Wifunde mu Kinenwa kya Leza

Lelo Bipangwa bya ku Mushipiditu Bidi na Lupusa’ka Potudi?

Kino kishinte kisambila pa bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. Le bamwikeulu i bāni?

Bamwikeulu i bipangwa bya ku mushipiditu bidi momwa mūlu. Badi na būmi bwa peulu kupita bwa bantu. Leza wa bine, aye mwine mushipiditu, wāpangile bamwikeulu kumeso kwa kupanga ntanda. (Yoba 38:4, 7; Mateo 18:10) Yehova i mujokolokwe na midiyo ne midiyo ya bamwikeulu ba kikōkeji.—Tanga Mitōto 103:20, 21; Danyele 7:9, 10.

2. Le bamwikeulu bakwashanga bantu?

Bamwikeulu bākweshe Lota muntu moloke. Wādi ushikete mu kibundi kyāsumininwe Leza konakanya mwanda wa bubi bwa bantu. Bamwikeulu babidi bādyumwine Lota ne kyandi kisaka banyeme. Bantu bamo bāmwene kino kidyumu bu makayo kadi basūla’kyo. Ino Lota ne bandi bana bana-bakaji bāpandile mwanda bākōkele kidyumu kyāletele Leza kupityila ku bamwikeulu.—Tanga Ngalwilo 19:1, 13-17, 26.

Kukwatañana na Bible, bamwikeulu bakwashanga bantu dyalelo na kuludika mwingilo wa boba basapula myanda miyampe ya Bulopwe bwa Leza na kikōkeji. (Mateo 24:14) Mu myanda miyampe mudi ne kidyumu. Pamo’nka na kidyumu kyāpelwe Lota, myanda miyampe ke makayopo. Itambanga kudi Leza kupityila ku bamwikeulu.—Tanga Kusokwelwa 1:1; 14:6, 7.

Leza ukokeja kwingidija bamwikeulu mwanda wa kwitukomeja kitatyi kyotulwa na matompo. Wāingidije mwikeulu pa kukomeja Yesu.—Tanga Luka 22:41-43.

Panopano ponka Leza usa kwingidija bamwikeulu mu muswelo mukwabo—mwanda wa kutalula’ko bantu babi balengeja masusu. Kino kikasenga byabinebine muzo wa muntu.—Tanga 2 Tesalonika 1:6-8.

  3. Bademona badi na lupusa’ka potudi?

Monka mulongelanga bantu bavule ba pano pa ntanda bibi na kuleka kukōkela Leza, ne mūlu namo bamwikeulu bavule bātombokele Leza. (2 Petelo 2:4) Bamwikeulu bampikwa kikōkeji betwanga bu bademona. Mubajinji mu bukata mwabo i Satana Dyabola. Satana ne bademona bandi bongolanga bantu.—Tanga Kusokwelwa 12:9.

Satana wingidijanga busunga bubi, maludiki a bantu, ne bipwilo bya bubela mwanda wa kusomanya bantu ne kwibasonsolola kudi Leza. Mu uno muswelo, Satana i mulambikwe bukondame, butapani, ne masusu asusula muzo wa muntu.—Tanga 1 Yoano 5:19.

4. Le bademona bongolanga bantu namani?

Satana ongolanga bantu bavule na kufundija amba bafwe balamukanga ke mishipiditu ibwanya kwisamba nabo. Ino Bible unena’mba bafwe kebabwanyapo kulonga nansha kimo kine. (Musapudi 9:5) Inoko bademona bongolanga divule bantu na kwiula diwi dya baswe betu bafwile. (Isaya 8:19) Bademona bongolanga bantu kupityila ku babilumbu, bambuki, ne lubuko lwa malumba a ñenyenye. Kinenwa kya Leza kitudyumuna twepuke bilongwa byonso bya uno muswelo. Nanshi tufwaninwe kufundwila kulampe kintu kyo-kyonso kyotudi nakyo kikwatañene na bademona ne bya majende.—Tanga Kupituluka 18:10, 11; Bilongwa 19:19.

Shi tusenswe Yehova, ketufwaninwepo kutyina bademona. Shi twifunde Kinenwa kya Leza ne kulonga byokinena, tukalwa na Dyabola ne kufwena kudi Leza. Yehova udi na bukomo kupita bademona. Bamwikeulu bandi ba kikōkeji babwanya kwitukomeja kitatyi kyotusakilwa bukwashi.—Tanga Mitōto 34:7; Yakoba 4:7, 8.

Shi usaka kuyukila’ko bivule, tala shapita 10 wa dino dibuku, Lelo I Bika Bine Bifundija Bible?, dilupwilwe na Batumoni ba Yehova.