Lelo Bible udi Pamo bwa Mabuku Makwabo?

“Bisonekwa byonsololo bisonekeja Leza shi bika, shi bika, byo bimwenwamo . . . , amba muntu wa Leza ēkale umbwanye byonso, ne kulongololwa biyampe senene, shē, mu mīngilo yonso milumbuluke.”—2 TEMOTE 3:16, 17.

BANTU bamo kebetabijepo binenwa bidi kūlu’ku bitala pa Bible. Le abe nobe? Mungya momwena Bible, i mutelelo’ka muyampe pa ino ilonda’ko?

• I dibuku’tu diyampe

• Udi pamo bwa mabuku makwabo ajila etabijibwe

• Dibuku dya ñano didi’mo madingi a mwa kwikadila

• Kinenwa kya Leza

Kipangujo kikwabo i kino, le byokulupile bidi bine na mvubu? Tala byobya binena Bible: “Byonsololo byasonekelwe kala byasonekelwe mwanda wa kwitufundija’mba, pa kutūkija mutyima, ne pa kusengibwa na bisonekwa, twikale ne kukulupila.” (Loma 15:4) Nanshi, Bible udi na kitungo kya kwitufundija, kwitusenga, ne kwitupa lukulupilo.

Inoko, shi Bible wādi’tu dibuku diyampe nansha pamo bwa mabuku makwabo ajila, le wadi wa kumukulupila akufundije ne kuludika kyobe kisaka, nakampata shi musapu wandi wadi mwishile na byobya byolanga bu ye byoloke? Shi Bible wadi amba i mfumo mikongakanibwe pamo, le wadi wa kutana busengi ne lukulupilo mu milao yalaya?

Pakwabo kadi, midiyo ne midiyo ya bantu befundile Bible betabije amba, i Kinenwa kya Leza kishile na mabuku makwabo. Mwanda waka? Lelo i bika bishiyañanya Bible na mabuku makwabo onso? Tubakwite ubandaule myanda itano ya pa bula idi mu Bible, isambilwe’po mu bishinte bilonda’ko.