Fwena Kudi Wivwananga Milombelo

BANTU bavule betela bu betabije mudi Leza kebabwanyapo kushintulula lwitabijo lwabo. Kadi kebakokejapo kushintulula kine kilongela bipwilo bibi nansha mwanda waka Leza ulekele’ko masusu. Abo’ko bakokeja kulombela kudi Leza okebayukilepo.

Ino abe, ubwanya kufwena kudi Leza oyukile. Ukokeja kutamija lwitabijo lobe mu kwivwanija kwa Leza, lwine lukakulengeja umusanswe ne kumulēmeka. Lwitabijo lwa binebine lwimanine pa bukamoni. (Bahebelu 11:1) Shi wifunde bubinebine butala padi Leza, ukamuyuka ne kwisamba nandi pamo bwa mulunda nobe. Tala bimfwa bya bantu bamo badi balombela nansha byobadi batatana kwikala’ko kwa Leza.

◼ Patricia, utelelwe mu kishinte kibajinji. Unena’mba, “Difuku dimo nādi na balunda nami dikumi bāshilwile kwipatanya pa myanda ya bipwilo. Nebalombwele amba nanyema ku njibo mwanda wa kutyina kwivwana misambo ya tata, utuna kwikala’ko kwa Leza na Kamoni wa Yehova waiya kwitupempula kwetu ku njibo. Mulunda nami umo wanena amba, ‘Padi Batumoni ba Yehova badi na bubinga.’

“Mukwabo nandi amba, ‘Tubulwe’po kukatanwa ku kupwila kwabo mwanda wa kuyuka bubinebine’? Ne ye byotwalongele. Nansha byotwadi na lupata, bamo motudi baendelele kupwila mwanda’tu wa batumoni ba Yehova badi belombola bu balunda.

“Inoko, mu Dya Yenga dimo naivwana kintu kyāshintyile mumweno wami. Muneni washintulula kine kisusukila bantu. Dibajinji nkyādipo ndyukile nansha dimo amba ku ngalwilo muntu wāpangilwe mubwaninine, ne amba bubi ne lufu byāshilwile kupityila ku muntu umo, kupwa bwasambakana ku bantu bonso. Kadi muneni washintulula kine kikadile lufu lwa Yesu na mvubu, pa kwalwija muzo wa muntu bintu byājimije muntu mubajinji. * (Loma 5:12, 18, 19) Naivwanija bintu byonso na mu kukopa kwa diso. Nashilula kulanga amba, ‘bine kudi Leza witutele mutyima.’ Naendelela kwifunda Bible ne kwija mpika, nayuka musunsa wami mubajinji mu būmi bwami amba, mbwanya kulombela kudi muntu udi’ko binebine.”

◼ Allan, utelelwe nandi mu kishinte kibajinji. Unena’mba, “difuku dimo, Batumoni ba Yehova baile kwitupempula kwinjibo, wami mukaji webatweja mu njibo mwanda wasangedile byobadi banena bitala būmi bwa nyeke pano pa ntanda. Nakalabala bya mwiko. Ino bano bapempudi pa kupwa kutamba, nakwata wami mukaji mu mpishi namunena  amba, ‘kokilembakana. Kufwaninwepo kukulupila bintu pamo bwa bino!’

“Mukaji wamulondolola’mba, ‘biyampe, nanshi enda ukebalombole amba mubabepa bubela.’

“Na bubine, nkyamwenepo kabubela nansha kamo. Ino badi’tu biyampe kadi mbashidile dibuku disambila pa mwa kuyukila shi būmi bwāpangilwe nansha bwaikele’ko kupityila ku kwialamuna. Dino dibuku dyadi disamba myanda patōkelela kadi ikulupilwa yaunengeje nkwate butyibi bwa kukimba kuyuka bivule padi Leza. Nashilula kwifunda Bible na Batumoni, kadi najingulula bukidi bonka amba byodinena i bishile kulampe na bintu byonso byonadi nanga dibajinji pa mwanda utala kipwilo. Ponaendelele kwifunda myanda itala padi Yehova, nashilula kumulomba mu muswelo mupotoloke. Nkyadipo na ngikadila miyampe, o mwanda nadi nomba Leza ankwashe. Naitabije amba Yehova walondolola milombelo yami.”

◼ Andrew, ushikatanga mu Angeletele. Unena’mba, “Nansha byonadi na milangwe mibi ne kusangela mpata mu myanda ya sianse, nadi nkulupile mu lufundijo lwa kwialamuna mwanda’tu wa bantu bakwabo badi banena’mba i lwa bine. Napela kukulupila mudi Leza  mwanda wa bintu byonso bibi byadi bilongeka.

“Inoko, kyaba kimo nadi nanga amba: ‘Shi bine Leza udi’ko, nanshi mfwaninwe kuyuka kyobilongekela. Mwanda waka kudi bupolapola ne mavita mavule nenki?’ Mu kitatyi kya makambakano, nadi nomba kyaba kimo bukwashi mu milombelo, ino nkyadipo ndyukile mwine onomba’bo.

