“Ubasokwela’byo ku Twana-twalukeke”
FWENAI KUDI LEZA
“Ubasokwela’byo ku Twana-twalukeke”
Lelo usakanga kuyuka bubinebine butala padi Leza—mwaikadile, mwikadile misoñanya yandi, ne kiswa-mutyima kyandi i kika? Yehova Leza i musokole bubinebine bonso bumutala mu Bible Kinenwa kyandi. Ino ke muntu yensepo ubwanya kutanga Bible ne kwivwanija buno bubinebine ne pa mfulo. Mwanda waka? Mwanda kwimvwanija buno bubinebine bwa ku mushipiditu i dyese dikatampe kedipelwepo muntu yense. Tubandaulei bidi byānene Yesu pa uno mwanda.—Tanga Mateo 11:25.
Uno vese ushilula na binenwa bya amba: “Penepo kadi [Yesu] walondolwela ponka.” Padi Yesu wādi ukimba kwisambila pa byālongekele. Wātopekele bantu bāpelele kwitabija ba mu bibundi bisatu bya Ngadilea mwine mwaālongele bingelengele. (Mateo 11:20-24) Ubwanya kwiipangula amba, ‘I muswelo’ka wādi ubwanya muntu kumona bingelengele bya Yesu ino wapela kwitabija bubinebine bwaādi ufundija?’ Bantu bāpelele bādi na mutyima mūmu.—Mateo 13:10-15.
Yesu wādi uyukile amba pa kwivwanija bubinebine bwa ku mushipiditu budi mu Bible, tusakilwa bintu bibidi: Bukwashi bwa Leza ne mwikadilo moloke wa mutyima. Yesu unena amba: “Nakufwijako abe Tata, mwine mūlu ne panopanshi, byo wafile’byo ku bañeni ne ku badyumuke, ino ubasokwela’byo ku twana-twalukeke.” Le kumwenepo kine kinenenwa amba, kwivwanija bubinebine bwa ku mushipiditu budi mu Bible i dyese dikatampe? Yehova, “mwine mūlu ne panopanshi,” ubwanya kufya nansha kusokola bubinebine kukwatañana na kiswa-mutyima kya bubikadi bwandi. Ino Leza kadipo amba yeu ye yeu mu uno mwanda utala kusokola bubinebine. Lelo i pa bubinga’ka pasokwelanga bubinebine bwa mu Bible ku bamo ino ufya’bo ku bakwabo?
Yehova witabijanga betyepeje, ke bakwitatulapo. (Yakoba 4:6) Ufyanga bubinebine ku “bañeni”—ko kunena amba bantu ba ñeni ya pano pa ntanda ne bafunde betatula bamona na kwikulupila amba, kebasakilwapo bukwashi bwandi. (1 Kodinda 1:19-21) Ino usokwelanga bubinebine ku “twana-twalukeke”—boba bāya kwadi na mutyima wampikwa budimbidimbi, balombola kwityepeja pamo bwa twana. (Mateo 18:1-4; 1 Kodinda 1:26-28) Yesu mwanā Leza wēmwenine bantu ba ino miswelo yonso. Bendeji bavule ba bipwilo bakwitatula kadi bafunde bininge kebāivwanijepo buluji bwa musapu wa Yesu, ino babiluwe betyepeje bewivwana. (Mateo 4:18-22; 23:1-5; Bilongwa 4:13) Mu kitatyi kimo kyonka bampeta ne bantu bamo bafunde bālombwele kwityepeja kwa binebine bāikele ke balondi ba Yesu.—Luka 19:1, 2, 8; Bilongwa 22:1-3.
Tujokelei bidi ku kipangujo kyaipangulwanga kūlu: Lelo usakanga kuyuka bubinebine butala padi Leza? Shi i amo, ubwanya kutana busengi pa kuyuka amba, Leza ketabijangapo boba bemona bu ba ñeni ya ino ntanda. Ino witabijanga boba bamweka bu kebadipo na ñeni ya ino ntanda. Shi wifunda Kinenwa kya Leza na mwikadilo moloke wa ñeni ne mutyima, ubwanya kubadilwa mu boba bapebwa na Yehova kyabuntu kya kutendelwa—ke kwivwanija bubinebine bumutala kadi. Kwivwanija buno binebine kukabweja’ko nsangaji mu būmi bobe dyalelo ne kutwala ku “būmi bulumbuluke”—būmi bwampikwa mfulo mu ntanda impya ya Leza ya boloke isa kufika panopano. *—1 Temote 6:12, 19; 2 Petelo 3:13.
Butangi bwa Bible bwa mu Kweji 1
[Kunshi kwa dyani]
^ Batumoni ba Yehova bakasangela kukukwasha wifunde bubinebine butala padi Leza ne pa mpango yandi. Bafundijanga bantu Bible ku bitupu na kwingidija dibuku Lelo I Bika Bine Bifundija Bible?
