Bible Udi na Kamweno Dyalelo

“Mwanda obe i kinanu kya ku maulu ami, kadi i kitōkeji kya mu dishinda dyami.”—MITŌTO 119:105.

LE BIBLE I MWISHILE NA MABUKU MAKWABO NAMANI? Mabuku amo akokeja kumonwa bu mayampe, ao’ko kuleta buludiki buyampe mpika. Ne mabuku a bufundiji a dyalelo nao asakilwa kulemununwa kyaba ne kyaba. Inoko Bible unena amba, “byonsololo byasonekelwe kala byasonekelwe mwanda wa kwitufundija.”—Loma 15:4.

KIMFWA: Nansha Bible byakadipo na buludiki bwa kiñanga, inoko udi na madingi a kamweno a mwa kwikadila na malango ne bukomo bwa ngitu buyampe. Kimfwa unena amba, “mutyima mutuntulu i būmi bwa ngitu.” (Nkindi 14:30) Kadi Bible udyumuna amba: “Yewa wikalañanya aye mwine ukimba kiswa-mutyima kyandi aye mwine, kadi upatana pa ñeni yonso mituntulu.” (Nkindi 18:1) Unena kadi amba “Dyese dya kupana ditabukile dya kupebwa.”—Bilongwa 20:35.

BYOBYA BISOKWELE BUKIMBI: Mutyima mutūke, kipwano kikomo, ne buntu bibwanya kulumbulula bukomo bobe bwa ngitu. Julunale umo (the American Medical Association) unena amba: “Bantu kebejengapo kufuna bulobo badi mu kyaka kikatampe kya kubela bulebe kupita’ko boba kebalobengapo bukidibukidi.” Bwifundi bwalongelwe mu Ostrali mu bula bwa myaka dikumi bwalombwele amba, banunu badi “besamba biyampe na balunda ku diteba dya kyungwija ne na boba bobasokwelanga twanda tufyame,” badi babwanya kwikala’ko myaka mivule. Kadi mu 2008, bakimbi ba mu Kanada ne mu États-Unis bamwene amba, “kulupula lupeto mwanda wa kukwasha bantu kuletanga nsangaji mivule kupita’ko kwilwingidija abe mwine.”

LE ULANGA’PO NAMANI? Lelo kudi dibuku dikwabo dyo-dyonso dyapwile kusonekwa pano ke padi myaka 2000, didi na madingi atala myanda ya bukomo bwa ngitu dyobwanya kukulupila? Nansha i enka Bible kete?

[Bushintuludi pa paje 8]

“Bible unsangajanga bininge . . . mwanda udi na madingi mayampe atala kiñanga.”—HOWARD KELLY, M.D., MUSHIMIKI WA MASOMO A INIVELESITE A JOHNS HOPKINS A KIÑANGA