MUTWE WA MWANDA WA PA KIBALU | Mwanda Waka Ufwaninwe Kusangela Bible?

Myanda Miyampe ku Bantu Bonso

Lusangukilo lwa Yesu lwāpele bandi bana ba bwanga kikulupiji ne bupyasakane. Nakampata mutumibwa Polo wāendele monsomonso mu Azia Minele ne mu Meditelanea, uteakanya bipwilo ne kukomeja bene Kidishitu bemanije mwa kulwila na bikoleja bya mu mwikadilo ne kupangwapangwa kukatampe. Nansha byokwādi bino bikoleja, bavule bāikele ke bene Kidishitu.

Enka ne Polo mwine wāelelwe mu kifungo. Ino, wālembēle bipwilo bya bwine Kidishitu mikanda ya kwibakankamika ne kwibadingila aye papo mu kifungo. Wēbadyumwine’nka ne ku kyaka kikatampe​—ke bupondo kadi. Pa kuludikwa na mushipiditu sandu wa Leza, Polo wābadikile kumona’mba “bampumpi bamalwa” bakwisamba “byalupatalupata” bādi bakutwela mu bukata mwabo ne “kukokela bāna-babwanga ko badi’mba, betulonde.”​—Bilongwa 20:29, 30.

Ku mfulo kwa myaka katwa kabajinji, buno bupondo bwashilula. Mu kino kitatyi, Yesu musanguke wāpele mutumibwa Yoano Kusokwelwa, mumweno wa kyelekejo wa bintu bīya kumeso. Monka mwāsonekele’kyo Yoano, kekwādipo balwana nansha bafundiji ba bubela bādi ba kukankaja Leza aleke kufikidija mpango yandi imbajinji itala ino ntanda ne bantu. “Mizo yonso, ne bisaka byonso, ne ndimi yonso, ne bantu bonso” bakevwana myanda miyampe ya Bulopwe bwa Leza. (Kusokwelwa 14:6) Paladisa ikajokejibwa pano pa ntanda, kadi yense usaka kulonga kiswa-mutyima kya Leza ukekala’mo!

Lelo ino imweka bu “myanda miyampe” kodi? Shi i amo, wifunde myanda mivule itala musapu wa Leza utanwa mu Bible wapele muzo wa muntu ne muswelo okokeja kumwena’mo dyalelo ne mafuku āya kumeso.

Ubwanya kutanga Bible abe mwine ku Entelenete pa www.pr418.com. Pa dino diteba, ukokeja kubandaula’po maboloshile pamo bwa La Bible ​— Quel est son message ? ne Myanda Miyampe Itamba Kudi Leza! ne dibuku Lelo I Bika Bine Bifundija Bible? pamo ne mabuku makwabo esambila pa mwanda mwine otukokeja kukulupidila mu Bible, ne muswelo otubwanya kwingidija madingi a kamweno adi’mo mu kisaka kyetu ne mu būmi bwetu. Nansha kwipangula Kamoni ye-yense myanda mikwabo.

​—Kukwatañana na Bilongwa, Efisesa, Fidipai, Kolose, Filemone, 1 Yoano, Kusokwelwa.