Malondololo ku Bipangujo Bimanine pa Bible

Le dijina dya Leza i ani?

Bantu bonso ba mu byetu bisaka badi na majina. Enka ne banyema nabo badi na majina! Mwene i byendele’mo Leza nandi ekale na dijina? Mu Bible, Leza udi na bitenta bivule, pamo bwa Leza Mwine Bukomo Bonso, Mfumu Mubikadi ne Umpangi, ino udi ne na dijina dyandi dya bunka.—Tanga Isaya 42:8.

Mu malamuni mavule a Bible, dijina dya Leza dya bunka ditanwa mu Mitōto 83:18. Kimfwa mu Mukanda Ukola wa Mwine Leza, uno vese unena amba: “abe enka, wa dijina dya bu-Yehova, Wi Mwinemukatakatamwine panopantanda ponsololo.”

Mwanda waka tufwaninwe kwingidija dijina dya Leza?

Leza witusakilanga twingidije dijina dyandi dya bunka. Kitatyi kyo twisamba na bantu botuswele, kimfwa balunda netu, twibatelanga pa abo majina—nakampata shi betabije twibete’po. Le bifwaninwe kwishila kitatyi kyotwisamba na Leza? Inoko, Yesu wākankamikile bantu bengidije dijina dya Leza.—Tanga Mateo 6:9; Yoano 17:26.

Shako, pa kwikala mulunda na Leza, tufwaninwe kuyuka myanda mivule imutala pa kyaba kya kuyuka’tu’nka dijina dyandi. Kimfwa, lelo Leza udi namani? Le bibwanika bine kufwena kudi Leza? Ubwanya kutana malondololo a bino bipangujo mu Bible.

Shi usaka kuyukila’ko bivule, tala shapita 1 wa dino dibuku: Lelo I Bika Bine Bifundija Bible?, dilupwilwe na Batumoni ba Yehova

[Kifwatulo pa paje 16]

Kitatyi kyo twisamba na bantu botuswele, kimfwa balunda netu, twibatelanga pa abo majina