Kwityepeja i kubulwa kwizunzula nansha kwitatula. Muntu mwityepeje kamonengapo bakwabo bu badi munshi mwandi. Muntu yense wampikwa kubwaninina mwityepeje ufwaninwe kwikala mutūkanye, ko kunena amba uyukile mikalo yandi.

Mosesa kādipo witatwila lupusa lwandi. Divule dine, kitatyi kipebwanga muntu lupusa lutyetye, kwityepeja kwandi—nansha kwitatula kwandi—kumwekanga bukidi bonka. Robert Ingersoll mulembi umo wa mu myaka katwa ka kitema unena’kyo uno muswelo amba: “Bantu bavule babwanya kutyumwina mwanda mu manwi. Ino shi usaka kuyuka mwine mwikadile muntu, mupe lupusa.” Mosesa wāshile kimfwa kiyampe kya kwityepeja mu uno mwanda. Muswelo’ka?

Mosesa wāpelwe lupusa lukatampe, mwanda Yehova wamupele mwingilo wa kwendeja Isalela. Inoko, luno lupusa kēlwalengejepo Mosesa etatule. Kimfwa, tala muswelo muyampe waāpwijije mwanda mukomo utala bupyani. (Umbadilo 27:1-11) Uno mwanda wādi mukomo mpata, mwanda butyibi bwādi bwa kukwatwa bwādi bwa kulondwa na nkongo ilonda’ko.

Le Mosesa wālongele’po namani? Le wādi wa kulanga amba byaādi mwendeji wa Isalela, wādi ubwenye bisakibwa bya kukwata butyibi mu uno mwanda? Le wāimanine pa bwino bwandi bwa kibutwila, pa bintu byāemwenine mu bula bwa myaka mivule nansha pa kuyuka kwaādi uyukile senene milangwe ya Yehova?

Padi muntu wa mitatulo wādi wa kulonga uno muswelo. Ino Mosesa kālongelepo namino. Nsekununi ya mu Bible itulombola amba: “Mosesa waleta mwanda wabo ku meso a Yehova.” (Umbadilo 27:5) Langa’po bidi! Pa kupwa kwa kintu kya myaka 40 yaāendeje muzo wa Isalela, Mosesa kādipo wikulupile aye mwine ino wādi ukulupile mudi Yehova. Pano tubamone amba Mosesa wādi mwityepeje bya binebine.

Mosesa kēpapilepo na mukao lupusa lwandi. Wāsangele kitatyi kyāpele Yehova bene Isalela bakwabo kwingila bu bapolofeto. (Umbadilo 11:24-29) Kitatyi kyāmudingile shandi muko amba abe mingilo yandi imo, Mosesa wāingidije na kwityepeja ano madingi. (Divilu 18:13-24) Kadi dya ku mfulo kwa būmi bwandi, nansha byaādi ukidi na bukomo mu ngitu, Mosesa wālombele Yehova atonge’ko wa kumupingakana. Kitatyi kyātongelwe Yoshua na Yehova, Mosesa wākwatakenye na mutyima tō uno nkasampe ne kusoñanya bantu balonde Yoshua akebatweje mu Ntanda ya Mulao. (Umbadilo 27:15-18; Kupituluka 31:3-6; 34:7) Na bubine, Mosesa wādi umwene kwendeja bene Isalela mu butōtyi bu i dyese. Ino katūdilepo lupusa lwandi kumeso kupita’ko ndoe ya bakwabo.

Ketusakangapo kwitatwila lupusa nansha bwino bwa kipangila. Vuluka amba: Pa kusaka kwingidijibwa bininge na Yehova, kwityepeja kwetu kudi nyeke na mvubu kupita bwino bwetu. (1 Samwele 15:17) Shi twi betyepeje bya binebine, tukalonga bukomo bwa kwingidija madingi a tunangu a mu Bible anena amba: “Kulupila mudi Yehova ne mutyima obe onsololo, kadi kokalemēnenapo pa kwivwanija kwa abe mwine.”—Nkindi 3:5, 6.

Kadi kimfwa kya Mosesa kitufundija amba, ketufwaninwepo kumona kyepelo kyetu nansha lupusa lwetu na mvubu mpata.

Lelo tumwenanga mu kwiula kimfwa kya Mosesa kya kwityepeja? Bine i amo! Shi tutamije kwityepeja kwa binebine, tukalengeja bantu betujokolokele betunenene maya ne kwituswa. Kintu kya mvubu kutabuka, tukaswibwa na Yehova Leza, mwine wālombwele ino ngikadilo ya kutendelwa. (Mitōto 18:35) “Leza ukomene bakwilemeka, ino upana buntu kudi babumvubumvu.” (1 Petelo 5:5) Bine tudi na bubinga bwendele’mo bwa kwiwila kwityepeja kwa Mosesa!