FWENAI KUDI LEZA

“Lelo ku Bijila Byonso’bi Kikatampe I Kyepi?”

Le i bika byotufwaninwe kulonga pa kusangaja Leza? Le kudi bijila bivule bine byotufwaninwe kulonda? Na bya dyese, malondololo i mhm. Kukwatañana na Yesu Kidishitu Mwanā Leza, byobya bisaka Leza kotudi i bipipijibwe mu kishima kimo.—Tanga Mako 12:28-30.

Tubandaulei bidi buluji bubajinji bwa binenwa bya Yesu. Wādi ufundija mu tempelo mu mafuku 11 Kweji wa Nisane, mafuku matyetye kumeso kwa lufu lwandi. Balwana nandi batompele kumuta dikinga na kumwipangula bipangujo bimo minyengakane. Kyaba kyonso wādi wibatalaja na malondololo andi. Kupwa Yesu webepangula kino kipangujo amba: “Lelo ku bijila byonso’bi kikatampe i kyepi?”—Vese 28.

Kino kyādi kipangujo kikomo. Bayuda bamo bādi besambila pa kuyuka kijila kibajinji kadi kya mvubu mpata mu bijila 600 ne kupita byādi mu Mukanda wa Bijila wa Mosesa. Bimweka’mba bakwabo bādi balanga’mba, bijila byonso byādi na mvubu imo yonka ne amba byādi bibi kumona na bulēme bijila bimo kutabuka bikwabo. Le Yesu wādi wa kulondolola namani ku kino kipangujo?

Pa kulondolola, Yesu kātelelepo kijila kimo, ino wātelele bijila bibidi. Wānene’mba kijila kibajinji i kino: “Ukasanswa Yehova Leza obe ne mutyima obe onso, ne muya obe onso, ne ñeni yobe yonso, ne bukomo bobe bonso.” (Vese 30; Kupituluka 6:5) Bishima pamo bwa “mutyima,” “ñeni,” “muya,” ne “bukomo” bibwanya kwikala na nshintulwilo imo. * Nshintulwilo i ino: Muntu ufwaninwe kusanswa Yehova aye yense, na ñeni ne bituntwa byandi byonso. Dibuku dimo disambila pa Bible dinena’kyo uno muswelo: “Leza ufwaninwe kusanshibwa bininge.” Nanshi shi usenswe Leza, ukalonga bukomo bwa kwiendeja nyeke mu muswelo wa kwitabijibwa nandi.—1 Yoano 5:3.

Yesu wānene amba kijila kya bubidi i kino: “Ukasanswa mukwenu na abe mwine.” (Vese 31; Levi 19:18) Buswe bwa kuswa Leza ne mukwetu i bukwatañane bininge. Buluji bwa bubidi i bwa amba buswe bwa kuswa mukwetu butamba ku buswe bwa kuswa Leza. (1 Yoano 4:20, 21) Shi tusenswe bakwetu na batwe bene, tukebamona mu muswelo otusaka betumone. (Mateo 7:12) Mu uno muswelo tukalombola’mba, tusenswe Leza wētupangile batwe—ne bakwetu—mu kimfwa kyandi.—Ngalwilo 1:26.

Le bijila bya kusanswa Leza ne mukwetu bidi na kamweno’ka? Yesu wānene’mba, “kutupu kijila kikwabo kitabukile bino’bi bukatampe, mhm.” (Vese 31) Mu nsekununi idi pamo bwa ino, Yesu wānene amba bijila byonso bikwabo i bikobekwe ku bino bijila bibidi.—Mateo 22:40.

Kusangaja Leza ke kukomopo. Byonso byasaka kotudi bibwanya kwipipijibwa mu kishima kimo: buswe. Buno buswe bwāikele nyeke na mvubu—ne bukendelela kwikala na mvubu—mu mutōtelo wa bine. Inoko buswe kebumwekelangapo ku binenwa nansha ku milangwe; ino i mu bilongwa. (1 Yoano 3:18) Ubulwe’po kwifunda muswelo obwanya kutamija ne kulombola buswe boswele Yehova, Leza mwine ‘udi bu buswe’?—1 Yoano 4:8.

Butangi bwa Bible bwa mu Kweji 3

Mako 9-16–Luka 1-6

[Kunshi kwa dyani]

[Bushintuludi pa paje 13]

Bintu byonso bisaka Yehova ku batōtyi bandi bibwanya kwipipijibwa mu kishima kimo: buswe