MUTWE WA MWANDA WA PA KIBALU: MWANDA WAKA KUDI MASUSU MAVULE NENKI? LE AKAPWA KITATYI’KA?

Bantu Bavule Bampikwa Mwanda Bafwile!

Nkasampe Noelle wadi mwana wa kikōkeji kadi musanswe kwiolola. Kyolwa kimo mu bushipo, wadi wendakana kunyuma kwa yabo njibo, ebiya waponena mu kyumbu kyoyaña’mo kyabo kisaka ne kufwa wafwa. Kwadi’tu kushele mayenga abidi abwanye myaka iná.

Mu bantu 26 bafwile ku masashi ku masomo a Connecticut mu États-Unis mu mafuku 14 Kweji 12, 2012, bantu 20 badi na myaka isamba nansha isamba-ibidi, kadi majina a bamo i ano: Charlotte, Daniel, Olivia, Josephine. Ku madilo a bano bantu, Obama Mulopwe wa ntanda watelele majina a bano bana ne kunena bantu badi na njia batenwe ku madilo amba: “Bino bintu bifwaninwe kupwa.”

Bano wa myaka dikumi ne mwanda watambile ku Irake mu 1996 ne kuvilukila na kyandi kisaka ku Norveje. Balunda nandi badi bamwita pa dijina dyobamwinikile dya bu Sun Rays. Ino kya bulanda i kino, mu mafuku 22 Kweji 7, 2011, Bano wabadilwa mu bantu 77 baipailwe na ntomboki, wadi kaela lubila amba: “Nalombe lusa . . . pa kuleka kwipaya bantu bavule.”

Mānga ya bulanda ya uno muswelo isekununwanga kyaba ne kyaba kujokoloka ntanda yonso. Langa’po bidi njia ne misanshi ilupukanga ku maakishida, butapani, divita, butumbula, bimpengele bya kipangila, ne binzengele bikwabo. Bantu bavule bakubulwa mwanda bafwanga ne kususuka bininge, divule dine pambulwa ne bubinga bwine!

Bantu bamo batopekanga Leza, na kulanga’mba Umpangi wetu katelepo bantu mutyima. Bakwabo bafula’nka ne ku kunena’mba, Leza umwene masusu etu ino kulonga’po kintu mpika. Ino bakwabo nabo amba bino bintu i bilaibwe kufika. Bimweka bu bantu kebakalekapo kulanga uno muswelo pa uno mwanda. Ino i kwepi kotukokeja kutana malondololo akulupilwa ne asangaja? Mu Bishinte bilonda’ko tukamona malondololo aleta Bible, Kinenwa kya Leza pa bintu bilengeja masusu ne muswelo oakapwa.

[Kifwatulo pa paje 3]