Lelo Kudi Muntu Wivwananga Milombelo?

“Nadi ntatana nyeke kwikala’ko kwa Leza. Inoko, nadi nombelanga kyaba kimo. Nadi neipangula shi kudi muntu ungivwana, ino na bubine nadi nkulupile amba kufwaninwe kwikala muntu wivwana. Nkyadipo na nsangaji kadi nkyadipo ne kitungo kine mu būmi. Nadi na moyo wa kukulupila mudi Leza mwanda nadi nanga’mba i enka bantu bazoze kete ye bakulupile mudi Leza.”—PATRICIA, * wa mu IRLANDE.

LELO ukokeja kwiivwana na mwēivwanine Patricia? Lelo ulombelanga nansha shi utatana kwikala’ko kwa Leza? Shi i amo, kudipo bunka. Tala myanda ilonda’ko.

◼ Bwipangudi bwaipagwilwe bantu 2200 mu Beletanye, bwalombwele patōka amba i enka bantu 22 pa katwa bakulupile amba kudi Leza wāpangile ntanda kadi wivwananga milombelo. Kadi mu bano bantu baipangwilwe, bantu 55 pa katwa balombelanga na dimo-dimo.

◼ Mu bantu 10000 ba mu matanda aná baipangwilwe banenene abo bene amba batunanga kwikala’ko kwa Leza, i enka kintu kya bantu 30 pa katwa bo balombelanga.

Mwanda Waka Batatananga?

Allan mwine Angeletele unena amba: “Nadi nena nyeke amba nkyadipo nkulupile mudi Leza, mwanda nadi nanga amba bipwilo byadi’ko mwanda’tu wa kutādila bantu ne kwibapetela pa mitwe. Kadi nadi nanga amba shi Leza wadi’ko, longa kekudipo bukondame buvule nenki. Ino, kyaba kimo nadi nshikata talala nkenesambe ‘na muntu onkiyukile.’ Kadi nadi neipangula amba ‘Naikele’ko namani?’”

Muntu yense udi na milangwe ya uno muswelo udi na bubinga bwa kutatena shi milombelo ilondololwanga. Mu myanda mivule, kutatana kubwanya kwikala’ko pa kukomenwa kutana malondololo a bipangujo, kimfwa bwa bino bilonda’ko:

◼ Lelo kudi Umpangi?

◼ Mwanda waka bipwilo bidi divule na lupusa lubi?

◼ Mwanda waka Leza ulekele’ko masusu?

Shi ubayuka malondololo a bino bipangujo, lelo ukekala na kikulupiji mu myanda itala milombelo?

[Kunshi kwa dyani]