Muswelo Ukafula Ino Ntanda
Muswelo Ukafula Ino Ntanda
“Kemudipo mu fukutu’mba, dyodya difuku dīmupapamukile pamo bwa ngivi, mhm.”—1 TES. 5:4.
LE UKOKEJA KUSHINTULULA?
Le i bintu’ka kebyamwekele bilombwelwe mu bino bisonekwa bilonda’ko?
1. Le i bika biketukwasha twikale nyeke batengele ne kukomena matompo?
BINKUMENKUME bya kutenkanya ntanda bisa kulongeka panopano ponka. Kufikidila kwa bupolofeto bwa mu Bible kubingija uno mwanda, o mwanda tufwaninwe kwikala nyeke batengele. Le i bika biketukwasha tutengele? Mutumibwa Polo witusoñanya “kutala ku bintu . . . byampikwa kumweka.” Bine, tufwaninwe kulama mu ñeni mpalo yetu ya būmi bwa nyeke, ekale bwa mūlu nansha bwa pano panshi. Enka mulombwela’kyo myanda idi mu kisonekwa, Polo wāsonekele bino binenwa mwanda wa kukankamika banababo mu lwitabijo bate mutyima ku bipa bisangaja bilupuka ku būmi bwabo bwa kikōkeji. Kulonga namino kwādi kadi kwa kwibakwasha bakomene matompo ne kupangwapangwa.—2 Kod. 4:8, 9, 16-18; 5:7.
2. (a) Le i bika byotufwaninwe kulonga pa kukomeja lukulupilo lwetu? (b) I bika byotusa kubandaula mu kino kishinte ne mu kilonda’ko?
2 Mu kidyumu kya Polo mudi ne musoñanya wa amba: Pa kukomeja lukulupilo lwetu, tufwaninwe kutala kulampe kupita’ko enka pa bintu byotumona na meso. Tufwaninwe kuta mutyima bininge ku binkumenkume bikatampe kebyamwekele. (Bah. 11:1; 12:1, 2) Tubandaulei nanshi binkumenkume dikumi bīya kumeso bikwatañene na lukulupilo lwetu lwa būmi bwa nyeke. *
LE I BIKA BIKALONGEKA KUMESO’TU KWA MFULO KUFIKA?
3. (a) Le i kintu’ka kekyalongekele kitelelwe mu 1 Tesalonika 5:2, 3? (b) Le i bika bikalonga bendeji ba kipolitike ne i bāni bakelunga nabo?
3 Kintu kimo kisa kulongeka mu mafuku āya kumeso kitelelwe na Polo mu mukanda waālembēle Bene Tesalonika. (Tanga 1 Tesalonika 5:2, 3.) Wākokēle milangwe pa “difuku dya [Yehova].” Difuku dya Yehova dingidijibwe pano, difunkila pa kitatyi kikashilula konakanibwa kwa mutōtelo wa bubela kutūla ne ku divita dya Amakedona. Inoko, kumeso’tu kwa difuku dya Yehova kushilula, bendeji ba ntanda bakanena amba, “Ke talala, nyā, yonka ndoe.” Kino kibwanya kufunkila pa kinkumenkume kimo nansha mulongo wa binkumenkume. Mizo ikalanga padi amba keidi kubwipi na kupwija bikoleja byabo bimobimo bikatampe. Le bendeji ba bipwilo nabo le? I ba ino ntanda, o mwanda bakelunga na bendeji ba kipolitike. (Kus. 17:1, 2) Mu uno muswelo bendeji ba bipwilo bakeula bapolofeto ba bubela ba mu Yuda wa kala. Yehova wānene pa mwanda wabo amba: “Kebanena’mba: Ndoe, ndoe; apo pampikwa ndoe, nansha patyetye.”—Yel. 6:14; 23:16, 17.
