MUTWE WA MWANDA WA PA KIBALU | Mwanda Waka Ufwaninwe Kusangela Bible?

“Tubamone Meshiasa”!

Kintu kya myaka 400 pa kupwa kwa kipindi kya mfulo kya mukanda wa mu Bible wa Bahebelu kusonekwa, bupolofeto bwa Mika butala padi Meshiasa bwāfikidila bwa amba: Yesu wādi wa kubutwilwa mu Betelema. Kintu kya myaka 30 pa kupita’po, mu 29 K.K., kipindi kibajinji kya bupolofeto bwa Danyele butala pa kwiya kwa Meshiasa kyāfikidila. Yesu Wābatyijibwa ne kushingwa māni a mushipiditu sandu na Leza. Meshiasa, lukunwa lwālailwe tamba kala, wāfika pa kitatyi kitungwe!

Yesu wāshilula kiponka na ponka mwingilo wandi, wa “kufundija ne kulombola myanda-miyampe ya bulopwe bwa Leza.” (Luka 8:1) Monka mokyālailwe, Yesu wādi na kanye, mutūkanye, kadi utele bakwabo mutyima bya binebine. Bufundiji bwandi bwādi buyampe ne bwa buswe, kadi wābelwile “miswelo yonso ya bulema” bwa bantu, wālombola’mba Leza wādi nandi. (Mateo 4:23) Bantu ba myaka yonso bātūtyikile kudi Yesu ne kufula ku kunena amba: “Tubamone Meshiasa”!​—Yoano 1:41.

Yesu wālaile amba kumeso’tu kwa Bulopwe bwandi kubikala, kukekala mavita, bintenshi bya kutenkanya ntanda ne bikoleja bikwabo pano pa ntanda. Wāsoñenye bantu bonso ‘kutengela.’​—Mako 13:37.

Yesu wādi muntu mubwaninine wādi ukōkele nyeke kudi Leza, ino wādi na balwana bene bāmwipaile mwenda mafuku. Lufu lwandi lwāikele bu kyakwela kibwaninine kya kwitwalwija kyokya kyājimije ba Adama ne Eva​—ke kyepelo kya būmi bwa nyeke mu Paladisa kadi.

Lufu lwa Yesu lwāfikidije bupolofeto, monka mwāfikidije’bo Leza pa kusangula Yesu mafuku asatu pa kupita’po bu kipangwa kya ku mushipiditu kya bukomo. Kupwa Yesu wāmwekela bandi bana ba bwanga 500 ne kupita. Kumeso kwa kwenda mūlu, Yesu wāpele balondi bandi mwingilo wa kusapwila “mizo yonso ya bantu” myanda miyampe imutala ne itala Bulopwe bwandi. (Mateo 28:19) Lelo bāvuije uno mwingilo namani?

​—Kukwatañana na Mateo, Mako, Luka, Yoano, 1 Kodinda.