MALONDOLOLO KU BIPANGUJO BIMANINE PA BIBLE

Le busongi bubwanya kwikala bwa nsangaji namani?

Madingi aleta Bible pa mwa kwikadila mu busongi bwa nsangaji akwashanga mwanda atambanga kudi Yehova Leza, Nsulo ya busongi. Etufundijanga tutamije ngikadilo ibwanya kulengeja busongi bwikale bwa nsangaji ne kwitudyumuna ku yoya ibwanya kona busongi. Kadi etufundijanga bwino bwa mwa kwisambila amba nsangaji ivule mu busongi.​—Tanga Kolose 3:8-10, 12-14.

Balume ne bakaji bafwaninwe kwilēmeka abo bene na bene. Shi bonso betabije mingilo ibapele Leza mu busongi, babwanya kwikala na nsangaji.​—Tanga Kolose 3:18, 19.

Le i bika bilengejanga busongi bulādile?

Ba mulume ne mukaji babwanya kushikatyila pamo biyampe shi besenswe umo ku mukwabo. Leza witufundijanga mwa kuswila. Aye ne Yesu wandi Mwana, i bimfwa bibwaninine bya buswe bwa kwipāna.​—Tanga 1 Yoano 4:7, 8, 19.

Shi balume ne bakaji balēmekele busongi bu mpangiko itūdile’ko Leza, bakekala nyeke pamo. Leza wāpangile’ko busongi mwanda wa mwana-mulume ne mwana-mukaji bekale lonso pamo amba bisaka bikale na mutyima ntenke. Busongi bubwanya kulādila mwanda Leza wāpangile bana-balume ne bana-bakaji amba bekwashe ku ngitu ne mu ñeni. Kadi wēbapangile mu kyelekejo kyandi, na bukomo bwa kwiula buswe bwandi.​—Tanga Ngalwilo 1:27; 2:18, 24.

Shi usaka kuyukila’ko bivule, tala shapita 14 wa dino dibuku, dilupwilwe na Batumoni ba Yehova

Ditūdilwe mwanda wa kuselwa pa www.pr418.com

[Kifwatulo pa paje 16]

Le i mīsambo ya muswelo’ka iletanga nsangaji mu busongi?