4. Kwishila na bantu bonso, le i bika byotujingululanga?
4 Nansha shi i bantu’ka bakanena amba, “Ke talala, nyā, yonka ndoe” kino kikalombola’mba ke kushilula kwa difuku dya Yehova. Nanshi Polo wādi ubwanya kunena’mba: “Bānwe bāna betu, kemudipo mu fukutu’mba, dyodya difuku dīmupapamukile pamo bwa ngivi, mhm. Bānwe bonso mwi bāna ba mwinya.” (1 Tes. 5:4, 5) Kwishila na bantu bonso, batwe tujingululanga shintulwilo ya mu Bisonekwa ya binkumenkume bilongeka dyalelo. Le bupolofeto bwa amba “Ke talala, nyā, yonka ndoe” bukafikidila namani? Tufwaninwe kukungila ne kutala mobikekadila. Nanshi tusumininwei ‘kwikala batala kadi balame byumvwanino byetu.’—1 Tes. 5:6; Zef. 3:8.
“MULOPWE MUKAJI” WAPIKWILE DYESE DYANDI BIBI
5. (a) Le i muswelo’ka ukashilula “kyamalwa kibūke”? (b) Le ‘mulopwe mukaji’ ukapikula bibi dyese dyandi dya kupanda i ani?
5 Le i kinkumenkume’ka kekyamwekele kisa kulongeka? Polo wānene amba: “Ino po banena’mba: Ke talala, nyā, yonka ndoe; po ponka pa kupapamukilwa ko badi.” Kipindi kibajinji kya kuno “kupapamukilwa” i kutambwa kwa “Babiloni Mukatakata,” umbikalo wa ntanda wa mutōtelo wa bubela, uyukene ne bu “wabwitwa.” (Kus. 17:5, 6, 15) Kuno kutambwa kwa mitōtelo yo-yonso ya bubela, kubadila’mo ne kipwilo kya kine Kidishitu, kukashilula pa “kyamalwa kibūke.” (Mat. 24:21; 2 Tes. 2:8) Kino kinkumenkume kikafikila bavule mu kitulumukila. Mwanda waka? Mwanda kufika ne mu kine kitatyi’kya, wabwitwa ukemona na kikulupiji bu ‘mulopwe mukaji’ mwine ‘kakamonepo kuyoyokota.’ Ino ukajingulula mu kitulumukila amba wapikwile bibi dyese dyandi dya kupanda. Ukatukijibwa bukidibukidi enka na mu “difuku dimo dyonka.”—Kus. 18:7, 8.
6. Le i ani ukonakanya mutōtelo wa bubela?
6 Kinenwa kya Leza kitela wabwitwa tambañani bu “kinyema” kya “masengo dikumi.” Shi twifunde mukanda wa Kusokwelwa, tukamona amba kinyema kifunkila pa Bumo bwa Mizo (UN). “Masengo dikumi” elekeja imbikalo yonso ya kipolitike ya dyalelo ikwatakenye kino “kinyema kityila, pyā.” * (Kus. 17:3, 5, 11, 12) Le buno bulwi bukaleta musala muswelo’ka? Mizo ya UN ikatūta bupeta bwa wabwitwa, ne kusokwela patōka ngikadilo yandi, kumusasamuna, ne “kumusokelela fututu.” Ukonakanibwa lonso.—Tanga Kusokwelwa 17:16.
7. Le “kinyema” kikakolomona bika pokikatambañana bulwi?
7 Bupolofeto bwa Bible bulombola kadi bintu bikakolomona buno bulwi. Nansha bikale namani, Yehova ukatununa mityima ya baludiki ba kipolitike balonge “monka muswidile mutyima wandi,” nakampata kusala wabwitwa. (Kus. 17:17) Bipwilo bikolomona malwi bikyendelela kwingidija lupusa luleta kavutakanya mu ino ntanda; o mwanda mizo ibwanya kulanga’mba mu konakanibwa kwa wabwitwa mudi kamweno kayo. Bine, kitatyi kikatamba baludiki divita, bakalanga’mba bavuijanga “muswidile mutyima” wabo. Ino na bubine, bakalonga bintu pamo bwa kingidilwa kya Leza mwanda wa kukombeleja bipwilo byonso bya bubela. Nanshi, pakashinta bintu na mu kukopa kwa diso, kipindi kimo kya ngikadilo ya Satana kikatamba kipindi kikwabo, kadi Satana kakabwanyapo kwikikankaja.—Mat. 12:25, 26.
