) wanene amba: “Kitatyi kishilula kipupo, muswelo umo kete muyampe wa kwikinga ku kusambukilwa misongo i wa kusonsolola nansha kutūla kufula muntu ubela.”

LE ULANGA’PO NAMANI? Lelo ulanga kudi dibuku dikwabo dijila dya kala dikwatañene na sianse ya dyalelo? Nansha i enka Bible kete?

[Bushintuludi pa paje 6]

“Kekudipo muntu kakabulwepo kutendela pa bidyumu bitala bukundwe byāletelwe mu mafuku a Mosesa.”—MANUAL OF TROPICAL MEDICINE, DYA DRS. ALDO CASTELLANI NE ALBERT J. CHALMERS