Bible Ushintanga Būmi

“Mwiendelejo wami wādi mubi”

I Esa Leinonen unena

MUBUTULWE MU: 1960

NTANDA YABO: FELANDE

PA KALA: MUKAI WA MINJIKI YA HEAVY-METAL

BYONADI: Natamine mu bukata bwa bantu balanda mu kibundi kya Turku kidi ku nkula ya kalunga ka mema. Tata wami wādi bingwa wa makayo a bikoni, kadi ami ne nkasami tweēlele mu makayo a bikoni. Nadi nkimba’nka luma ku masomo; nkyadipo ngija kwela bikoni. Ponadi nkasampe, nelunga na kisumpi kya bangivi, kine kyāunengeje nsanswe bya bikandangobo. Kadi nāyukile minjiki ya heavy-metal ne kushilula kulangulukila pa kwikala mukayi wa minjiki ya rock.

Napota mañoma ne kubunda kisumpi kya bakayi, kepejije naikala kaimba mwendeji wa kisumpi. Naikala na mwiendelejo wampikwa kufwaninwa. Bityebitye bantu kebesambila bininge potudi, mwanda kisumpi kyetu kyadi kimweka bu kitomboke kadi kya bipolapola. Twashilula kukaila kumeso a bantu bangi ne kukwatyija ñimbo mityetye, kadi ñimbo ya mfulo yatamba biyampe. Ku mfulo kwa myaka ya 1980, twaenda mu États-Unis mwanda wa kwendeleja kisumpi kumeso. Twākaile kitatyi kityetye mu New York ne mu Los Angeles, kadi tweivwana na bantu bapotolwele biyampe minjiki ya busunga kumeso kwa kujokela mu Felande.

Nansha byonādi nsangedile kwikala mu kisumpi kya bakayi, nadi nsaka būmi bwami bwikale na kitungo. Nkyadipo nsenswe ngikadilo ya kwitaka ne bya bupolapola byadi mu ino minjiki ya busunga, kadi nāfityilwe pangala pa mwiendelejo wami mubi. Nādi nemona bu muntu mubi, kadi nādi ntyina kusokwa mu kalunganyembo ka mudilo. Nātompele kukimba malondololo mu bitabo bya bipwilo byonso, kadi nālombele Leza bininge ankwashe nansha byonādi mona bu nkibwanyapo kumusangaja.

MUSWELO USHINTYILE BIBLE BŪMI BWAMI: Nadi ñingila ku bilo ya poshita ya mu kyetu kibundi mwanda wa kwikwatakanya. Difuku dimo, nayuka’mba mwingidi-nami i Kamoni wa Yehova. Namwipangula bipangujo bivule. Malondololo andi mapotoloke kadi a mu Bisonekwa antenga ku mutyima, ebiya naitabija kwifunda nandi Bible. Ami pa kupwa kwifunda mu bula bwa mayenga abala-anga,  bapa kisumpi kyami kya makayo mukenga wa kulupula alubumu ya minjiki mu États-Unis. Nāmwene’mba i dyese kedyamwekele kashā.

Nalombola Kamoni onādi nefunda nandi’mba nsaka bine kulupula’tu nansha alubumu imo kupwa nkesumininwa kwingidija misoñanya ya mu Bible mu būmi bwami. Waleka nkunombola mwalangila’po; waunena ntange’nka binenwa bya Yesu bisonekelwe mu Mateo 6:24. Uno vese unena amba: “Nansha umo uyūkile kwingidila bamfumuandi babidi.” Nātengelwe bininge kitatyi kyonāyukile nshintulwilo ya binenwa bya Yesu. Ino mafuku matyetye pa kupita’po, muntu wadi umfudija Bible nandi watengwa bininge! Namulombola’mba, byonsaka kulonda Yesu, natambe mu kisumpi kya bakayi!

Bible wādi pamo bwa kitalo kyāsokwele bilubo byami. (Yakoba 1:22-25) Nāmwene amba mwiendelejo wami wādi mubi: Nādi netatula, kadi na bilokoloko kebipu. Nādi nesamba bibole, nekupila ñuma, ntoma mfwanka ne kukolwa malwa. Kitatyi kyonāyukile amba mwiendelejo wami keukwatañene na misoñanya ya mu Bible, nemona bule. Nansha nabya, nādi mwiteakanye kushinta.—Efisesa 4:22-24.

Na kampata ku ngalwilo, nādi netopeka bininge pangala pa bilubo byami bya pa kala. Inoko, Kamoni onādi nefunda nandi wāunkweshe bininge. Wāunombwele byobya binena Bible mu Isaya 1:18 amba: “Nansha byabubi byenu bidi’nka bwa bityididila pya, bikatōka to-o bwa mpemba.” Uno vese ne mavese makwabo a mu Bible ankulupije’mba, Tata wetu wa mūlu i wa lusa, kadi usakanga kundapa bilonda bya boba besāsa bilubo byabo.

Kitatyi kyonāyukile Yehova bu muntu ne kumusanswa, nāsakile kupāna būmi bwami kwadi. (Mitōto 40:8) Nābatyijibwe mu 1992 ku kitango kya ntanda yonso kya Batumoni ba Yehova kyālongelwe mu St.  Pétersbourg, Rusi.

MUSWELO ONAMWENINE’MO: Natene balunda bavule bayampe mubukata mwa batōtyi ba Yehova. Twitananga kyaba ne kyaba mwanda wa kwimba minjiki miyampe ne kusangela kino kyabuntu kitambile kudi Leza. (Yakoba 1:17) Dyese dikatampe dyonaeselwe i dya kusonga Kristina mukaji wami onsenswe. Nesambanga nandi bintu bivule—nsangaji ne bikoleja bya mu būmi, kubadila’mo ne milangwe yami ya mu mutyima.

Shi nkyāikelepo Kamoni wa Yehova, longa nkidi’kopo dyalelo. Pa kala nadi ntanwa kyaba ne kyaba na makambakano ne tusua. Pano ngidi na kitungo kya binebine mu būmi, kadi monanga’mba ngidi na bintu byonso.

[Kifwatulo pa paje 8]

[Kifwatulo pa paje 8]

[Kutambile Kifwatulo]

© Kaj Ewart

[Bushintuludi pa paje 9]

“Tata wetu wa mūlu i wa lusa, kadi usakanga kundapa bilonda bya boba besāsa bilubo byabo”

[Kifwatulo pa paje 9]