KUTAMBWA KWA BANTU BA LEZA
8. Le i bulwi’ka bwa kutambwa na “Koka, wa ntanda ya Makoka”?
8 Mutōtelo wa bubela pa kupwa konakanibwa, bengidi ba Leza bakendelela kwikala “ne mutyima-ntenke” kadi “bampikwa masakwa.” (Ezek. 38:11, 14) Le i bika bikafikila kino kibumbo kya bantu batōta Yehova bamweka bu kebadipo na wa kwibalwila? Bimweka’mba bakatambwa na “bantu ba ntanda ne miseke.” Kinenwa kya Leza kitela kino kintu bu bulwi bwa kutambwa na “Koka, wa ntanda ya Makoka.” (Tanga Ezekyele 38:2, 15, 16.) I muswelo’ka otufwaninwe kumona buno bulwi?
9. (a) Le i kintu’ka kikatampe kifwaninwe mwine Kidishitu kuta’ko mutyima? (b) Le i matabula’ka otufwaninwe kutabula dyalelo mwanda wa kukomeja lwitabijo lwetu?
9 Kuyuka kumeso kwa kitatyi myanda itala buno bulwi bukalwibwa bantu ba Leza, kwitukwashanga tuleke kuzumbija mutyima bipitepite. Ino, kintu kikatampe kyotutele’ko mutyima, ke lupandilopo lwetu, ino i kuyukanya buujila bwa dijina dya Yehova ne kubingija bubikadi bwandi. Na bubine, Yehova wānenene misunsa 60 ne kupita mba: “Mukayuka’mba ami ne Yehova.” (Ezek. 6:7) O mwanda tutengele na nsangaji mikatampe kufikidila kwa buno bupolofeto bwa Ezekyele bwa kutendelwa, koku tukulupile amba “Yehova uyūkile mwakunyongolwela boba ba bwine-Leza mo batompibwa.” (2 Pet. 2:9) Pano’ko bidi, tusakanga kwingidija mukenga o-onso wa kukomeja lwitabijo lwetu mwanda wa tubwanye kulama bululame bwetu kudi Yehova nansha shi tutanwe na matompo a muswelo’ka. Le i bika byotufwaninwe kulonga? Tufwaninwe kulombela, kwifunda Kinenwa kya Leza, kulangulukila’po, ne kusapwila bakwetu musapu wa Bulopwe. Shi tulonge namino, tukakomeja lukulupilo lwetu lwa būmi bwa nyeke, pamo bwa “kikwatyijo.”—Bah. 6:19; Mit. 25:21.
MIZO IKAYUKA YEHOVA
10, 11. Le i kayukeno’ka kakayukilwa’po kushilula kwa Amakedona, ne i bika bikalongeka mu kino kitatyi?
10 Lelo kutambwa kwa bengidi ba Yehova kukakolomona kinkumenkume’ka kikatenkanya ntanda? Yehova ukalwila bantu Bandi kupityila kudi Yesu ne bibumbo bya mūlu. (Kus. 19:11-16) Kuno kwibalwila kuketwa bu “divita dya difuku dikatakata dya Leza, Mwinebukomobonso”—Amakedona.—Kus. 16:14, 16.
11 Yehova unena kupityila kudi Ezekyele pa mwanda utala dino divita amba: “Nkēta kipete padi [Koka], ku ngulu yami yonsololo; i Mfumwenu Leza unena; kipete kya enselele kikekala pa mwanabo.” Pa kupandikila, boba bonso badi ku mutamba wa Satana bakavutakanibwa ne kwiasa abo bene na bene—kalala na kalala. Inoko, musala ukafikila ne Satana mwine. Yehova unena’mba: “Mudilo, ne bibidikityi padi aye [Koka], ne pa bisumpi byandi, ne pa bantu bangibangi badi nandi’ba.” (Ezek. 38:21, 22) Le i bika bikalupuka ku bino bikalonga Leza?
