Bible i dibuku didi na bantu bavule pano pa ntanda. Mwanda waka? Kintu kimo bidi, upelanga kuyuka. Mudi nsekununi ya bine ya mu būmi bwa bantu bāikele’ko ne ya kipwano kyobādi bapwene abo bene na bene ne na Leza. Ino nsekununi itufundija bufundiji bwa kamweno, na kwingidija bishima bipēla bibwanya kwalamunwa mu ndimi tutwa na tutwa ne kwivwanwa na bantu bekele mu bifuko ne bitatyi palapala. Kadi misoñanya ya mu Bible ikwashanga nyeke.

Kintu kya mvubu i kino, Bible kadipo’tu’nka bu dibuku disambila padi Leza, ino kadi i dibuku ditambile kudi Leza. Ditela dijina dya Leza, bumuntu bwandi, ne mpango yandi yampikwa kushinta yaāpangīle ntanda ne bantu. Kadi Bible usekununa mānga ya bintu biyampe ne bibi byālongekele: Mānga isangaja itala diulu ne ntanda yafudile na nsangaji. Kutanga Bible na mutyima umo kwalanga kyalwilo kya lwitabijo ne lukulupilo.

Mu Bible mudi myanda keidipo mu dibuku dyo-dyonso. Kimfwa, Bible witulombola bubinebine bwa myanda pamo bwa ino:

• Kotwatambile ne kine kyotususukila

• Mpango ya Leza ya kukūla muzo wa muntu

• Bintu bitulongēle Yesu

• Mukekadila ntanda ne bantu mu mafuku āya kumeso

Ubulwe’po kubandaula bityetye mapaje alonda’ko ne kubandaula bine binena Bible?