“Kupwa muntu umo wapa wami mukaji trakte ilupwilwe na Batumoni ba Yehova inena amba Lelo Ino Ntanda Ikapanda? Kino i kipangujo kine kyonādi nangulukila’po divule. Trakte waunengeje neipangule pa mwanda utala Bible amba, ‘Le malondololo aleta afwaninwe kukulupilwa?’ Mwenda mafuku, ponadi mu konje, muntu umo wampa dibuku La Bible : Parole de Dieu ou des hommes ? * Kitatyi kyonajingulwile amba Bible i mukwatañane na sianse ya bine, namona’mba nsakilwa kwifunda bivule bitala pa Bible. O mwanda nāitabije kitatyi kyaile Kamoni wa Yehova umo kwifunda nami Bible. Ponaivwanije mpango ya Yehova, namwene’mba namuyuka bu muntu udi’ko binebine, muntu ombwanya kwisamba nandi mu milombelo pambulwa nsengwa.”

◼ Jan, watamine mu kipwilo kya Mishoni mu Londoni. Unena’mba, “buzazangi budi mu bipwilo ne kuvudila’ko kwa masusu kwanengeje ndeke’byo kwenda ku kipwilo. Kadi naleka’byo ne kufunda kwine, ebiya nashilula kwimba ne komba kindadi mwanda wa kusokola lupeto. Kino kyadi kitatyi kyonetene na Pat. Pat wātamine mu Katolika kadi nandi walekele kwenda ku kipwilo pamo bwa ami.

“Twadi tushikete na bantu bakwabo bavule balekele bipwilo byabo bya Kutunduka mu njibo mishibwe. Difuku dimo mu bukata bwa bufuku, twepatanya bininge mu mansaa mavule pa mwanda utala mvubu idi na būmi. Nansha ami ne Pat byoketwadipo tukulupile mudi Leza, ino twadi tumona amba kufwaninwe kwikala ‘bukomo kampanda bwa būmi.’

“Batwe pa kuvilukila kungala kwa Angeletele mwanda wa kukimba mwingilo wa kukaya minjiki, twabutula mwana. Difuku dimo mwana wabela, kupwa nkenombela Leza onadi nkikulupilepo. Kyaba kityetye pa kupita’po, kipwano kyami na Pat kyaoneka, ebiya namushiya kadi namusela ne mwana mwine. Kupwa nalomba monka bukwashi mu milombelo, enka na kwadi muntu wa kungivwana. Ami kuyuka mpika, nanshi Pat nandi wadi ulombela.

“Enka mu dine difuku’dyo, Batumoni ba Yehova babidi bakokola ku mulango wa Pat ne kumulombola madingi amo mayampe a mu Bible. Pat waungita ne kungipangula mwanda wa kuyuka shi ngitabije kwifunda Bible pamo nandi na Batumoni. Ne kwija mpika twefunda’mba pa kusangaja Leza, tufwaninwe kwandikija busongi bwetu ku Leta. Byadi bimweka bu bikomo pa muswelo otwadi tumona kipwano kyetu kijinajina.

“Twadi tusaka kuyuka myanda mivule itala kufikidila kwa bupolofeto bwa mu Bible, kine kikadile’ko masusu, ne mushintulwila Bulopwe bwa Leza. Mwenda mafuku, twajingulula’mba Leza utele bantu mutyima, ne amba tufwaninwe kulonga enka byanena. Ebiya twesonga. Tunangu tudi mu Kinenwa kya Leza twetukweshe tulele betu bana basatu. Twaitabije amba Yehova waivwene milombelo yetu.”

Bandaula Bukamoni Bowimwenine Bulombola amba Leza udi’ko

Pamo bwa midiyo ne midiyo ya bantu bakwabo, bano bantu batelelwe mu kino kishinte nabo batyumwinwe mutyima na bipwilo bya bubela ebiya bayuka kine kilekele’ko Leza masusu. Lelo ubamone amba mu mwanda ne mwanda, kwivwanija kwa binebine kwa Bible kwanekenye bano bantu betabije’mba bine Yehova wivwananga milombelo?

Le ubulwe’po kubandaula bukamoni bulombola’mba Leza udi’ko? Batumoni ba Yehova bakasangela kukukwasha wifunde bubinebine butala padi Yehova ne muswelo obwanya kufwena kudi “Wivwananga kulombela.”—Mitōto 65:2.

[Kunshi kwa dyani]

[Bushintuludi pa paje 10]

“Ponaivwanije mpango ya Yehova, namwene’mba namuyuka bu muntu udi’ko binebine, muntu ombwanya kwisamba nandi mu milombelo pambulwa nsengwa”

[Kifwatulo pa paje 9]

Lwitabijo lwa binebine lwimanine pa bukamoni ne pa kusaka kuyuka bubinebine butala padi Leza