12. Le mizo ikafula ku kulonga bika?
12 Mizo ikayuka’mba i Yehova walengeja kushindwa kwayo. Kupwa, pamo bwa bantambañani ba pa kala Bene Edipito balondele tupolobela Bene Isalela pa Kalunga Katyila, bibumbo bya Satana bikadila pampikwa kikulupiji amba: “Yehova webalwila”! (Div. 14:25) Bine, mizo ikafula ku kuyuka Yehova. (Tanga Ezekyele 38:23.) Bino binkumenkume bisa kulongeka panopano ponka.
KEKUDIPO UMBIKALO MUKWABO WA NTANDA UKEMANA
13. Le i bika byotuyukile pa kipindi kya butano kya nkishi utelele Danyele?
13 Bupolofeto budi mu mukanda wa Danyele bwitukwasha tuyuke poketudi mu kulunguluka kwa bitatyi. Danyele utela nkishi wa muntu upungilwe na byuma palapala. (Dan. 2:28, 31-33) Uno nkishi welekeja kwipingakana kwa imbikalo ya ntanda yādi na lupusa lukatampe pa bantu ba Leza, ba pa kala ne ba dyalelo. Ino imbikalo i Babiloni, Mede-Peleshia, Ngidiki, Loma—ne umbikalo wa ntanda mukwabo wa mfulo ubikele dyalelo. Shi twifunde bupolofeto bwa Danyele, tukamona’mba uno umbikalo wa ntanda wa mfulo welekejibwe na binyantyilo ne maná a nkishi. Mu Divita I dya Ntanda, Beletanye ne États-Unis bāsambile kipwano kya pa bula. Nanshi, kipindi kya butano kya nkishi wāmwene Danyele i Umbikalo wa Ntanda wa Angeletele-Amerika. Binyantyilo, kipindi kya mfulo kya nkishi, kilombola’mba kekudipo umbikalo mukwabo wa ntanda wa muntu ukamweka. Bino binyantyilo ne maná bilongelwe na kilonda ne dilongo, byelekeja ngikadilo ya buzoze ya Umbikalo wa Ntanda wa Angeletele-Amerika.
14. Le i umbikalo’ka wa ntanda ukatanwa ubikele kitatyi kikafika Amakedona?
14 Buno bupolofeto bumo bonka bulombola’mba, Bulopwe bwa Leza bwelekeja dibwe dikatampe, dyālamukile ku lūlu lwa bubikadi bwa Yehova mu 1914. Dino dibwe dyendanga pano difwena pantu poditungile kwasa—ke ku binyantyilo bya nkishi kadi. Binyantyilo ne bipindi bikwabo bya nkishi bikakulakanibwa pa Amakedona. (Tanga Danyele 2:44, 45.) Nanshi, Umbikalo wa Ntanda wa Angeletele-Amerika ukekala nyeke bu umbikalo wa ntanda ukatanwa ubikele kitatyi kikafika Amakedona. Kikekala kya nsangaji’po kashā pa kwimwena kufikidila konso kwa buno bupolofeto! * Ino, le Yehova ukalonga Satana bika?
MUSWELO UKONAKANIBWA WALWANA MUKATAMPE WA LEZA
15. Pa kupwa kwa Amakedona, le i bika bikafikila Satana ne bademona bandi?
15 Dibajinji, Satana ukemwena muswelo ukonakanibwa fututu bulongolodi bwandi bwa pano panshi. Kupwa ke Satana aye mwine. Mutumibwa Yoano witulombola mobikapityila. (Tanga Kusokwelwa 20:1-3.) Yesu Kidishitu—“mwikeulu . . . wa lufungulo lwa lupongo”—ukakwata Satana ne bademona bandi, kwibela mu lupongo, ne kwibakuta myaka kanunu. (Luka 8:30, 31; 1 Yoa. 3:8) Kino kilongwa i ditabula dibajinji dya kusonsakanya nyoka ku mutwe. *—Ngal. 3:15.
