“Bo Būmi ne Būmi Bwine bwa Kulādila Nyeke na Nyeke”
“Bo Būmi ne Būmi Bwine bwa Kulādila Nyeke na Nyeke”
“Ebiya’mba, bakuyūke, abe Leza enka wa binebine, ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.”—YOANO 17:3.
BUYUKI bukokeja kupandija būmi. Kitatyi kyabelele Nouhou aye papo na myeji dikumi, inandi—wingilanga mu kitango kitala myanda ya bukomo bwa ngitu kya mu Nijer—wayukile kya kulonga’po. Wamwengēle selumu ya kutoma na kutyanga sukadi, mwepo, ne mema mayampe. Kitango kya UNICEF kinena amba, uno lolo “pa kulonga bintu na kampeja-bukidi ne kwingidija madingi a kitango kitala myanda ya bukomo bwa ngitu, misongo ya wandi mwana yapwa.”
Buyuki bwa mu Bible nabo bukokeja kupandija būmi. Mosesa mulembi mubajinji wa Bible wānene amba: “Kine kino’ki kekidipo kintu kya bitupu, mhm; ke-kintu kine kino’ki i bumi bobe, kadi ino pa kino kintu kino’ki mukalepejanga mafuku enu.” (Kupituluka 32:47) Lelo bine Bible ubwanya kulepeja’ko mafuku etu? Lelo Bible bo būmi bwetu mu buluji’ka?
Bishinte bitano bibadikile mu kino Kiteba kya Mulami, i bilombole amba Bible i dibuku kedidingakanibwapo na mabuku makwabo mu myanda itala bupolofeto bwandi bukulupilwa, bubinebine bwandi mu mānga ne mu sianse, kukwatañana kwandi kwa nyeke ne buludiki bwandi bwa kamweno. Kino kilombola amba Bible i mwishile na mabuku makwabo. Le penepa, ubulwe’po kuta’ko mutyima bininge kitatyi kilombola Bible mwa kumwena būmi bwa endaenda—būmi bwa nyeke?
Tukulomba wifunde muswelo utwala buyuki bwa binebine bwa Bible ku ndoe ya mutyima dyalelo ne nsangaji mu mafuku āya kumeso. Batumoni ba Yehova bakasangela kukulombola mwa kutambwila buno buyuki.
[Kapango/Kifwatulo pa paje 9]
Kadi Bible i mwishile na mabuku makwabo, mwanda i aye kete uleta malondololo asangaja ku bino bipangujo bya kyalwilo byo twiipangula:
• Le kyotwikadile’ko kine i kika?
• Mwanda waka kudi masusu mavule nenki?
• Le kudi lukulupilo kampanda pa baswe bami bafwile?
Ukokeja kutana malondololo aleta Bible ku bino bipangujo mu dino dibuku, Lelo I Bika Bine Bifundija Bible?, dilupwilwe na Batumoni ba Yehova.
