BIBLE USHINTANGA BŪMI

“Bantu Bavule Bādi Banshikwe”

I Waldo Moya unena

MUBUTULWE MU: 1978

NTANDA YABO: SHILI

PA KALA: KIPOLAPOLA WA MALWA

BYONADI: Nātamine mu Santiago, mwipata mwa Shili, mwādi balondakani batoma bitomibwa bikolwañana, bakatutwa-bila, kadi muvudile butapani. Ponādi na myaka itano, tata wāipaibwa. Kupwa, mama wasongwa na ntapani. Wadi witukupila kitatyi ne kitatyi. Nekidi na kyaso mu ñeni tamba mu mine myaka’ya.

Ami pa kutama, nkenonga bintu na bupolapola bwa malwa kitatyi kyobankolomona. Nadi ngivwana minjiki ya heavy-metal, nkolwa malwa, ne kutoma bintu bikolwañana kyaba kimokimo. Nadi nekupila kyaba ne kyaba mu bipito na bantu batoma bitomibwa bikolwañana, bene badi balonga bukomo bwa kukimba kungipaya. Difuku dimo, katūtwa-bila umo kinkwa nami wakanena muntu utumbile kukupijana angipaye, ino nalonga bukomo bwa kunyema mutapwe kilonda. Difuku dikwabo, kibumbo kya bantu batoma bintu bikolwañana bauntūla kabuta ku mutwe ne kukimba kungipaya.

Mu 1996, nasanswa mwana-mukaji witwa bu Carolina, ebiya twesonga mu 1998. Pa kupwa’tu kubutula wetu mwana umbajinji naikala na moyo’mba, mwanda wa ngikadilo yami ya bupolapola mbwanya kwikala pamo bwa tata wa bulelwa ne kona kyami kisaka. Ebiya nakakimba bukwashi ku lupitalo lwa mu kibundi kobafundijanga bantu mwa kwikadila. Baumpima ne kuñundapa, ino kutupu kyolokele. Naendelala na kukalabala bininge’nka ne pa ka kintu katyetye; nkyadipo nebeja. Pa kukimba kulonga bukomo bwa kuleka kusanshija kisaka kyami, kenkimbe kwiyoa. Na bubine, nakomenwe.

Nadi ntuna kwikala’ko kwa Leza mu bula bwa myaka mivule, ino nadi nsaka kukulupila mudi Leza. Ebiya nakatwela kyaba kimo mu kipwilo kya Evanjelike. Kitatyi kityetye pa kupita’po, wami mukaji kaefunde Bible na Batumoni ba Yehova. Nadi nshikilwe Batumoni, kadi nadi mpela ne kwibafunina kyaba kivule. Ino abo badi balonga bintu’nka na ndoe, bine byonkyādipo nangila.

Difuku dimo, Carolina waunena kutanga Mitōto 83:18 mu wami Bible. Uno vese ulombola patōkelela’mba dijina  dya Leza i Yehova. Natulumuka pa kuyuka’mba mu kyami kipwilo nefundile bintu bivule padi leza, ino kepadipo Yehova. Ku ngalwilo’tu kwa mwaka wa 2000, nami nashilula kwifunda Bible na Batumoni.

MUSWELO WASHINTYILE BIBLE BŪMI BWAMI: Ami pa kwendelela, nasengibwa pa kuyuka’mba Yehova i Leza wa lusa ne lulekelo. Kimfwa, mu Divilu 34:6, 7, Bible utela Yehova bu “Leza ! muyule lusa ne buntu, wija pakufuna bulobo, kadi i wa kanye ka ntanda ne ntanda, ne binebinepo; ulamine kanye ka tununu ne tununu, ulekela bukondame ne kujilula.”

Nansha nabya, kebyadipo bipēla kwingidija byonadi nefunda. Nadi nkulupile amba nkabwanya kwibeja ku ngikadilo yami ya bupolapola. Nadi nkomenwa kyaba ne kyaba, Carolina unkankamika na buswe. Wadi umvuluja’mba Yehova umwene bukomo bononga. Nkunkwatakanya kwandi kwaumpele bukomo bwa kwendelela na kusangaja Yehova, nansha byonadi nemona divule bu wampikwa lukulupilo.

Difuku dimo, Alejandro wadi umfundija, waunena kutanga Ngalatea 5:22, 23. Ano mavese alombola’mba kipa kya mushipiditu wa Leza i “lusa, ne tusepo ne ndoe, ne kutūkija mutyima, ne kanye, ne buyampe, ne bubinebine, ne kikōkeji, ne kwifula.” Alejandro washintulula amba nkikatamijapo ino ngikadilo na bukomo bwa ami mwine, ino i pa bukomo bwa mushipiditu sandu wa Leza. Buno bubinebine bwāshinta mumweno wami!

Mwenda mafuku, nakatanwa ku kitango kikatampe kya Batumoni ba Yehova. Ndudi, bukundwe, ne bubana na bana byonamwene’ko byaunkulupija amba natana mutōtelo wa bine. (Yoano 13:34, 35) Nabatyijibwa mu Kweji 2, 2001.

MUSWELO ONAMWENINE’MO: Yehova wangalamwine naleka bupolapola kendi muntu wa ndoe. Mona’mba Yehova i muntalule mu bitoto byonadi nejikile’mo. Bantu bavule bādi banshikilwe, kadi nkyadipo nebatopeka. Inoko, pano ñingidilanga Yehova mu ndoe na wami mukaji ne betu bana babidi.

Babutule bami ne balunda nami ba kala kebabwenyepo kwivwanija muswelo onashintyile. Mfulo mfulō, bavule mu bukata mwabo basangedile kwifunda bubinebine bwa mu Bible. Kadi ngidi na dyese dya kukwasha bantu bakwabo bayuke Yehova. Ino i nsangaji’po kashā ya kumona bubinebine bwa mu Bible bushinta būmi bwabo!