16. Le kwikala kukekala Satana mu “lupongo” kudi na buluji’ka?
16 Lelo “lupongo” lukelwa’mo Satana ne bademona bandi i bika? Kishima kya Kingidiki aʹbys·sos kyāingidije Yoano kishintulula “mushike mukatampe.” Kadi kyalamwinwe bu “kekipimika, kyampikwa mfulo,” ne bu “kina kyampikwa mfulo.” Nanshi, i kifuko kekibwanyapo kufika’mo muntu ye-yense, poso’nka Yehova ne mwikeulu wandi watongele “wa lufungulo lwa lupongo.” Mu luno lupongo, Satana ukekala’mo pamo bwa mufwe kabwanya kwingila kutyina “wakongola dikwabo mizo.” Na bubine, uno “ntambo ubuluma” ukatalajibwa nyā!—1 Pet. 5:8.
BINKUMENKUME BITWALA KU KITATYI KYA NDOE
17, 18. (a) Le i binkumenkume’ka kebyamwekele byotwabandaula? (b) Tukekala namani kitatyi kikapwa bino binkumenkume?
17 Bintu bya mvubu ne binkumenkume bya kutenkanya ntanda bitutengele kumeso. Tutengele kumona muswelo usa kufikidila binenwa bya amba “Ke talala, nyā, yonka ndoe.” Kupwa tukemwena konakanibwa kwa Babiloni Mukatakata, bulwi bwa Koka wa Makoka, divita dya Amakedona, ne kwelwa kwa Satana ne bademona bandi mu lupongo. Bino binkumenkume pa kupwa, bibi byonso bikekala kutupu’byo, tukashilula būmi bupya—Umbikalo wa Myaka Kanunu wa Kidishitu, mwine motukaloelelwa “bungi bwa ndoe.”—Mit. 37:10, 11.
18 Kutentekela pa binkumenkume bitano byotwabandaulanga, kudi bikwabo “byampikwa kumweka” bine byotufwaninwe ‘kutala’ko.’ Bino binkumenkume bikabandaulwa mu kishinte kilonda’ko.
[Kunshi kwa dyani]
^ Binkumenkume dikumi bisa kubandaulwa mu kino kishinte ne mu kilonda’ko.
^ Tala dibuku La Révélation : le grand dénouement est proche ! paje 251-258.
^ Musemwa udi mu Danyele 2:44 unena’mba “kukubija malopwe ano’a onsololo,” ufunkila pa malopwe nansha imbikalo ya ntanda yelekejibwe na bipindi bya nkishi. Inoko, bupolofeto bwa mu Bible budingakene na buno bulombola’mba “balopwe ba panopantanda ponsololo” bakatalukila Yehova pa “difuku dikatakata dya Leza, Mwinebukomobonso.” (Kus. 16:14; 19:19-21) Nanshi, ke enkapo malopwe elekejibwe na nkishi akonakanibwa pa Amakedona, ino i ne malopwe makwabo onso a ino ntanda.
^ Kusonsakanibwa kwa mfulo kwa mutwe wa Satana, kukafika pa kupwa kwa myaka kanunu kitatyi kikelwa Satana ne bademona bandi “mu dijiba dya mudilo ne bibidikityi.”—Kus. 20:7-10; Mat. 25:41.
[Bipangujo bya Kifundwa]
[Kapango/Bifwatulo pa paje 9]
BINKUMENKUME BITANO BISA KUFIKA:
1 Kunena kwa amba “Ke talala, nyā, yonka ndoe”
2 Mizo kutamba ne konakanya “Babiloni Mukatakata”
3 Kutambwa kwa bantu ba Yehova
4 Divita dya Amakedona
5 Kwelwa kwa Satana ne bademona bandi mu lupongo
