BIPANGUJO BYA BATANGI  . . .

Mwanda waka bantu bamo ba mu Bible kebatelelwepo majina?

Mu mukanda wa mu Bible wa Luta, muntu wāpelele kwingila mwingilo wandi kukwatañana na Mukanda wa Bijila wa Mosesa utelelwe bu kansangwa. (Luta 4:1-12) Le tufwaninwe kufula ku kunena’mba, bantu kebatelelwepo majina mu Bible i bantu babi nansha bampikwa mvubu?

Mhm. Tubandaulei’ko bidi bimfwa bishileshile. Pa kuteakanya bidibwa byandi bya mfulo bya Pashika, Yesu wāsapwidile bandi bana ba bwanga’mba “endai mu kibundi kudi yeu” ne kuteakanya bintu mu yandi njibo. (Mateo 26:18) Le tubwanya kunena’mba muntu utelelwe bu “yeu” mu kino kisonekwa wādi muntu mubi nansha’mba kadipo na mvubu? Nansha dimo; uno “yeu” utelelwe pano wādi mwanā bwanga wa Yesu. Dijina dyandi byokedyādipo dilomba’nka kutelwa mu nsekununi, dyātalwilwe.

Kadi, mu nsekununi ya mu Bible mudi majina a bantu bavule babi; kadi mudi ne bimfwa bya bantu bavule ba lwitabijo kebatelelwepo majina. Kimfwa, dijina dya Eva, mwana-mukaji mubajinji i diyukane biyampe. Inoko, kwisakila kwandi ne kubulwa kikōkeji kwālengeje Adama alonge bubi, bwine bwituletele batwe bonso bipa bilula. (Loma 5:12) Inoko, mukaja Noa katelelwepo dijina dyandi mu Bisonekwa, ino twi bamone mushipiditu wandi wa kubulwa kwisakila ne wa kikōkeji mu kukwatakanya wandi mulume mu mwingilo wa mvubu. Na bubine, kubulwa kutelwa kwa dijina dyandi kekulombolapo amba kādipo na mvubu nansha’mba ketabijibwepo na Leza.

Kudi bantu bakwabo kebatelelwepo mu nsekununi ya mu Bible bāingile mingilo ya kamweno​—kadi na bukankamane​—mu mpango ya Yehova. Langulukila’po bidi bityetye pa nkasampe mwana-mukaji mwine Isalela wādi umuninwe bupika mu njibo ya Nemani, mudyavita mwine Shidea. Wāsapwidile mukaja Nemani mfumwandi pampikwa moyo, myanda itala mupolofeto wa Yehova wādi mu Isalela. Kino kyāfikije ku kingelengele kikatampe. (2 Balopwe 5:1-14) Mwana mwana-mukaji wa Yefeta mutyibi wa Isalela wāshile kimfwa kya kutendelwa kya lwitabijo. Wāpelele ne mutyima tō dyese dya kusongwa ne kubutula bana mwanda wa kufikidija mpiko yāpikile shandi. (Batyibi 11:30-40) Mu muswelo umo onka, kudi bantu 40 bābundile mitōto kebatelelwepo majina, kubadila’mo ne bapolofeto kebatelelwepo majina bāvuije mingilo ya mvubu na kikōkeji.​—1 Balopwe 20:37-43.

Padi, kimfwa kimo kitulumuja i kya bamwikeulu ba kikōkeji. Badi tutwa na tutwa twa midiyo, ino i kutelwe’nka babidi kete mu Bible​—Ngabudyele ne Mikele. (Danyele 7:10; Luka 1:19; Yude 9) Bakwabo kebatelelwepo mu nsekununi ya mu Bible. Kimfwa, Manoa shandya Samishoni wāipangwile mwikeulu amba: “Lelo dijina dyobe wi ani, amba pa kufika binenwa byobe tukutumbije ntumbo.” Wālondolola’mba namani? “Lelo i mwanda ka oipangwila dijina dyami?” Uno mwikeulu wāpelele na kwityepeja ntumbo yādi ifwaninwe kupebwa’nka Leza.​—Batyibi 13:17, 18.

Bible kashintulwilepo mu mwanda ne mwanda kine kitelēlwe bantu bamo pa majina ino bakwabo kutelwa mpika. Inoko, tubwanya kuboila ñeni mivule ku bantu ba kikōkeji bāingidile Leza pampikwa kyepelo nansha kimo kya ntumbo ne bulēme.

[Kifwatulo pa paje 10]