Lufu ke mwandapo usangaja. Bantu bavule kebasakangapo kwisambila’po. Ino, panopano ponka nansha mwenda mafuku, luketutana. Kadi lunonga luleta lufu lusansanga bininge.

Kekudipo kintu kikokeja kwituteakanya ne pa mfulo ku kufwilwa mbutwile, mwinē petu, nansha mwana. Kinkumbulu kibwanya kulongeka mu kitulumukila nansha mu kitatyi kilampe. Nansha bikale namani, njia ya lufu keibwanyapo kupwididila kadi mfulo mfulō ibwanya kuleta musala.

Antonio, wafwidilwe shandi mu akishida unena amba: “Bidi pamo bwa muntu wafunga yobe njibo ne kujimija mafungulo. Kubwanyapo kujokela ku njibo nansha ke mu kitatyi kityetye. Ubashala’tu’nka na milangwe ya amba udi na njibo. Uno i mwanda’tu mupya walongeka. Nansha shi utompe kupatana uno mwanda​—ino umweka bu ke muyampepo—​kekudipo kintu kyobwanya kulonga.”

Pa kufwilwa, Dorothy waikele wa kishala na myaka 47, wasumininwe kukimba malondololo ku bipangujo bimo. Byaadi mwadimu ufundija Dya Yenga, kadipo umona nansha dimo amba lufu yo mfulo ya bintu byonso. Ino katenepo malondololo mapotoloke. Waipangwile pashitele wabo wa Mishoni amba, “le i kika kitufikilanga potufwanga?” Wamulondolola amba, “kekudipo wikiyukile senene. Batwe’tu tutengelei kadi tukamona.”

Lelo tunenwe’tu ‘kutengela ne kukamona’? Lelo kekudipo muswelo otubwanya kuyuka shi lufu yo mfulo ya bintu byonso?