Bible Ushintanga Būmi

“Nādi Nsaka Kwikala Kitobo”

I Roberto Pacheco Unena

mubutulwe mu: 1957

NTANDA YABO: MEKSIKE

PA KALA: MWIFUNDI WA KU SEMINELE; KILOBO

BYONADI: Nābutwidilwe mu kakibundi katyetye ka Texcoco. Mu kine kitatyi’kya, mashinda mavule keādipo na kabudimbo kadi ādi a luvumbi. Byādi bipēla kumona bantu ba mu bibundi bya kubwipi baselele bintu bya kupoteja pa bimbulu benda ku kibundi kikatampe. Twādi mu kisaka kilanda kya bana kitema mwine monādi mwana wa busamba-bubidi. Tata wādi usona bilato mwanda wa kukwatakanya kisaka. Ino wāfwile kitatyi kyonādi na myaka isamba-ibidi. Tamba penepa, mama wādi wikonda mwanda wa kudisha kisaka.

Nkambo wādi omba kipungwa kya minjiki kitwa bu violon, kadi wādi wendeja kisumpi kya batuimba bādi na bwino mu minjiki ya kipwilo. Bantu bavule mu kyetu kisaka bādi bomba byombanwa. Mama wādi wimba mu kisumpi kya batuimba ba kipwilo, muyomba nandi wādi kaimba wa minjiki ya opera kadi ñomba wa piano. Twādi bepāne ku kipwilo—nādi mu kisumpi kya batuimba, kadi nādi nsaka kwikala mishonele wa Katolika. Kitatyi kimo kyonka, nādi nsenswe mafilime a karate. Ami pa kwendelela kutala ano mafilime, bukalabale bwami nabo bwenda buvudila’ko.

Nāsangedile masomo a bipwilo adi afundwa pamo bwa seminele mu kibundi kya Puebla. Kitungo kyami kyādi kya kwikala kitobo wa Katolika. Ino ku mfulo kwa mwaka wa masomo, Kipwilo kya Katolika kyantyumuna mutyima. Masele umo nkasampe wansaka bu mulume. Napela, ino kino kilongwa kyalangula mondi mutyima wa kusonga. Pa kwabo kadi, nāmwene amba babitobo bavule bādi na būmi bwa buzazangi. Mwenda mafuku naleka kitungo kyami kya kwikala kitobo.

 Nakwata butyibi bwa kwifunda minjiki ku Kitango kya Ntanda Yonso Kifundijanga Minjiki mu Kibundi kya Meksike. Ami pa kutambula dipolome dya inivelesite, nasonga, kepejije ami ne wami mukaji twabutula bana baná. Nādi mvuija bisakibwa bya kisaka kyami na kwimba mu kitatyi kya Misa mu Kipwilo kya Katolika.

Ku ngalwilo’tu twatanwa na makambakano mu busongi bwetu. Ami ne wami mukaji twādi twilobela bininge pa mwanda wa kwikwatyilwa mukao. Ku ngalwilo twādi twipotomeja ne kwikupila. Mfulo mfulō, kupwa kwa myaka 13 twasansana ne kwilubula mwenda mafuku.

MUSWELO WASHINTYILE BIBLE BŪMI BWAMI: Nētene musunsa mubajinji na Batumoni ba Yehova kumeso kwa kusansana na wami mukaji. Batumoni babidi bākōkwele ku kibelo kyetu ne kwitunena twisambile nabo pa Bible. Nādi nanga’mba ndyukile bivule mu myanda ya Leza, ebiya kenkimbe kwibatuluja’mba babepanga bubela. Nāipangula bipangujo bikomo byonādi nanga amba kebidipo na malondololo. Ino kyonātulumukile i kino, bādi bampa nyeke malondololo emanine pa Bible. Nashilula kumona’mba nādi ndyukile’tu bityetye. Ino wami mukaji kādipo ulēmekele Batumoni, kadi nādi muvudilwe bya kulonga, o mwanda balekele kwitupempula.

Myaka itano pa kupita’po, nādi kenshikete na Elvira mukaji mukwabo kitatyi kyonētene monka na Batumoni ba Yehova. Elvira kādipo upela Batumoni, ebiya napēlelwa kwifunda Bible kitatyi ne kitatyi. Nansha nabya, byānombele myaka mivule pa kushinta būmi bwami bwa kala.

Nājingulwile’mba shi nsaka kutōta Yehova na mutyima onso, mfwaninwe kushinta bininge. Dibajinji bidi, naleka mwingilo wami wa kwimba mu kitatyi kya Misa mu Kipwilo kya Katolika, kwine kwādi kunomba kukimba muswelo mukwabo wa kusokola bidibwa. (Kusokwelwa 18:4) Kadi nādi mfwaninwe kulembeja busongi bwetu na Elvira.

Ino kushinta kwādi kukomo, i kwa kwifunda kubeja bulobo bwami. Bisonekwa bibidi byāunkweshe nakampata i: Kya Mitōto 11:5, kine kilombola’mba Yehova ushikilwe bikungulu bya bulobo, ne kya 1 Petelo 3:7, kine kyāumfundije amba shi nsaka Yehova evwane milombelo yami, mfwaninwe kulēmeka wami mukaji. Byonālangulukile pa bino bisonekwa ne kulomba bukwashi bwa Yehova, nābwenye bityebitye kubeja bulobo bwami.

MUSWELO ONAMWENINE’MO: Pano ngidi na būmi bwa nsangaji mu kisaka. Noñanga bukomo bwa kulongolola kipwano kyami na bami bana ba buluo bubajinji ne kukwasha kisaka kyami kya dyalelo kikale nyeke kikomo mu lwitabijo.

Ponādi mwanuke, nādi nsaka kwikala kitobo ne kukwasha bantu. Pano namone amba būmi bwami budi na kitungo kya bine. Nkwatakanyanga kisaka kyami na kufundija minjiki. Mfwijanga’ko Yehova pa kuntūkijija mutyima, kumpa mukenga wa kushinta ne kwikala muntu muyampe!

[Kifwatulo pa paje 8]

[Kifwatulo pa paje 8]

[Bushintuludi pa paje 8]

Ponādi mu kisumpi kya batuimba, nādi nsaka kwikala mishonele wa Katolika, ino nādi nsenswe ne mafilime a karate kadi nātamije bukalabale

[Bushintuludi pa paje 9]

Bible wāumfundije amba shi nsaka Yehova evwane milombelo yami, mfwaninwe kulēmeka wami mukaji

[Kifwatulo pa paje 9]