Wifunde mu Kinenwa kya Leza

Mwanda Waka Tufwaninwe Kwingidija Dijina dya Leza?

Kino kishinte kisambila pa bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. Mwanda waka Leza wēinikile dijina?

Na bubine, usakanga bantu bakwita pa dyobe dijina pa kyaba kya kukwityila pa kitenta pamo bwa “muntu,” “mukelenge,” “lolo,” nansha “mwana-mukaji.” Dijina dikwashanga mwanda wa kukushiyañanya na muntu mukwabo. Leza wityilwanga pa bitenta pamo bwa “Mfumu Mubikadi,” “Leza Mwinebukomobonso,” ne bu “Umpangi.” (Ngalwilo 15:2; 17:1; Musapudi 12:1) Inoko wēinikile dijina mwanda wa kwitukwasha tupwane nandi. Mu Kiluba, dijina dya Leza dya bunka i Yehova.—Tanga Isaya 42:8.

Nansha balamuni ba Bible bavule byobapingakenye dijina dya Leza na bishima pamo bwa “Leza” ne “Mfumwetu,” ino dino dijina ditanwa mu Bible misunsa kubwipi 7000 mu bilembwa bya pa kala bya Kihebelu. Na bubine, Leza usakanga dijina dyandi diyukibwe.—Tanga Isaya 12:4.

2. Mwanda waka kuyuka dijina dya Leza kudi na kamweno?

Kuyuka dijina dya Leza kulomba bivule kupita’ko kuyuka’tu mwa kwiditelela. Pa kuyuka dijina dya Leza bilomba kupwana nandi kipwano kya pabwipi. Dijina Yehova dishintulula amba, “Yewa Wikadija Ke.” Kino kitukulupija’mba Leza ukokeja kwikala byonso byasaka kwikala mwanda wa kufikidija mpango yandi. Nanshi, kuyuka dijina dya Leza kulomba kukulupila’mba Leza ukafikidija milao yandi. (Mitōto 9:10) Lwitabijo lwa bantu bayukile dijina dya Leza ne bedingidija, lwibatononanga bakulupile mwadi ne kumutūla pa kifuko kibajinji mu būmi bwabo. Yehova Leza ukalama bano bantu.—Tanga Mitōto 91:14.

  3. Mwanda waka Leza usakanga dijina dyandi diyukibwe?

Leza usakanga bantu bayuke dijina dyandi mwanda wa bamwene’mo. Kwidiyuka kwibakwashanga bekale balunda na Leza, badi na lukulupilo lwa kwikala’ko nyeke. Nanshi ke kya kutulumukapo shi Yehova witusakila tuyukanye dijina dyandi!—Tanga Yoano 17:3; Loma 10:13, 14.

Yesu wāyukenye dijina dya Leza na kufundija bantu mashinda a Leza, bijila Byandi, ne milao Yandi. Dyalelo, balondi ba Yesu bakyendelela kwingila mwingilo wa kuyukanya dijina dya Leza mu mizo yonso. Baloñanga namino pamo bwa ‘bantu ba dijina dya Leza’ badi mu bumo.—Tanga Bilongwa 15:14; Yoano 17:26.

4. Le Leza ukatumbija dijina dyandi namani?

Yehova Leza usakanga kutumbija dijina dyandi mwanda dyābepelwe bubela. Kimfwa, bantu bamo banenanga’mba kāpangilepo būmi ne amba ketusakilwapo kumukōkela. Bakwabo nabo amba ketutelepo mutyima ne amba i aye ulengeja masusu. Bano bantu bafutululanga dijina dya Leza. Inoko kebakedifutululapo nyeke. Leza ukonakanya bano bantu bapēlula dijina dyandi.—Tanga Mitōto 83:17, 18.

Yehova ukatumbija dijina dyandi kitatyi kikafudija Bulopwe bwandi imbikalo yonso ya bantu ne kwalwija bantu ndoe ne mutyima-ntenke. (Danyele 2:44) Panopano ponka, bantu bonso basa kuyuka’mba Yehova i Leza wa bine.—Tanga Ezekyele 36:23; Mateo 6:9.

Le i bika byofwaninwe kulonga? Fwena kudi Leza na kwifunda Kinenwa kyandi ne na kupwa na na bantu bamusenswe. Kitatyi kikatumbija Yehova dijina dyandi, ukavuluka bengidi bandi ba kikōkeji.—Malaki 3:16.

Shi usaka kuyukila’ko bintu bivule, tala shapita 1 wa dino dibuku, Lelo I Bika Bine Bifundija Bible? dilupwilwe na Batumoni ba Yehova.

[Kifwatulo pa paje 10]

Dijina dya Leza mu bilembwa bya Kihebelu bibajinjibajinji